1 VATESALONIKE 2
2
Urundi lwa Paulo kulya Tesalonike
1Mashika-le vanavama, yeni muveni mwiishi shaasa lulesha kwany, sheelyi nkileva kya ruu-fo; 2kyaindi lwiikimaa ilyiswa ukyiva na itannywa fya kiila, efo Filipi, mwiishi, mmbo lulekaarya yaamba Nrumi ya Iruva ya Nsia kwany, lukaiwaannya nnu. 3Ni elyi wiikimbi lweru kwany lulakee lwa ruu, nta ukasha nta llutiri ntambo-fo.
4Llyo shaasa Iruva alekunda lurambikyo Nrumi ya Nsia neese niindo luyaambaa, nshi sheelyi lukesennya vandu-fo, kyaindi lwikee vandu vasenyaa Iruva yeto aishi mirima yeeru. 5Mashika yese lluleamba marero ekukundisa luveni-fo, neeni mwiishi indo, nta llulerera marero esikya unyuku-fo, nawe Iruva eeshi ekyo. 6Nta lluleruuya nnduma kwa vandu-fo, nta kwany-fo, nta kwa vandu vengyi-fo, elyi lukee varumi va Kristo kive mmbo lwamurovya-fo, 7mmbo luleva vafoo sau efo kwany, lukavaka nde mwiilela vana vakwe muni. 8Neese kiwo lukammuvika nsia indo, lukakunda imuniinga fyoose, Nrumi ya Nsia sanda na mirima yeeru, mashika elyi mukee vakunde veru. 9Mashika-le vanavamaye veru, mmbo mukumbuye kya waataro na ngatara teru, mashika yese mmbo lulerunda mashora kio na nsanyiny naambo lulasheerovya nta nndu na kava vi, kyeeri ekyo lwekee imoongoya Nrumi ya Iruva ya Nsia. 10Yeni muveni mmbo mukee vakureekyi, na Iruva kiwo, shaasa lulekaa kwany yeni mwiirikye, lukee vaarya, va usumanu, lulatiri kyeekumbwa. 11Lyingyi-se shaasa muvekumbuye, shaasa luleikimba wo umwi waany shaasa nde wa vana aikimba vana vakwe muni, lukamutumarisa, lwiimukureekyaa neemwitika; 12naambo yeni mukooye ikaa shaasa kimusumanyi mbee ya Iruva, yeu amuvaangye naambo mwaange umanginy lwakwe lwa itumbe.
13Kikeeny indo yese mmbo lukee yaana Iruva kulaifo ideerya mashika uka kyeeri mulewonisa irero elyo lya Nrumi shisha lya Iruva lyuuka kweru, nshi mulelyiwarya lyiikee ni irero lya vandu-fo, mmbo mulemanya ni irero lya Iruva, na niindo lyikai dede deny, lyikarunda mashora nnang'ani yaany yeni mukusirye-u. 14Mashika yeni vanavama veru mmbo mulelatya siri ta Iruva ta Uyuda, kwi Kristo Yesu, mashika naakwa ni yeni mmbo mulewonisa makyiva yoo meni kyuuka kwa vandu vany, na Vayuda yewo kiwo; 15na mmbo yewo veni valewaa Nndumi Yesu, na vakisuku, vakalusisya neese-da, valatani kyeesenya Iruva nta vandu vengyi, 16vakavelwiima lularere na vandu va masanga naambo vakirwa, vakatana indo kya yaawutya uravi lwawo nkonu simu, lyo unyafi lwa Iruva mmbo luvakaaye fika mafurumyony.
17Lyo ulaalu, vanavama, elyi luraukani neeni ando a kirambo kidu, lyo mmashika elyi lulamulollye, lluraukani nriminy-fo mmbo lulangye nnu imulollya. 18Kyasia mmbo lweekundye isha kwany, ee, yeny Paulo, shilenkunda isha lyimwi na lya kavii, lyo mmbishwa kakukikyisa-u. 19Mashika ivika nsia lyeru, na ifura lyeru, na ureto lwa nsia weru nkyoki? Ndesa nshi yeni mbee ya Nndumi Yesu kufike elyi asheshaa? 20Mashika yeni mmbo mukee itumbe lyeru na ifura lyeru.
Currently Selected:
1 VATESALONIKE 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
