2 VAMANGYI 9

Yehu avikwa mangyi ya Israeli

1Nkisuku Elia kavaanga umwi nnang'ani ya vana va vakisuku, kammbia, kuinive kisiny, kwiipo shupa yei ya mafura kweende nayo kufike Ramoth-gileadi. 2Elyi kufikaa-fo kuruuye Yehu mwana wa Yehoshafati, mwana wa Nimshi, kwaange kumwuute nnang'ani ya vana va-maaye kundemwaata mmba kireeny kya nnang'ani. 3Nalyo kwiipoony shupa ya mafura kunletye nrony mmbwakwe, kwaambe, Nndumi Iruva, aamba indi, Shankwaamba mafura kuve mangyi ya Israeli. Kwamma kurue mmba, kurishe uviny. 4Naasa nsero ulya, ulya nkisuku keenda Ramoth-gileadi. 5Nawe ekifika kulya kakooya vaniini va matorito vetiri kirembo, nawe kaamba; Ni-kwafo mmbe sharumwa, Yehu, kaamba, ni kwa ungau nnang'ani yeru yese loose? Kaambia, ni Kwafo yewe mmbe. 6Kakwiipoo, kaanga mmba, nawe kanletya mafura alya nrony mmbwakwe, kammbia, Nndumi Iruva, Iruva wa Israeli, aamba indi, mmbo shakwaamba mafura, kuve mangyi ya vandu va Nndumi Iruva, kushillye vandu va Israeli. 7Neewe mmbo kushekapaa mmba ya nndumi wafo Ahabu, naambo shitaiye-fo kiduva kya samu ya varundi vakwa vakisuku, na samu ya varundi woose va Nndumi Iruva ilya ilepusukya maakony a Yesebeli. 8Mmba ya Ahabu mmbo ishemamika isie deny, nshemmuta vasero woose, vafinge na valakee vafinge kunu Israeli. 9Mmbo shisheallwa mmba yei ya Ahabu, ive sha mmba ya Yeroboamu mwana wa Nebati na mmba ya Baasha mwana wa Ahiya. 10Na Yesrebeli ashelyiwaa mfite kulya mbateny ya Yesreeli, nta nnyavonikaa nndu mwiinrika-fo. Karua mmba karisha. 11Naasa Yehu kakwiipo kalatya varundi va nndumi wakwe. Umwi waawo kammbesa, nnamafoo-ro? Nkyokyi kyeende nndu yeu wa ukwale kwafo? Kavavia, Eni mmbo mwiishi nndu yeu, na mbony ta marero akwe. 12Vakaamba, Mmbongo; ankye-luvie. Kaamba ashivia indi uve na uve, eshaamba Nndumi Iruva aamba-indi. Mmbo shakwaamba mafura kuve mangyi ya Israeli. 13Naasa woose vakaangusya deny yuuta-fo wo nndu isara lyakwe na ilyivikwa kwasi ya kitara, vakakapa wombe, vakaamba; Yehu ni mangyi.

