1 Samweli 1
1
Elikana n'ekaye
1Hakaba haliyo omushaija omoi wa Ramataimuzofimu, ekigo ky'omu mabanga ga Efuraimu, eibaralye ni Elikana, mutabani wa Yerohamu, Yerohamu eya Elihu, Elihu eya Tohu, Tohu eya Sufu, ow'oruganda rwa Efuraimu. 2Akaba aina abakazi babili; omoi eibaralye ni Hana n'ondijo ni Penina. Penina akaba aina abana, kyonkai Hana akaba atainabo.
3Buli mwaka omushaija ogu yarugaga omu kigokye, agya kufukamira Omukama w'amahe n'okumutambira ekitambo omuli Shilo, mbali batabani ba Eli babili, Hofuni na Finehasi babaire bali bakuhani b'Omukama. 4Kir'ekyo Elikana yatambaga ekitambo, y'ahaga mukaziwe Penina n'abatabani bona n'abahara emishondo. 5Nawe n'orwo yagonzaga Hana yamuhaga omushondo gumoi gwonkai, kuba Omukama akaba amukomire oruzaro. 6Mukaiba yamuhelebuzaga muno kumutamisa aha rw'Omukama kutamuha ruzaro. 7Nikwo byabaga bityo buli mwaka; buli orwo Penina yagyaga Rwensinga y'Omukama amuherebuza atyo. Aha rw'ekyo Hana alira ayanga n'okulya. 8Kyonkai Elikana, iba, yamubazaga ati, “Kubaki ojunaire omutima? Inye tindikukukilira abana b'abojo 10?”
Enshara ya Hana
9Kabamazire kulya n'okunywa omuli Shilo, Hana aimuka. Omu kanya ako Eli omukuhani akashangwa ashuntamire aha kitebe omu kishasi kya Rwensinga y'Omukama. 10Omukazi ogwo akaba ajunaire muno. Ashaba Omukama mara alira muno. 11Aragana ekiragano ati, “Waitu Mukama w'amahe, kawakusinga okaleba obushasi bw'omuzana wawe, okumutunga omwana w'omwojo, nakumukuha oburorabwe bwona, n'orumoiso tirwakumugya aha mutwe.”
12Kayabaire akyashaba omu maisho g'Omukama, Eli akaba amulebire aha munwa. 13Hana akaba nagamba aha mutima, eminwa neyetengya yonkai, n'eirakalye likaba litalikuhulirwa. Aha rw'ekyo Eli akamulenga nk'omukazi atamiire. 14Aho Eli amugambira ati, “Oragobahai n'etamiiro? Tamuruguka.” 15Kyonkai Hana amuhorora ati, “Chei, mukama wange, inye ndi mukazi omujune muno; tinkanyoire divai anga marwa gona gona; shana nayanjulira Omukama ebindi aha mutima. 16Omuzana wawe otamulenga mukazi ataina mugasho. Amashoberwa gangi n'obujune ebyo nyinabyo nibyo byangabisa kuhika mwaha.” 17Aho Eli amuhorora ati, “Ogende n'emilembe, Ruhanga wa Isiraeli akutunge ekyo wamushaba.” 18Nikwo Hana kugamba ati, “Waitu bagilire omuzana wawe ekisha.” Akwata omuhanda agenda, alya, mara obujune tibwamubonekireho rundi.
Samweli nazarwa mara nahongerwa Omukama
19Elikana n'ekaye baimuka bwankya karai, bafukamira Omukama ahanyuma bagaruka omuka Rama. Elikana amanya Hana mukaziwe, mara Omukama amwijuka. 20Obukiro kabwagobire, Hana atwara enda azara omwana w'omwojo, amuruka eibara amweta Samweli, nagamba ati, “Mushabire Omukama.”
21Elikana ashuba agenda n'ekaye yona kutambira Omukama ekitambo kya buli mwaka, n'okuhikya ekiraganokye. 22Kyonkai Hana tiyagiireyo. Akagambira iba ati, “K'omwana alimara kuchuka, ndimutwara Rwensinga y'Omukama atulireyo kimoi.” 23Elikana iba amugambira ati, “Kora okw'olikwenda, linda ogobe aha kumuchukura, mara Omukama agobesheleze ekigambokye.” Omukazi asigara, mara ayonkya omwanawe, kuhika orwo yamuchukwire. 24Kayamazire kumuchukura amutwara n'enumi y'emyaka eshatu, n'ensano ekilo 10 n'enshaho y'edivai. Amutwara Rwensinga y'Omukama omuli Shilo, mara omwana akaba akyali muto. 25Aho kabamazire kwita enumi, omwana bamutwalira Eli. 26Hana agambira Eli ati, “Waitu mukama wange osingire, n'inye mukazi ayabaire ayemeleire haihi naiwe ninshaba Omukama. 27Omwana ogu niwe nashabire. Omukama antungire ekyo namushabire. 28Mbwenu nanye namumuhongera oburorabwe bwona; abe nyehonge y'Omukama.” Aho bafukamira Omukama.
Currently Selected:
1 Samweli 1: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
