Sira 29
29
Okwehoza amabanja n'okugashashura
1Ow'ekisha ahora mutahiwe,
kandi ajuna mutahiwe aba nahikya omuhango gw'Omukama.
2Mutahi wawe k'aina obwetage omuhore,
kandi k'akuhozire orahuke omushashure.
3Ekyo wamuraganisa okigobesheleze,
mara omubere mwesigwa,
nirwo orakwatwaga abantu bakakujuna.
4Abantu abangi okwehoza bakubona nk'okuronda eby'obusha,
baita kubi ababajunire.
5Omuntu nashobora kuramba ondijo emikono
akalemwa akamuhora,
mara aho empiya za mutahiwe ezo tazigambaho muno.
Kandi k'ebiro by'okushashura eibanja elyo bigoba
akelererwa, ayekwatiliza ebi na bili,
anga n'okwo ebiro bili by'akatoga.
6Kimuhora k'alikumutongesa amani,
nangu n'enusu yonkai talikugibona,
mara n'empiya ezo ashusha ayazironda.
K'atamutongire, kihorwa naba azimunyagire,
mara ayeita ahali kimuhora;
amushashura emikeeno n'ebijumi,
asiga kumusiima amwita eibara.
7Aha rw'omutima gubi nk'ogu,
nikyo bangi bangira kuhora abandi,
batina okwija kukolerwa obugobya bw'obushai.
Ekisha
8Omuntu ayemirwe kubi omwegumisilize,
otamukelereza kumushumbusha.
9Ojune omunaku ohikye omuhango,
otamushubyayo ngaro zishai okwo aina obwetage.
10Oferwe efeza yawe aha rwa murumuna wawe
anga mutahi wawe,
kushaga okugileka omw'ibare ekamoma ekafa bushai.
11Eitunga lyawe olikoze
nk'okwo Rukirabyona alikukuhangira,
lilikugasha kukira ezahabu.
12Eby'olikubika omu sitoa zawe
obibiike kubishumbusa abaanaku,
ebyo bilikukiza omu naku zona;
13bilikukilira engabo egumire n'eichumu lihango,
nibyo bilikurashanisiza omubisha.
Okwemelerera omuntu
14Ow'omutima gurungi ayemelerera mutahiwe,
kyonkai omuhwanshoni amugokera.
15Omuntu atalikubera mufura akakwesimbira
okashuba okamweberwa kimoi,
okuba aba ayetaire omu kabi aha rwawe.
16Omuntu omubi agokera ayamwemelereire,
17n'atagira siimi anagirana ayamurokoire.
18Okwemelerera abandi kuraitire abantu bangi
ababaire balige,
kwabachundaigura nk'amayengo g'enyanja;
kwazahisa abantu ab'obushobora,
babungera omu mahanga gatali gabo.
19Omuntu mubi ayetahya omu by'okwemelerera abandi
ahigire amagoba, bamutoijera.
20Hwera mutahi wawe nk'okwo olikushobora,
kyonkai oyelinde otaija okaba nka wenene.
Omuntu okwegilira omwe
21Eby'enshonga aha burora gaba maizi n'ekyakulya
n'ebijwaro, n'enju mbali omuntu wakushobora kwefuba.
22Omunaku ali omu kajuke narorage
kushaga alikulya nangu ekyakulya kirungi
omu maju ga banu.
23Na bike na bingi,
eby'oinabyo obe nibyo osanirwa.
24Burora obulikujunaza
obw'omuntu kuruga nju egi kugya nju ndijo,
mara ahatali mwanyu totengya kanwa.
25Orwo oli omw'ondi noshobora kumunyegeleza abagenyi,
okabagobya n'eby'okunywa;
kyonkai taliho muntu kukusiima,
shana kuhulira ebijumi, bakwese:
26“Ndaara mu ga banu iwe, fuka ekyakulya;
anga k'oraba oina ak'oinako okampe nkalye.
27Rugamu iwe, ndaara mu ga banu iwe,
higiza abantu ab'enshonga,
murumuna wange yaija katutura hamoi;
enju yange ningyetaga.”
28Ebintu nk'ebi omuntu alikwanguha kubona
nibimugumira kubyemera;
omuntu atakuha bwikaro akabukuheza
anga kukuhora mpiya akazikujumisa.
Currently Selected:
Sira 29: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.