1 VAMANGYI 18

Elia na nkyisuku wa Baali

1Ando a mikonu miingyi irero lya Nndumi Iruva lyikasheya Elia, kwikee mwaaka wa kararu, lyikaamba, Enda kundekoora kwa Ahabu, na yeny shisheendee mmbwa uwe ya uruka. 2Naasa Elia kakwiipo naambo nandekoora kwa Ahabu. Nakulya Samaria kweifo shaa shiniini. 3Ahabu kavaanga Obadia, nndu mwiisalalya mmba yakwe, (nawe Obadia eke nndu mwiindya Nndumi Iruva, nnu. 4Mashika Yesebeli mmbwe ewaa vakisuku va Nndumi Iruva, Obadia katafura-fo vakisuku iyana kavasuruma mbangeny makumi araanu kavaniing Ya-fo shoonga na mura). 5Ahabu kavia Obadia, Ira urukeny, kundo kukee ngyusoka toose ta mura, na fimira fyoose, kishiidimaka lukooye kundo kutiri mare ainiinga furasi na mishungu yei ilashefwa lusaa ruu. 6Naasa vakaava uruka kavii naambo vaidimi yiira wo ando; Ahabu keenda kyakwe shia muni, na Obadia keenda kyakwe shia yakwe ingyi we muni. 7Ate! Obadia efo ashendaa, kakwaanannya na Elia, Kammanya, kawa-si kifulifuli mbee yakwe, Wooi! Ni yewe nndumi wakwa Elia? 8Kammbia; Ni yeny. Enda kwandevia nndumi wafo llate Elia eefo. 9Kammbia, a kyokyi shalyamara ishinga lyafo kutani kwandeshivika maakony a Ahabu nashiwaa? 10Ni dede kya dede kimmba Nndumi Iruva, Iruva wafo eefo na muu, nkwiifo isanga nta umangyi kulaore nndumi alenruma vandu vakuruuye kundo kukai-fo, na ndesa valeamba Nkwalelollyo, ni indo alevia mangyi llwa na isanga llya sheelyi nkulelollyo-fo. 11Llate neewe ulaalu kwaamba endevia nndumi wafo Elia eefo. 12Na mmbo kivaa elyi shikwipoo mbee yafo ulaalu, mumuyo wa Nndumi Iruva ashekwiipoo nakurwaa kundo shilaishi, neelyi shishenaa shindevia Ahabu nawe nakuture mmbo ashiwaa indi-lyo yeny ishinga lyafo mmbo shiindyaa nndumi Iruva ikya ukoo lwakwa. 13Ale! Nndumi wakwa kulevyo-ndi filya shiletana llya Yesebeli alewaa vakisuku va nndumi Iruva? 14Ngata shilesuruma vakisuku va nndumi Iruva mbangeny iyana, makumi araanu, shavaniinga shoonga na mura? Neewe ulaalu kwaamba; enda kundevia nndumi wafo, Elia eefo, naasa mmbo ashiwaa. 15Elia kaamba, Ni dede kya dede, Nndumi Iruva wa matorito eefo na muu, eto shiifo shiindundyaa, ni dede mmbo shikoora mbee yakwe inu. 16Naasa Obadia keenda ilollya Ahabu, kammbia, nawe Ahabu kakwipoo andekwaanya na Elia 17Ndesa Ahabu alelollya Elia, Ahabu, kammbia, Ate! Ni yewe, Yewe mwisisa Israeli? 18Nawe kammbia, Nshi yeny shilesisya Israeli-fo, indi ni yewe na ndeyaafo, llya muleisityo-u mavavaso a-Nndumi Iruva, neewe kwalatya maruva a wongo. 19Naasa ulaalu shivaangya vandu kuumbye vandu va Israeli woose kulya ifumbuny lya Karimeli, na vakisuku valya va Baali mayana aana na makumi araanu, na valya va Ashera mayana aana valya valyee shoonga meseny ya Yesebeli. 20Naasa Ahabu karuma vandu kwa vana va Israeli woose, kaumbya vakisuku ando amwi kulya ifumbuny lya Karimeli. 21Naasa Elia kasalala kufii na vandu woose, karera kaamba, “Mmutirwaa nnyinyira nnag'ani ya makusaro avii kufikeindii? Kimmba Nndumi Iruva mmbwe Iruva llatyeny mmbwe; indi kyasia kwakooya Baali mmbwe Iruva llatyeny mmbwe.” Vandu valya vakassyado sau. 22Naasa Elia kavia vandu, ni yeny nkisuku wa Nndumi Iruva shilesaa-u; Indi vakisuku va Baali ni vandu mayana aana na makumi araanu. 23Kweekyo shiniingeny ng'umbe ivii, wo vasauwe u imwi vaimamanye na ivika uwe ya ngwi lyo valaate muro-fo, na yeny shisongosye ng'umbe eyo ya kavii, neivika uwe ya ngwi lyo shilavikaa muro sumbai ya vayo. 24Neeni mutereve kwa irina lya iruva waany, na Yeny shitereve kwa irina lya Nndumi Iruva, Iruva yeto ashoolota muro, ave mmbwe Iruva. Vandu woose vakaamba marero yaa ni mesha. 25Elia kavia vakisuku va Baali, sauweny-u ng'umbe imwi eni mbele kimmba mukee veengyi, naasa muvaange iruva eto waany, lyo mulasheyaata muro-fo. 26Vakavika ng'umbe ilya yaawo uwe ya ngwi, vakavaanga kwa irna lya Baali ukya ngama fika nsanyiny, veshambaa, “Woi Baali kulwaaranyi-dwa.” Indi kulave-fo unyanga nta kirouwo. Nawo vakashongashonga uwe ya kitara kilya kya irasya. 27Kwiikifika kyeeri kya taari ya nkwaany, Elia kavakapa manganga kavavia, Mmbaangeny kwa unyanga waasha, mashika eto ni iruva, kishiidimika eefo areraa na vandu vengyi, ao atiri mashora meengyi, ao akee kyaarony, ao alele rony, kuti mumwaante. 28Vakakapa kyoorongye, vakakumamanya na fyaandu na nyeembe ndesa kikee miishivye yaawo kutani samu yashoshoka. 29Kutani kwafika kyeeri kya nkwaany kuleefo kirouwo, nta unyanga nta nndu akeesara kyawo. 30Naasa Elia kavia vandu woose, Oshony na kufii, Vandu woose vakallatya, Kareiya kitara kya irasya Nndumi Iruva. 31Elia kasangirya mawe ikumi na avii kwa meekyena a vana va Yakobo, ulya alesheyo ni irero lya Nndumi Iruva kavyo irina lyafo ni yewe Israeli. 32Nawe kasongosya kitara kya irasya na mawe yoo kwa irina lya Nndumi Iruva, kasuma nsuka wamaa iletya mbeu sha madeve avii aleringitya kitara kilya. 33Naasa kaala-fo ngwi tilya kamamanya ng'umbe ilya fyenga-fyenga, kaivika uwe ya ngwi. Kaamba, Ishureny mura mapiipa aana mukaletya efo uwe ya kiraso kyeekora, uwe ya ngwi. 34Kaamba letyeny lya kararu, Vakaletya lya kararu. 35Mura ulya ukaishwa nsuka iringitya kitara kilya kya irasya. 36Kikafika kyeeri kya iniingya kiraso kya nkwaany, Nkisuku Elia kaserikya kufii, kaamba, Woi Nndumi Iruva wa Abrahamu, na wa Isaka, na wa Israeli, inu kimanyike sheelyi yewe mmbwe Iruva kunu Israeli na yeny ni ishinga lyafo, efi fyoose mmbo shafitana kwa irero lyafo. 37Woi Nndumi Iruva kushaarannye, kushaarannye naambo vandu eva vamanyi sheelyi Yewe mmbwe Nndumi Iruva, mmbwe Iruva, na lyingyi vamanye ni yewe kwavaalasha mirima yaawo vakwaalukye yewe. 38Llyo muro wa nndumi Iruva ukaoloka, ukamamita kiraso kilya kyeemamitwa, na ngwi, na mawe, na kilulyi, muro ulya ukakomba-u mura ulya wekee kulya nsukeny. 39Na vandu woose vekalollya vakawa-si kifuli-fuli, vakaamba, Nndumi Iruva, mmbwe Iruva, Nndumi Iruva mmbwe Iruva. 40Elia kavavia Tireny vakisuku ewo va Baali, alaashuke nta umwi; Vakavatira, na Elia kavakamara kafika kulya kimureny kya Kishoni, kandevawaiya-fo.