Mangyi Yoramu wa Israeli awaawa

14Naasa Yehu mwana wa Yehoshafati, mwana wa Nimshi kasheriingya Yoramu. Naasa kyikava Yoramu mmbwe mwiiringa Ramoth-gileadi, amwi na Israeli shoose, kimaruma kya Hasaeli mangyi ya Shamu. 15Indi mangyi Yoramu muni emmbuya ooka ivavara fishavere fyakwe filya evikwa ni Vaashami kyeeri kilya ekabanaa na Hasaeli mangyi ya Shamu. Yehu kaamba, Kwakooya ni indo mukusarie, nalasomuke nndu nta umwi kunu muriny-fo naambo eene yaamba mbony ta Yesreeli. 16Naasa Yehu kasaama ikari lyakwe eende Yesreeli, mashika Yeranu mfo kundo elallye, na Ahasia mangyi ya Yuda nawe emmoloka-fo indesaiya Yoramu. 17Naasa ulya mwiiringa ikamba, eselelyi uwe ya nnara wa Yesreeli, kalollya Yehu na vandu vakwe eshaa kaamba, shilollye ironda lya vandu. Yoramu kaamba Uviny! Ruma nndu, mwisama frasi umwi andevaambya avavese Annamafoo-ro? 18Nalyo mwisaama frasi umwi kandevaambya, kaamba Mangyi aamba indi, Nnamafoo-ro? Yehu kaamba, A-mmbo ufoo lwakuting'a fo-ki? Induka kwashilatye. Nringi ulya kaviira nrumi kaamba, ulya mulenruma ashesununda mbony alefika llyo nnyakemuwuiya lyingyi-fo. 19Nalyo karuma-se mwisaama frasi wa kavii, nawe kandevafikya, kavavia, Mangyi aamba indi, Nna-Mafoo-ro? Yehu kaamba, A, mmba Ufoo lwakuting'a fo-ki? Induka kwashilatya. 20Nringyi ulya kaviira nrumi kaamba, ulya mulenruma ashesununda mbony alefika lyo nnyakemuwuiya lyingyi-fo. Ngata eke irishisa ikari lyakwe kavaka myeengye ya Yehu mwana wa Nimshi, 21Yoramu kaamba, shaallyeny ikari. Wakamwallya ikari lyakwe. Vakakwipoo Yoramu mangyi ya Israeli; na Ahasia mangyi ya Yuda wo nndu na ikari lyakwe. Vakeenda naambo vandeambya Yehu, vakandenkooya kyaambeny kya Naboth, Myezreeli. 22Naasa Yoramu ekilollya Yehu, kammbesa, nna-mafoo-ro? Kammbia, ufoo luuke-kwi, na utuusi lwa mau Yesebeli, yeto atiri usavi lufye indi? 23Yoramu kavia Ahasia ati ni uwai Ahasia kainduka karisha. 24Yehu kaomwa ura kwa finya shoose kaotorya mfe ukanndosha nnang'ani a meeva akwe ukadosha ngoo yakwe kawa-sumbai ooka ikariny lyakwe. 25Naasa Yehu kavia akida wakwe Bidkari, mwiipo kwandemweera kulya kyaambeny kya Naboth, Myesreeli; mashika mmbo kukummbuye nkonu ulya luryiani luvaavi wo nndu na frasi yakwe, lwisheenda kwa ndeye Ahabu; Nndumi Iruva mmbo alemmbikya irio elyi kaamba, 26Nndumi Iruva kaamba, ni kya dedde, ukwau mmbo shilelollya samu ya Nabothi na ya vana vakwe, Ni kuti shikutaiye kiduva kunu kyaambeny ekyi. Kweekyo ulaalu mwiipony kundemweera efo kyaambeny ekyo ndesa marero a Nndumi Iruva aleamba.

Mangyi Ahasia wa Yuda awaawa

27Nawe Ahasia mangyi ya Yuda akilollya indo, karisha. Yehu kallatya numa, kaamba naakwa mmwe nkapeny efo ikariny lyakwe, vakanndenkapya alya kwesaamye na Kuri, kufii na Ibleamu. Karishya Mekido, kandefiiya-fo. 28Varundi vakwe vakambika ikariny fika Yerusalemu vakandendika kifuny kyakwe amwi na vandeye kulya muriny wa Davidi. 29Kwikee mwaaka wa ikumi na lyimwi wa Yeramu mwana wa Ahasia, llyo Ahasia ebooka ishillya Yuda.

Malikia Yesebeli awaawa

30Kyeeri Yehu efika Yesreeli, Yesebeli keeta mbony, kashopa kisangu kyakwe na yooka fii, kandeamaiya, na itirisheny. 31Ndesa Yehu aleanga muriny, kavesa kaamba, a-mmafoo-ro, Yewe Simri mwiwaa nndumi wafo? 32Kaipoo kisangu kyakwe alella kulya idirisheny, kaamba, Mmbovi akee kyaalu kyakwa? Varundi vavii ao vararu vakamwamaiya. 33Kaamba, Mweereny-si Nawo vakamweera-si, na samu kambavara-vavara. 34Ekyaanga, kalya, na ina, numa kaamba, loleny nka yeu-te, yeu akee n-denge, mwiipony mukandendika mashika ni mfu wa mangyi. 35Vakeenda naambo vandenndika, indilyo mmbalelollya kindo kuuta kishorongo kya nrwe wakwe, na marende akwe na fidau fya maako akwe. 36Naasa vakawuya yaamba mbony yeto. Kaamba elyi llyo irero lya Nndumi Iruva, aleamba kwa kana kya nndundi wakwe Elliya Mtishbi kaamba, fite mmbo fishelyaa nyama ya Yesebeli efo kyaambeny kya Yesreeli. 37Na nnying'a wa Yesebeli mmbo ushevaa sha kirashi nnang'ani ya marema efo kyaambeny kya Yesreeli, nta kulalollywaa-fo nndu ashambaa yeu ni Yesebeli.

Currently Selected:

2 VAMANGYI 9: MAS2

Highlight

Compare

Copy