2 VAMANGYI 10

Vafyaari va Ahabu vawaawa

1Naasa Ahabu kulya Samaria etiri-fo vana makumi mfungare. Yehu kavareikya barrwa katiruma Samaria kwa Vaniini va Yesreeli, amwi na valya vatetera vana va Ahabu, kaamba, 2Barrwa yei ikammufikya, na kimmba mwiifo na vana va vandumi vany, na elyi efo kwany kwiifo frasi na mitika; na muri uteri ndala na fisha; 3naasa sauwe-fo nndu umwi akee ntakusu na nsaari nnang'ani a vana va nndumi waany, mushembika kitiminy kya ndeye, na ikapannya mmba ya nndumi waany. 4Indi vakaereya nnu, vakaamba, Kulollye, vamangyi vavii mmbaleidima ikabana nawe-fo yese mmbo lushiidima kyikwi? 5Naasa ulya eke mwilola mmba ya kimangyi na ulya eke mwilola muri, na vamiku, na vateteri, vakaruma nrumi kwa Yehu, vakammbia, Yese mmbo lukee mashinga afo, wo irero kuluvia niindo lushetanaa, llushesalesaa nndu nta umwi nakooye iva mangyi-fo; tana ekyo kyasha misony-fo. 6Llyo evareikya barwa ya kavii kavavia; Kwakooya ni kyaalu kyakwa mukai; na mushiirikyaa unyanga lwakwa, rummbwen-fo mirwe ya vandu yewo, ya vana va nndumi waany, musheengye na kunu Yesreeli ndesi kyeeri sha ekyi. Na vana yewo va mangyi, vandu makumi mfungare veifo ando amwi na vaniini valya va ilola muri. 7Naasa barrwa ilya ikivafikya vakatira vana valya makumi mfungare va vakavawaa, vakavika mirwe yaawo fikapuny vakanrwaaya kulya Yesreeli. 8Nndu kamweengye, kammbia, Vamma yeende yaandi mirwe ilya ya vana va mangyi. Kavavia endevikeny nungu ivii allya mwaango wa yaanga kutani ngama. 9Kwikyiva ngama, kasomuka kavia vandu woose, Yeni ni vandu va usumanu, yeny shileindima iviingya nndumi wakwa shandembwaa, indi mmbovi alekaba vandu yeva woose? 10Ulaalu manyiny, sheelyi irero lya Nndumi Iruva llyishewaa si elyo alerera Nndumi Iruva kya mmba ya Ahabu-fo, mashika ni Nndumi Iruva atana kilya alerera na kana kya nndumi wakwe Elia. 11Kweekyo Yehu kakaba valya valesaa-u woose va mmba ya Ahabu kulya Yesreeli, na vaniini vakwe woose, na mmba takwe, na vakohani vakwe, kutani avakomba kombi kulasaa-u nta umwi.

Va-mmba ya Ahasia vawaawa

12Kakwiipo-se kafika Samaria. Ekee shia nnang'ani kufii na mmba ya veesi yesemmya mafwaa a moonri 13Yehu kakwaanannya-u na vana vamaye va Ahasia mangyi ya Yuda, kavavesa, Yeni mmbaki? Vakammbia, Yese ni vana va maye va Ahasia, mmbo lukeyeenda lundesaiya vana na vefu va mangyi. 14Kavavia vatireny veifo na muu, vakatana indo, vakavawaiya kufii na kirori kya mmba ya isemmya mafwaa a moonri, vandu makumi aana na vavii vakavakomba kombi.

Woose valya vesaa-fo va Mmba ya Ahabu Vawaawa

15Ekyuuka kulya kakwanannya na Yehonadabu mwana wa Rekabu eshemwaambya, kamwiidikira kammbia, nrima yeu wafo mmwaa sheelyi yeu wakwa ukee mmwaa kwafo? Yehonadabu kaamba yee, Yeu kammbia, kwakooya ni indo shooroya woko lwafo. Kamooroya woko kammbika ikariny amwi nawe. 16Kammbia shilatya kulole ndesa shivikye Nndumi Iruva nsia. Vakansaamisa ikariny lyakwe. 17Nawe llya alefika kulya Samaria kashevakapa valya woose vesaae kwa Ahabu, kutani ammamita ndesa irero lya Nndumi Iruva lyainukya llya lyileambawa ni Elia.

