2 VAMANGYI 24
24
1Kyeeri kya ushilyi lwa Nebukadresa mangyi ya Babilony, na Yehoyakimu kava ishinga lyakwe andu a myaaka iraanu tupu kamfuluka. 2Nawe Nndumi Iruva kavika matorito uwe yakwe vekee ni Vakaldayo, Vashami, Vamoabu, na vengi wooka kwa vana va Amoni kavaruma indekaba na iwunndwa uruka lwa Yuda, naambo kikooye itanyika ndesa irero lya Nndumi Iruva lyilekooya irerwa ni kana kya vakisuku vakwe. 3Ni kya dede ngapo yei ilewoya Yuda mmbo ilooka kwa Nndumi Iruva, naambo valakilolywa usangun lwakwe, kimaruma kya ngyulyamari ta Manase, tilya shoose alekooya itana; 4ipuswa samu ta vandu valatiri kimaruma, Yerusalemu shoose ikakwaana samu ya vandu valatiri mbese, nta Nndumi Iruva nalakunde insarya kya ulyamari yelo. 5Naasan mbony ta Yerusalemu shoose tisaaye-fo na tilya shooose aletana, mmbo tilakeshireiye yefo kyitabuny kya mikonu kya vamangyi va Yuda? 6Yohayakini kalala kimwi sha vandeye, na nsero wakwe Yekonia kashillya andu akwe. 7Nallyo mangyi ya Misri nnyesha lyingi ooka urukeny lwakwe-fo, mashika mangyi ya Babilony yenmusoka uruka kupooka kimuren kya Misri kufike mureny wa Frati efyo fyoose mmbo fyekee maakon a mangyi ya Misri.
Yoakimu Mangyi ya Yuda
(2 Fye 36:9-10)
8Yehoyakini mmbo etiri myaaka ikumi na nyanya kyeeri epoka ishillya; kashillya Yerusalemu andu a mieri iraru; na irina lya maye evaangwa Nehushta mfu wa Elnathani wa Yerusalemu. 9Katana findo fikasha mbee ya usangu lwa Nndumi Iruva; fikavka na filya fyoose vandeye vakwe vetana 10Kyeeri kilya varundi va mangyi Nebukadresa wa Babilony vakasaama vakeenda Yerusalemu na muri ukashingillywa. 11Na Nebukadresa, mangyi ya Babilony, kandefika murin yeto alya varundi vakwe venshingillye. 12Na Yehoyakini, mangyi ya Yuda, keebo kyaaaro kafika kwa mangyi ya Babilony, aryani na maye amwi na varundi vakwe; na vaniini va vandu vakwe; na vashilyi vakwe nawe mangyi ya kantira mifungwa kwikee mwaaka wa nyanya wa ushilyi lwakwe. 13Kakamara-fo masaa moose a mmba ya Nndumi Iruva, na masaa moose a mmba ya mangyi kamamanya findo fyoose fya saabu filya Sulemani, mangyi ya Israeli emfisongosikya kulya mmba ya mwiindye ya Nndumi Iruva; ndesa embavasyo ni Nndumi Iruva. 14Kakamara vasero woose va Yerusalemu vasero va kimangyi na valya woose vatiri finya, vafungwa vandu fiku ikumi, vafuru na valya vekaba minya woose nkulesaa-fo kuuta-fo valya vanana deny na vandu valatiri kindo fushu. 15Kakamara mangyi Yehoyakini fika Babilony, amwi na maye wa mangyi, vaka va mangyi na valya woose vetiri ushilyi na ngyama ta mangyi ta uruka lluya wooka Yerusalemu vakarawa Babilony; 16Na mangyi ya Babilony keende urukeny lwakwe vafungwa vandu fiku mfungare vatiri finya, vafuru na valya vekaba minya woose na vandu kyiku vatiri finya ya ikabana fira. 17Na mangyi ya Babilony kavika Mattania (nave mangyi) mwana wa mwanawo ya ndeye wa Yehoyakini, nave mangyi andu akwe kamwalasha irina lyakwe kammbanga Sedekia.
Mangyi Sedekia wa Yuda
(2 Fye 36:11-12; Yer 52:1-3a)
18Sedekia etiri myaaka makumi avii na umwi kyeeri evikwa mangyi, nawe kashillya Yerusalemu andu a myaakaka ikumi na umwi. Maye evaangwa Hamutali mfu wa Yeremia wa Libuah. 19Nawe katana makasha usangun lwa Nndumi Iruva fya ngata ilya sheni ya Yehoyakimu. 20Kimaruma kya mitannyi yeyo Nndumi Iruva kanyafukwa kutani aumbuta deny Yerusalemu na Yuda mbee ya usangu lwakwe. Nawe Sedekia kashelakana-se na mangyi ya Babilony.
Currently Selected:
2 VAMANGYI 24: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
