2 PETRO 1
1
1Yeny Simon Petro shikee ishinga na nrumi wa Yesu Kristo, shareiya kwany yeni mulewonisa kyikusiryo kimwi neese, kitiri wuuru efo usumanuny lwa Iruva weeru na Nkira weeru Yesu Kristo. 2Isarya lyimukae na urilalyi lwengerywa-u kwi immanya Iruva na Yesu Nndumi weeru.
Mmbo mulesauwa mukavaangwa ni Iruva
3Kimmba wiidimi lwa Ki-iruva lwallusimba findo fyoose fikwaani na muu na utele kya immanya yeto aleluvaanga na itumbe lyakwe na usha lwakwe muni. 4Kyeendwa ni efyo kalusimba kyaasa kiniini nnu, kya wuuru. Naambo kimaruma kya vayo muve veakana ngata ya Ki-iruva, mwikirwaa efo uraviny lukee ya ulaniny kyeendwa ni lango. 5Ee, kimaruma kyikee ekyo kyeni mukwiitike nnu kwa taari yaany efo kyikusiryony muvesanda na mesha, na efo mesheny yoo musande-fo urango, 6na efo urangony mwengeryen mwiina, neefo nnang'ani ya mwiina muvike-u ivereya, na ivereya elyo lyisange na utele, 7Efo uteleny kushe-u nkundanu wa vakristo, naefo nkundanuny wa vakristo lyisange-u ikunda. 8Naasa kwakooya findo fya ngata yeyo fyawalawala efo kwany, mmbo fishemwekyaa mulave varoko ao valavikaa ndunda na yeni mmbo mwiishi Nndumi weeru Yesu. 9Mashika yeto nalatiri efyo mmbo akee mfu miso, nnyashiidimaa ilollya findo fikee kwaasha-fo, mmbo anrekywa mbony ta iilyiswa ngyulyamari takwe ta kasha. 10Naasany vanavama, kutakureny nnu ivangisa uvaango lwany na isauwa lyany, mashika mukantana indo mmushewonaa nta nsindara umwi-fo. 11Mashika mmbo mukee vaniinge mwaanya ruu wa yaanga umanginy lwa llung'anu lwa Nndumi na Mwikira weeru Yesu Kristo.
12Kwa ekyo mmbo shikudeesye imukumbura efyo mikonu myoose, na kyikava mufiishi na ivangisywa efo dedeny yeyo. 13Na yeny mmbo shilollye ni usumanu, kyeeri ekyi shikee yaa ulaniny, shimwaante shiimukumburaa efyo. 14Kimmba shammanya sheelyi yaa shikai nkufii shuuke-u, shaasa Nndumi weeru Yesu Kristo ammeshoora. 15Lyo mmbo shikutakuraa naambo wo kyeeri elyi shammaa ifwa mwiidimi ikumbwa efyo fyoose.
Mmbo lulelollya itumbe lya Kristo
16Mashika llulelatya mbony tikee shisongosie na urango lwa kivandu, llya lulemuvia yeni mbony ta wiidimi lwa Nndumi weeru Yesu Kristo na isha lyakwe-fo. Lyo mmbo lwelollya luveni itumbe lyakwe. 17Mashika mmbo aleniingwa wiindi na itumbe ni Iruva, kyeeri aleengywa unyanga luleuka itumbeny iniini lwishambaa, “Yeu ni Mwana wakwa Nkunde wakwa, ashisennyi.” 18Na unyanga yelo mmbo lulelwiita luuka iruveeu kyeeri lwekee nawe kulya ifumbuny llya yeele. 19Neese mmbo lutiri irero elyo lya ukisuku lyitiri finya mmwasi, na yeni mukammaa ilyilola, sha taa imikaa ando a ireema, mwatana nisha, kutani kwakya na nyinyiri ya ngama ipooke ivaa miriminy yaany. 20Mashika nkwiifo nta kyeeri kimwi ao ando koose ukisuku lulemmendwa ni ikunda lya nndu wa vandu-fo. 21Lyo vandu mmbo valerera filya fileuka kwa Iruva, lyo veteterwaa ni Mumuyo Mweele.
Currently Selected:
2 PETRO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
