Ruti 4
4
Obushwere bwa Ruti
1Boazi atemba aha kihigi, ashuntamaho. Leba omunyaruganda empikabubili, owo Boazi yabaire agambire, aija narabaho. Boazi amugambira ati, “Mutahi wange, ija, oshuntame aha.” Aija ashuntama. 2Boazi akwata abashaija 10 omu bagurusi b'ekigo, abagambira ati, “Mushuntame aha.” Bashuntama. 3Agambira omunyabuzare empikabubili ogwo ati, “Naomi ogu arugire omu nsi ya Moabu, yagaruka naguza omwate ogwabaire guli gwa Elimeleki, murumuna waitu. 4Kityo mboine nkikugambireho k'ogugura, omu maisho g'aba abashuntamire aha, n'omu maisho g'abagurusi b'eihanga lyange. K'oraba noguchungura oguchungure; kandi k'oraba otaguchungure ongambire manye, ahakuba taliho ondijo ow'okuguchungura k'atali iwe; inye ninkuruga enyuma.” Omushaija agamba ati, “Inye ndaguchungura.” 5Aho Boazi agamba ati, “Ekiro eky'oragura eitaka elyo ahali Naomi, nochungura na Ruti Omumoabukazi, muka kifa; eitaka elyo libone kwikara lili ly'oruganda rwa kifa.” 6Aho omunyabuzare empikabubili agamba ati, “Tinshobora kulichungura, kuba aho abana bange tibaina kulisika. Orwo inye kulichungura iwe olichungura, inye tinshobora kulichungura.”
7Egi niyo yabaga migilire omu makiro ag'eirai omuli Isiraeli aha kuchungura n'aha kuhinga ekintu. Omu kuhamisa ebigambo ebityo omuntu yajuraga enkaito agiha ondijo. Oku nikwo batebekanisaga ebigambo ebityo omuli Isiraeli. 8Aha rw'ekyo, omunyaruganda empikabubili kayagambire Boazi ati, “Ogugure iwe,” akajura enkaitoye. 9Aho Boazi agambira abagurusi n'abantu bona ati, “Kir'eki inywe muli bajulizi okwo nagura ahali Naomi byona ebibaire bili bya Elimeleki, na byona ebibaire bili bya Kilioni na Maloni. 10Kwakwo Ruti, Omumoabukazi, ayabaire ali muka Maloni namuchungura k'aba mukazi wange, nshobore kugendeleza eibara lya kifa omu ruzarorwe, eibaralye litakuchweka omu banyaruganda n'omu banyakigobe. Kir'eki inywe muli bajulizi.” 11Aho abantu bona ababaire bali aha kihigi, n'abagurusi, bagamba bati, “Tuli bajulizi. Omukazi ogu owo washwera Omukama amushuse Raheli na Lea, abayemire hamoi bakombeka eka ya Isiraeli. Na iwe ogoshoke omuli Efurati, kandi oranganwe omuli Betelehemu. 12Eka yawe eshushe eya Peresi, owo Tamari yazaliire Yuda, aha rw'abana abo Omukama arasinga omukazi muto ogu akakuzalira.”
Boazi na baijukurube
13Kityo Boazi ashwera Ruti, aba mukaziwe. Boazi amanya Ruti, Omukama asinga, Ruti atwara enda, azara omwana w'omwojo. 14Abakazi bagambira Naomi bati, “Asingizibwe Omukama ayakutunga omunyabuzare ow'ahaihi kir'eki. N'eibaralye liranganwe omuli Isiraeli! 15Omwana ogu arakugaruramu akoyo, amare akulise omu bukaikuru bwawe. Aha rw'okuba mukamwana wawe alikukugonza, alikukukilira abana b'abojo mushanju, niwe yamuzara.” 16Aho Naomi akwata omwana, amukikira omu mabere, amulera. 17N'abakazi abatani bamuruka eibara bati, “Naomi azaire omwana w'omwojo.” Bamweta Obedi. Obedi niwe ishe Yese, Yese ishe Daudi.
18Mbwenu aba nibo baijukuru ba Peresi: Peresi niwe ishe Hezironi, 19Hezironi nazara Ramu, Ramu nazara Aminadabu, 20Aminadabu nazara Nahasoni, Nahasoni nazara Salumoni, 21Salumoni nazara Boazi, Boazi nazara Obedi, 22Obedi nazara Yese, kandi Yese nazara Daudi.
Currently Selected:
Ruti 4: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.