1 PETRO 5
5
Ironda lya Iruva
1Kya vamiku yewo vakee efo kwany, yeny shikee mmiku uroyeawo, na nkureekyi wa makiva a Kristo na mwakana itumbe llya lyishesukuwaa paa elyi numa; mmbo shamoolokya, 2mwiise na isalallya nisha ironda elyo lya Iruva lyikee kwany, nta mulavaa sheelyi mwaitikywa, kyaindi mutani indo kyikee kya ikunda shaasa Iruva akundye; nta nshi kya fesa ya ntambo-fo, lyo kive kya nrima. 3Nta mulasheeva sha vekwaallwa vanndumi efo fyuungony fyawo-fo, mashika mmbo mukundywa muve kyaaso kisha efo irondeny lyany. 4Na elyi Mwiisi yeto nniini ashelollywaa paa, mmbo mushewaryaa ureto lwa itumbe llwa lulanaa. 5Kiwo-da na yeni mukee vakoo, irikyeny vamiku. Yee, yeni moose raeny ngata ya ikunyiisa, llyo mushidimaa irundyana nisha, mashika Iruva mmbo alema yewo vekung'anisa, lyo yewo vekunyiisa kavasimba isarya lyakwe.
6Kyasia kunyiisyen yoo wokony lwa Iruva lukee ulyimbi, naambo namwipoo elyi kyeeri kifikaa. 7Mukeeny indo muvenrika we mario any moose, ni elyi we akee ikuvinisa nnu kyany yeni. 8Veny na mwiiyanu muvelala shoovi; mashika nkumbi yeto waany we mmbishwa, mmbo avakye miiso idinaa, itivaa-tivaa efo na efo iiruyaa nndu inratwe-ratwe. 9Lyo yeni kaaryeny, munlemi na kyikusiryo, manyiny ukiva elo lyo weni lukee ilollyo kwa vanavamaye vany yaa ulaniny. 10Na Iruva yeto muni isarya lyoose, yeto alemuvaanga naambo mwaange itumbeny lyakwe lya llung'anu kwi Kristo, mwammaa ilyiso ukiva kyaangu, we muni mmbo ashemuselevendee, na imuvika kiringisyo, na imusimba finya. 11Wiidimi llwakwe llung'anu kufike llung'anu. Amen.
Kya ifurumya
12Barrwa yei mmbo shamureiya na woko lwa Silvanu, mwanamaye weeru akee nsaari, nng'u marero yoo maangu, naambo shiikyimbe na ikureeka-u sheelyi yelyi llyo isarya lya dede lya Iruva. Na yeni salaleny mukusirye-u. 13Siri shisauwe ni Iruva ya kunu Babilony yamwiidikira, na nsero wakwa, we Marko kiwo. 14Kwiidikireny na kimimindo kya ukundi.
Unapwe lukae kwany yeni moose mukee nnang'ani ya Kristo. Amen.
Currently Selected:
1 PETRO 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