Masiyyony a mwi nyaasi

41Nawe Elia kavia Ahabu, Naasan! Kwiipo kwalya, kuni, mashika kwiitiwa Yoona iniini lya mmbwa. 42Naasa Ahabu kakwiipo naambo nalye na ina. Na Elia kasaama kaalukya uwe ifumbuu lya Karmeli kandeindya-fo Iruva; kakapa kifuli-fuli kafika-si. 43Kavia ishinga lyakwe, Ulaalu saama kwalola taari ya Yeeve. Kasaama, kalola, kaamba nkwiifo kindo-fo. Nawe kammbia enda lyingyi ka matorito mfungare. 44Lyikifika ka-mfungare kaamba, shilolye ifishi kulya Yeeveny nalo lyifye sha kidau kya woko lwa nndu. Karera kaamba endavia Ahabu Vaitike mmbwa ilashenkooya imwiimi yooloka. 45Na llya yeni-da ngina ikafwana shuu mafishi na uraato fikaende mmbwa shiniini nnu. Ahabu kasaama ikariny keenda Yezreeli. 46Woko lwa Nndumi Iruva lwekee taari yakwe Elia kakwiishava kyuumi kaangusya kakooya ifika kulya Yezreeli kulare Ahabu amfika-fo.

Currently Selected:

1 VAMANGYI 18: MAS2

Highlight

Compare

Copy