1 VAMANGYI 6

Solomon atana mmba ya Iruva

1Myaaka mayana aana na makumi nyanya ukya vana va Israeli vamma yuuka ushingeny Misri llyo Solomon alepooka itana mmba ya Iruva. Eto wekee ni mwaaka wa kaana ukya Solomon ammbe mangyi ya Israeli wikee mwiiri wa sifu, nto mwiiri wa kavii. 2Mmba eyo mangyi Solomoon eketannya Iruva-munifinya mmbo yetiri waasha lwa mita 27, ivari lya mita 9, na mita 13.5 yeenda uwe. 3Ando kwekaa yoo sebuleny mita 4.5 na usangu lwa mmba eyo lwekee mita 9. 4Kavika-fo matirisha maniini efo ki-poo na matirisha madu efo ki-mmba. 5Katana ngo iringitya mmba shoose ta ivangisa isimamba lya poo; keengera-fo na firya fya poo taari shoose. 6Firyafilya fya sumbai fileengarwa efo mmba eyo fyeetiri mita 2.25 na korofa ilya ilesorya yetiri ivari lya mita 2.75, na korofa ilya ya uwe deny yetiri ivari lya mita 3. Korofa eto mmbo tetiri isimamba kilasha na yeto lwasorya lukewalusiise naambo boriti teesika mmba filashekutira na isimamba lya mmba. 7Nkweifo kikoringo kyeeri mmba eyo yeketanwa-fo mashika mawe a mmba emma ipashwa na idesyo deny kyeeri ekesumwa na yuumbywa. 8Mwaango va yaanga efo kwasi ya mmba eyo mmbo wekee mmbike taari ya kwasinde. Kweifo na fitere fyesaama fika korofeny ya kavii na ya kararu. 9Kweekyo mangyi Solomon katana mmba ikasya. Ni fyeeko fya mbau ta merwsi teetannyi kai kavayo. 10Katana korofa aleringitya isimamba lya poo wo kiria kimwi kitiri waasha lwa mita 2.25 yeenda uwe. Nafyo fikalunngyo na fyeeko fya ta meresi efo mmba niini. 11Kyeeri yekyi nrumi ikasha kwa Solomon yuuka kwa Iruva Munifinya ishaamba 12“Kwakooya kushaarannya na ilatya mavavaso akwa mmbo nshekutannya filya shemmarya ndoo we Davidi. 13Mmbo nshekaa nnang'ani ya vandu vakwa Israeli kunu mmba yei kukeishitannya nta nshishemuraa-fo” 14Nawe Solomon kamarisya mmba ya Iruva.

Ishopa Mmba ya Iterevya efo Kimmba

(2 Fye 3:8-14)

15Efo mmba ya Iruva kwekee kukapyo mbau ta mieresi kupookya sumbai kufike alya kai uwe; na koose kavika-fo mbau ta miboroshi. 16Kiria kya nnang'ani kilya kivangwaa ando Kweele mmwasi kyo kikatannyo yoo numa ya mmba ya Iruva. Nakyo kyetiri mita kyeenda waasha kikaawa na mbau ta mieresi kupookya si kufike alya uwe kai 17Kiria kilya yoo mbee ya ando alya Kweele mmwasi kyetiri waasha lwa mita ikumi na nyanya. 18Mbau tilya shishope tikasikya isimamba lyoosee kulalollyo nta iwe yimwi. 19Efo nnang'ani ya mmba ilya kashetana-fo kiria andu kuvikwaa isanduku lya Nndumi lya kyaasa. 20Kiria ekyi kyetiri iwari lya mita kyeenda, na mita kyeenda yeenda uwe na mita kyeenda waasha nakyo kikashopwa na saabu efo mmba koose alya ando eerasya kasongosyau na mbau ta mieresi. 21Efo mmba nnang'ani kukashopwa na saabu, mise ya saabu ikavikwa alya mwaangony wa yaanga neefo kirieny kya nnang'ani, nakyo kikaveva kishope na saabu. 22Efo mmba koose mmbo kwekee kushope na saabu, sanda na alya kukee kweele Mmwasi. 23Kasongosia mafwanu avii atiri waasha lwa mita 4.4 na maaru avii wo lyimwi kandeavika alya ando kweele mmwasi. 24Wo yaaru lyimwi lyetiri mita 2.25 na yaaru kufikye yaaru lya kavii yoo nnang'ani kukakaa-u mita 4.5. 25Ifwanu lyimwi lyetiri waasha lwa mita 4.5 mafwanu moose avii akaveekuvaka ukaveva na waasha lukuvakye. 26Ifwanu lyimwi lyetiri waasha lwa mita 4.5 na elyo lyoingyi likaveva na waasha elo weni. 27Mafwanu alya akavikwa mapaleny alya ando kweele mmwasi, na yaaru lya wo lyimwi lyikashekupaana na lya lyingyi. Na maaru yoo engyi avii wo lyimwi lyikapaana isimamba lya mmba. 28Mafwanu yoo moose eke avii mmbo ekee mashope na saabu. 29Efo mmba koose kukashopwa na mafwanu akee mapashe atiri maaru, myaangashi na fivaro fikevaa. 30Na efo sumbai wo kiria kukaambwa-fo saabu. 31Myaango ivii ikee milungye amwi nayo ikee misongosye na mbau ta miseituni, ukava nto mwaango nniini weyaanga alya ando kweele mmwasi. Kisikiti kya vayo kikalemwa sha nsoori. 32Myaango yavayo ikashopwa na maaru a mafwanu akee malemmyi, amwi na maangashi na fivaro nafyo fyoose fikafinikwa na saabu. 33Mwaango weyaanga efo kiryeny kiniini ukasongosyo na mbau ta miseituni. 34Kweifo myaango ivii yeekushya ikeemisongosye na mbau ta miberoshi. 35Ikashopwa na maaru malemyi a mafwanu, myaangashi na fivaro nafyo foose fikashopwa na saabu. 36Ikatanwa-fo ngiri ya nnang'ani ikee shiringitye na isimamba taari shoose, amwi na kisikiti kyaasha kya mawe kyaasha akee maale-si. 37Nsuka wa mmba yei ya Iruva-Munifinya mmbo wetanwa mwiiri wa Sifu wikee mwaaka wa kaana kyeeri kya ushilyi lwakwe. 38Kwikee mwiiri wa nyanya, mwiiri wa Buli, wikee ni mwaaka wa ikumi na lyimwi ukya mangyi Solomon antira ushilyi; nayo mmba ya Iruva ikasia itanwa ndesa kyekee kideesye. Nawe Solomon keepo myaaka mfungare itana mmba eyo.

Currently Selected:

1 VAMANGYI 6: MAS2

Highlight

Compare

Copy