Sira 28
28
1Ayehoroza banu nawe Omukama alimwehoroza,
kuba amafuge nagekomya muno.
2Mutahi wawe omugarulire ebyo akushobeize,
aho nirwo orashaba Omukama
naiwe akakugarulira amafu gawe.
3Omuntu agilire ondijo enzigu,
ashube wenene ahige Omukama kumugarulira?
4Aburwe kugarulira omuntu nka wenene,
ashube ashabe Omukama kumugarulira entambara eze?
5Wenene k'ali muntu akashuba akagira enzigu,
amafuge galyatilirw'ohai?
6Oijuke okwo olihwaho olekere okugira enobi,
oijuke okwo olifa okajunda,
obe mwesigwa okwate emihango.
7Oijukeyo emihango, kandi otanigalira mutahi wawe;
oijukeyo endagano ya Rukirabyona,
n'ebyo barakufakalira otabifaho,
nshonga y'obutamanya bwabo.
Empaka
8Oyelinde okuhankana, aho oralebesa amafu;
kuba omuntu arahuka kunigara aimukya empaka.
9Omuntu omubi atabangura abali banywanyi,
abaina emilembe abatejanyia emitwe.
10Okwo enkwi z'okuhemba zili zingi
nikwo n'omuliro gugira amani;
okwo obusikizi bw'empaka buli,
nikwo n'omushango kugira amani;
amani g'omuntu ainago n'ekiniga nikwo kiba kingi,
okwo omuntu atungire nikwo ekinigakye kukanya.
11Enkungana y'obwangu eimukya endwano,
kandi omuntu arahuka kuhankana aita abantu.
12K'orahuha enshasi, erayaka;
k'oragichwera, erarara;
mara byombili nibiruga omu kanwa kawe.
Okwelinda orulimi
13N'akaraamwe ow'orunwa agamba ebishuba,
aha rw'okuba arakambuliire bangi
ababaire baina emilembe.
14Okubeiyelera banu kuratengesize abantu bangi
kwabatataamisa,
baruga ihanga eli basingirwa ihanga lindi;
kwarandura ebigo ebyabaire bigumire.
15Okubeiyelera banu kurabingisize abakazi emanzi,
kwabaanagisaho ebirungi ebyo bahendekeire.
16Wena ata omutima aha kubeiyelera banu
talibona bwikarage,
kandi talibona buturo kugira milembe.
17Orushanju karutera, rutera kushai,
kyonkai orulimi karutera rushekenyura amagufa.
18Bangi baragwire aha bwogi bw'embanda,
kyonkai ti bangi nk'abaraisirwe rulimi.
19Muberwa owo rutakahutazaga;
muberwa owo rutakanigaliraga;
muberwa owo rutakaleteraga nsika,
muberwa owo rutakakomaga mpingo.
20Rwonene rukomesa enkomo y'ekyoma,
n'empingo zarwo ziba z'omulinga.
21Rwita omuntu orufu rubi,
hakili kugya Hadesi ataisirwe rulimi.
22Abatina Ruhanga tirubageleera,
omuliro gwarwo tigulibokya.
23Kyonkai abaruga aha Mukama baba bairu barwo;
karubokya tirurazibwa.
Rulibatera nk'entare esindikirwe,
rubatagatagure nk'engoi.
24Eitunga lyawe olizitilire orugo rw'amahwa,
kandi efeza n'ezahabu ogire mbali wazibiika okazikoma.
25Ogire eminzani y'okupimaho ebigambo byawe,
kandi akanwa kawe okateho orwigi n'echomeko.
26Oyelinde orulimi rwawe rutalihena,
atura akuhiga otalija okamugwaho.
Currently Selected:
Sira 28: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.