2 VAMANGYI 25

Yerusalemu yamamitwa

(2 Fye 36:13-21; Yer 52:3b-11)

1Kwikee mwaka wa kyeenda wa ushilyi lwakwe, na kwikee nkonu ikumi wa mwiiri wa ikumi na mwaka wa kyeenda wa ushilyi lwakwe, Nebukadresa mangyi ya Babilony we amwi na vasikari woose kakaba Yerusalemu, vakatana muri vakauringitya riti. 2Kyikava indo andu a myaaka ikumi na umwi kyeeri kya ushilyi lwa Sedekia, 3Kwikee nkonu va kyeenda mwiiri wa kaana, vandu va uruka lulya vakaolwonkywa ni ngapo ya shaa shiniini ilandelolywa lyingi. 4Nalyo vakandewundwa mwaango nniini andu kwesumuka elyi kio kufii na ndala ya mangyi, vandu woose va fira vakasumuka-fo vakarishia Arabu, sanda na elyi kweifo vandu Vakaldayo vekeringa elyi kio. 5Indi vasikari valya, wo Vakaldayo vakalatya mangyi numa vakandenkooya kulya ng'alo kasa ka Yeriko, na vasikari vakwe woose valya vekee nawe vakanyanyaka vakalakana nawe. 6Llyo vetiri mangyi ilya vakandemfita kwa mangyi ilya ya Babilony kulya Rilda vakandemuntya uvingo. 7Vakawaa vana va Sedekia mbee ya miso akwe vakambara miso we mangyi Sedekia, vakamfinga na mise, vakanrwaa fika Babilony.

Mmba ya iterevya yarumatwa

(Yer 52:12-23)

8Nkonu wa mfungare mwiiri wa karaanu, nto mwaka wa ikumi na kyeenda wa Nebukadresa, mangyi ya Babilony, Nebusaradani yeto nsongoru wa vasikari yewo veringa yelyi kio, nndundi wa mangyi ya Babilony kaanga Yerusalemu. 9Kamamita mmba ya Nndumi Iruva, na mmba ya mangyi, na mmba toose ta Yerusalemu, mmba shoose kamamita deny na muro. 10Na vasikari woose va Vakaldayo, valya veryani na nniini waawo vakawundwa isimamba llya lyeringyitye Yerusalemu taari toose. 11Na vandu valya vesaa kulya muriny, na valya velatya mangyi ya Babilony, na valya vengyi woose vensaa-fo vakakamarwa mifungwa ni Nebusaradani nniini ulya wa veeringa kio. 12Indi-lyokara-fo vandu maata, valya vafwafwa na vaturi vave veeringa na iremmya misabibu. 13Na ngo tilya ta yaambo tekee kulya mmba ya Nndumi Iruva, na kirembo kilya kya nungu ya yaambo yekee kulya mmba ya Nndumi Iruva, Vakaldayo valya vakaifishafisha fyenga fyenga vakakamara fika Babilony. 14Vakakamara fia fyoose fya nndumwa wa mmba ya Iruva. 15Kikaango kya ubani na bakuri: Fia fya saabu na fesa fyoose nniini va vasikari vlya veeringa kafikamara. 16Kya ngo tilya ivii ta yaambo na kirembo kilya nungu ya mura, na fia fyoose filya fyesongosywa ni Solomon fya mmba ya Nndumi Iruva, mmbo fyekee findo filevaa iipowa. 17Waasha lwa ngo imwi kulella uwe ni maako ikumi na nyanya, na alya uwe ya vayo kukavikwa-u nrwe wa yaambo, na waasha lwa vayo lweeke maako araru; vakavika-u utore lwa ushekesheke na makomamanga yoo uwe ya vayo taari shoose na fyoose fya yaambo. Na ngo ilya ya kavii, naa-kiwo.

Vandu va Yuda vakamarwa Babilony

(Yer 52:24-27)

18Nawe nniini wa vasikari, kakurika Seraya, nkohani nniini, ando amwi na Sefani, nkohani va kavii, amwi na vasikari vararu va isalala kishikony, 19na kulya muriny kakuvika-fo nndu umwi, emmba mwiisalallya vandu veekapana fira; na vandu vengyi varaanu nnang'ani ya vandu valya venkaa na mangyi ngyama ta mangyi valekooywa kulya muriny, na mwiireiya mbony ta ulya mwiisalallya vasikari va fira, yeto mwiireiya yeekyena lya vandu woose, na vandu vengyi makumi arindaru valya valekooya yefo muriny. 20Nawe Nebusaradani nniini wa vandu valya woose kavakamara kaveende kwa mangyi ya Babilony kulya Ribla. 21Nawe mangyi ya Babilony kavakaba kutani vafwa kulya Ribl, urukeny lwa Hamati. Nalyo Vayuda vakakamarwa mifungwa wooka urukeny lwawo.

Gedalia Gafana wa Yuda

(Yer 40:7-9; 41:1-3)

22Naasa vandu valesaa kulya urukeny lwa Yudaya, Nebukadresa, mangyi ya Babilony, kavika-fo Gedalia mwana wa Ahikamu mwana wa Shefani nave nshilyi waawo. 23Naasa vaniini woose va fira na vandu vawo vekiita sheelyi mangyi ya Babilony ammbika Gedalia nshilyi, vakeenda kwa Gedalia kulya Mispa; na vandu veenda-fo ni yeva; Ishmaeli mwana wa Nethania, na Yohanani mwana wa Karea, na Seraya mwana wa Tanhumethi Mretofa, na Yesania mwana wa Mmaaka, wona vandu vawo. 24Na Gedalia kavalyiiya mboo wo vandu vawo, kavavia, “Mulaereye kimaruma kya mashinga a Vakaldayo-fo; kyevaa kisha mmwasi mukaa kunu urukeny yelu mwiirundya mangyi yei ya Babilony.” 25Kwiikee mwiiri wa mfungare Ishmaeli mwana wa Nethania; mwana wa Elishama, umwi wa mmba ya kimangyi, amwi na vandu vengyi ikumi, vakaolokya Gedalia vakakankaba kutani afwa, we na Vayahudi na Vakaldayo valya vekee nawe kulya Mispa. 26Vandu woose vakakwiipo-fo vandu vaniini, na valya woose veesalallya fira, vakeenda Misri; kimaruma kya yeeraya Vakaldayo.

Yehoyakini alekeyo ooka kyiifingyin

(Yer 52:31-34)

27Kwiike mwaaka wa makumi araru na mfungare ukya Yehoyakini ansamiswa, mangyi ya Yuda, kwikee mwiiri wa ikumi a kavii, nkonu makumi avii na mfungare, Evil-merodaki, mangyi ya Babilony, kwikee mwaaka wa mbee wa ushilyi lwakwe, kaseleesa Yehoyakini, mangyi ya Yuda, Kandemuuta kifingyony. 28Karera nawe marero mesha, kavika kitima kyakwe kya ushilyi uwe ya fitima fyoose fya vamangyi woose yewo vekee nawe kulya Babilony. 29Nawe Yehoyakini kaalasha masara akwe alya a kifingyony, kalya shoonga nawe, mikonu myoose ya muu wakwe. 30Na weesi lwakwe, mikonu myoose mangyi kanniinga, nkonu kwa nkonu, mikonu myoosse ya muu wakwe.

Currently Selected:

2 VAMANGYI 25: MAS2

Highlight

Compare

Copy