Veiindya Baali Vawaawa

18Yehu kaumbya vandu woose, kavavia Ahabu ni kyaangu alerundya Baali, indi Yehu ashewarundyaa mmwasi. 19Naasa shivaangyeny vakisuku woose va Baali, nalawiike-u nta nndu umwi-fo. Mashika mmbo shitiri kiraso kiniini shikunndye yuutya Baali; yeto awiika-u mmbo ashewaawa. Indi Yehu mmbo alevalemba mashika mmbo ekunndye ilyamara valya woose veinndya Baali. 20Yehu kavavia vakwiilise kya mwiindye wa Baali vakatana indo. 21Yehu karuma vandu Israeli koose, na valya vainndya Baali woose vakasha kulasae-fo nndu nta umwi; vakaanga mmba ya Baali, mmba ya Baali ikaishwa kupookya mwaango kufike mwaango ulya ungyi. 22Kavia ulya mwilola mbony ta soori, avaniingye soori valya woose vaindya Baali. Katana indo. 23Yehu na Yehonadabu mwana wa Rekabu vakaanga efo mmba ya Baali, kavia valya veindya Baali, valole nisha kulase-fo nndu nnang'ani yaawo wa iindya Nndumi Iruva kuuta Baali nsi. 24Vakaanga mmba naambo vakooye yuuta mwiindye na kiraso kya imamitwa. Naasa Yehu endeesya vandu makumi nyanya efo poo, kaamba Nndu umwi kankya, nnang'ani a vandu eva shammbavika maakony any, nndu yeto muu wakwe mmbo uvaa andu a muu wakwe. 25Ekimaa iniingya kiraso kya imamitwa. Yehu kavia veringa na veeshillya “Angeny muvakabe alave-fo nndu umwi asomuka-fo.” Naasa vakavakaba na fisha fya upanga, veeringa na veeshillya vakaveera poo, vakeenda fika muriny wa mmba ya Baali. 26Vakasomuta-fo ngo tilya tekee yefo mmba ya Baali, vakatimamita. 27Naasa vakafisha ngo ya Baali, na iwuundwa mmba yakwe vakayaallwa mmba ya mando fika inu. 28Ni indo Yehu aleillwa Baali kulya Israeli. 29Lyo Yehu nnyalekunda ilakana na ngyulyamari tilya ta Yeroboamu mwana wa Nebati, tilya teengye vana va Israeli vakalyamara, ngashe ta saabu tilya tekee kulya Betel, na Dani. 30Naasa Nndumi Iruva kavia Yehu, “Kimmba kuletana mesha mbee ya usangu lwakwa, na itana indo kwa mmba ya Ahabu ndesa shekusarye efyo nriminy wakwa, irika lya kaana lya vana vafo mmbo vashekayaa kiri kya ishilya Israeli.” 31Indi lyo Yehu nnyalekikundaase ilatya fya usumanu yefo fyekee nriminy wa Nndumi Iruva, Iruva wa Israeli-fo; nta ilakana na meesi alya a Yeroboamu aleengye vana va Israeli vakalyamara.

Ufu lwa Yehu

32Llyo Nndumi Iruva epooka imanya Israeli fyenga fyenga. Hasaeli kakaba uruka loose lwa Israeli, 33kupookya Yordan taari ya ngama uruka loose lwa Giliadi kai, Ruben na Manase kupookya Aroeri yeyo ikee kufii na imungo lya Amoni Giliadi, na Bashani. 34Ulaalu mitanyi myoose ya Yehu filya filesaafo na filya alerunda, na finya takwe shoose mmbo filakee fireiye yefo kyitabuny kya mikonu ya Vamangyi va Israeli. 35Naasa Yehu kafwa kimwi sha vandeye, nawe vakamwaara kulya Samaria. Naasa mwana wakwe Yehohari kashilya andu akwe. 36Kyeeri Yehu eshillya Israeli kulya Samaria ni myaaka makumi avii na nyanya.

Currently Selected:

2 VAMANGYI 10: MAS2

Highlight

Compare

Copy