2 VAKORINTO 9
9
Ngarami kwa siri
1Kya mbony teefurukannya veele nshitiri kimaruma kya imuvia-fo. 2Mashika shiishi shaasa mutiri maako, nkyo nkeemurumisha nakyo kwa vandu va Makedonia, kyeyaamba Akaya mmbo yenkudeesya ando a mwaaka moose, na nrima wany ukaitika vengyi vawo. 3Kyaindi mmbo shileruma vanavama yewo, naambo irumisha lyeru kimaruma kyany lyilave ruu kya mbony yei, mukee mwivereyaa shaasa shileamba. 4Naambo elyi Vamakedonia vashaa neeny neekoya mmwalekudeesya, lulashesuka, (lulaambe nnyeni-fo), lwivikye-u nsia. 5Naasa mmbo shilelollya nkuti shiitike vanavama yeva vasongwe ifika kwany, mupooke ideesya yekyo mulevikya kyaasa uka mbee, kikooye kiiyo, kive sha kiraso, nta kilasheeva kindo kyaniingywa na kififi.
6Kyaindi lyo manyiny irero elyi, nndu mwivaaya fya unyuku mmbo ashuululaa fya unyuku, na ulya avaakkya fya mbora mmbo ashuulula fya mbora. 7Wo nndu natani shaasa anrummbwa efo nriminy wakwe nshi iswa-fo, ao sheelyi aitikywa-fo. Mashika Iruva mmbo awarya yeto aniingya na nrima nkyesi. 8Na Iruva mmbo ashiidimaa imwishura simbo ta wo ngata, naambo neeni kwakooya mutiri imutu lya wo ngata mikonu simu, naambo mwengere deny itana mesha, 9shaasa kyikee kyireiye,
“Mmbo alenyanyata, kasimba vakiva,
usumanu lwakwe lwakaa llung'anu.”
10Na ulya mwaava mbeu kwa yeto mwivaaya, na nkate uve shoonga yakwe, mmbo ashemuniingaa mbeu teevaya neetifumbuta, nawe mmbo asheengeraa fimu fya usumanu lwany; 11mwiivikwaa masimba a findo fyoose muve vandu vatiri maako, kya yeengye Iruva kyaanu kya mashora any. 12Mashika urundi lwa ishora elyi nshi lukeewonisya veele imutu-da, kya filya fivaangye-fo, kyaindi mmbo fikeeva fya pule nnu kimaruma kya fyaanu efyo fyautwa kwa Iruva; 13mashika elyi mukeeswa kya urundi elu, mmbo vakeerumisha Iruva kimaruma kya wiindi lwany kyeendwa ni iirikya Nrumi ya Nsia ya Kristo, na kimaruma kya yaavya yewo findo ando amwi na vandu vengyi. 14Nawo veni, vakatereva Iruva kimaruma kyany, vakamukummbwa neefura kyeendwa ni isarya lya Iruva lyilefumbuka nnu nnang'ani yeeru. 15Iruva naitikiswa, kimaruma kya simbo takwe, lulashidimaa nta irumisha shaasa kikwaani.
Currently Selected:
2 VAKORINTO 9: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
