1 VAMANGYI 5

Solomon Akudessya Itana Mmba ya Iterevya

(2 Fye 2:1-18)

1Nawe Hiramu mangyi ya Tiro mbuya ya Davidi, ekiita sheelyi Solomon ammbikwa mangyi ando a ndeye kanrumya varundi vakwe. 2Nawe Solmon karumya Davidi nrumi yei: 3Kwiishi sheelyi nde-yaakwa Davidi nnyeidima itannya Iruva-Munifinya, Iruva wakwe mmba ando kwa imwiindya, kimaruma kya fira ya mikonumiingyi, kutani llya Iruva-Munifinya alemwiidimisya ivinga. 4Indi ulaalu Iruva-Munifinya, Iruva wakwa mmbo ashiwonisya ufoo taari shoose. Nshitiri-se ukyiva nta nkiduva-fo. 5Ni kuti shitannyi Iruva-Munifinya, Iruva wakwa mmba ya mwiindye. Ndesa Iruva-Munifinya aarya kyaasa ndeye-akwa kaamba: “Nsero wafo yeto shishembika kiriny kyafo kya umangyi mmbwe yeto asheshitannya mmba!” 6Ulaalu vavasyany, vandu vafo vandeshimannya mieresi ya Lebanoni, na vandu vakwa vashesanga nawo efo mashoreny yoo, na yeny mmbo shivataa weesi lwawo ndesa kushaamba. Kimmba vandu vakwa valashiidimaa irunda sha Vasidoni.” 7Llya Hiramu aleeta mbony yei ya Solomon kafura nnu, kaamba, “Iruva-Munifinya narumishwa elyi aleniinga Davidi mwana atiri urango naambo ashillye uruka elu uniini indi.” 8Naasa, Hiramu karikya Solomon nrumi, kammbia, “Shammiita nrumi yafo, ndesa kwaamba ni indo shikutannya kuwonise mbau ta myeresi, na ta miberoshi. 9Vandu vakwa mmbo vashiinga makongo ooka Lebanoni, ekee mafinge vandeeolota efo yeeveny vakweengye vafite yoo ando kukundye. Nafo vandeaporomwa neewe kundeawarya. Kindo kutana kwakwa yewe ni ishiniinga shoonga ya vandu va kyeny kwakwa.” 10Naasa Hiramu kaniinga Solomon mbau tilya shoose eekundye myeresi na miberoshi; 11nawe Solomon kaniinga Hirami madeve mayana avii na aana a nganu na mafura mesha madeva mayana avii wo mwaaka fiikee ni shoonga ya vandu va kwakwe. 12Naasa Iruva-Munifinya kaniinga Solomon Urango uniini ndesa alemwaarya kyaasa. Kukava-fo Ufoo nnang'ani ya Solomon na Hiramu vakalya mma nnang'ani yaawo. 13Mangyi Solomon kasangirya vandu fiku makumi araru wooka uruka lwa Israeli vasherunda mashora a nsarakambo. 14Kavika-fo Adoniramu ave mwisalallya vandu ewo. Kaava matorito araru a vandu fiku ikumi wo kyimwi, kavavika mashoreny veshaallya makamba mwiiri umwi vakarunda Lebanoni na miiri ivii vakarunda kyeny kwawo. 15Solomon etiri vandu fiku makumi nyanya vepasha mawe na vengyi fiku makumi mfungare veiinga. 16Kavika-fo vengyi fiku firaru na mayana araru vakava vesalallya mashora yoo. 17Mangyi kavavasya vasume na ipasha mawe maniini a itana nsuka. 18Ni indo vetana mmba Solomon na Hiramu sanda na vandu na Gebali valedeesya mawe na mbau ta itana mmba yeyo.

Currently Selected:

1 VAMANGYI 5: MAS2

Highlight

Compare

Copy