1 MBONY TA FYEERI 23

1Kyeeri Davidi afika ukuuny deny, kasaelesa Solomoni nsero wakwe nave mangyi ya Israeli.

Mashora a Valevi

2Mangyi Davidi kaumbya vasongoru va Israeli woose, na makohani woose va Valevi. 3Kaekyena vomi kupoolya myaaka makumi araru enda na uwe vakafika fiku makumi araru na nyanya. 4Mangyi kasauwa vanndu fiku makumi avii na vaana vasalallya mashora a mmba ya Nndumi Iruva, fiku firindaru vereiyana ilola meekyena a findo fyoose. 5Fiku fiina vandu veringa yefo poo na vandu fiku fiina vengyi, verumisha Nndumi Iruva, vekapa finanda na mbembe, fyoose fikee fideerye kya mashora yoo. 6Davidi kaava Valevi matorito araru kwi ufyari: lwa Kershoni, Kohati na Merari.

7Kershoni etiri vana vavii! Ladani na Shemei. 8Ladani etiri vana vararu: Yehieli, Sethamu na Yoeli. 9Valya vesalallya ufyari va mmba ya Ladani. (Shemei etiri vana vararu: Shelomoti, Hasieli, na Haran.) 10Shemei etiri vana vaana Jahati, Sina, Jeushi, na Beria 11ndesa vawonikye, Jeushi na Beria mmbetiri vana vengyi-fo, kweekyo vakaekyenwa kimwi sha ufyari lumwi.

12Kohati etiri vana vaana Amramu, Ishar, Ebron, na Ussieli. 13Mwana wakwe mbee, Amramu, mbwe ndeye wa Aron na Mose. (Aron we na va mmba yakwe vakava vandu vevikya mbora findo fyoose fyeniingya kiraso kyekora kyeeri kyeiindya Nndumi Iruva, na ivikya vandu mbora kwa irina lyakwe. 14Indi vana va Mose, nndu wa Iruva mmbo vesandwa na Valevi.) 15Mose etiri vana vavii: Kershon na Elieser. 16Nsongoru nnang'ani ya vana va Kershon ni Shebnel. 17Elieser mmbo etiri mwana umwi-nsi wa womi nawe ni Rehabiah, indi-we Rehabiah etiri vandu.

18Mwana wa kavii wa Ishari etiri mwana umwi wa womi, Shelomith, nsaongoru wa ufyari. 19Mwana wa kararu wa Kohath, Hebron, etiri vana vaana; Jerih, Amaria, Jahasiel na Jekameam. 20Mwana wa kaana wa Kohat Ussiel, etiri vana vavii: Mika na Isshia.

21Merari etiri vana vavii: Mahli na Mushi. Mahli nawe etiri vana vavii; Eleasar na Kishi 22indi Eleasar mmbo efwa nalatiri mwana nta umwi wa vomi, indi etiri vefu. Vefu yewo mmbo verawa mmabinam vawo, vana va Kishi. 23Mwana wa kavii wa Merari, Mushi, etiri vanavararu: Mahli, Eder na Yeremot.

24Yewo mmbo vana va Levi, kwiilatya wo mmba na ufyari. Na woose mmbo vakee vareiye marina awo. Vakarundya mmba ya Nndumi Iruva kupookya myaaka makumi avii, enda na uwe. 25Davidi kaamba, “Nndumi Iruva, Iruva wa Israeli, aniinga urilalyi vandu vakwe, nawe mmbo ashekaa Yerusalemu llung'anu. 26Kweekyo nkukyiifo-se kimaruma kyekurika yeema yeele na findo fya nnduma-fo.” 27Davidi kavika ishingo lya ireiya vandu woose vanfita myaaka makumi avii kyeeveeta mashoreny. 28Na mashora a vandu yeva akava ni ifurukannya vakohani valya vaukye mmba ya Aron, yefo mmba ya Nndumi Iruva ya nndumwa, na itokopa mmba shoose, na isangya findo fyoose yefo fya nndumwa mweele fya mmba ya Nndumi Iruva. 29Ando amwi na yefyo fyoose vakaniingwa na mashora engyi a idesya mikate myeele, na nswa mmamiri ulatiri ntarang'o, amwi na kiraso kisande na mafura, kikadesywa kikainana shaasa kikundikye, 30amwi na irumisha Nndumi Iruva, wo nkonu, ngama na nkwaany, 31na wo kyeeri kya mapookyony a mwiiri, na mikonu myeele ya Nndimi Iruva, nkyo kyeeri kya yuuta firaso fya imamitwa llyo vevika uramba lwa imanya mmbandu-ki vakundikye wooka yefo kwa Valevi vasheidimaa irunda mashora yoo, wo kyeeri mbee ya Nndumi Iruva. 32Kweekyo ya ng'ng'u ekee mashora a vandu yeva, ilola na itokopa mmba ya mwiindye ya Nndumi Iruva, veshaakanaa na vakohani yewo vaparikye yefo mmba Aron.

Currently Selected:

1 MBONY TA FYEERI 23: MAS2

Highlight

Compare

Copy