Ruti 1
1
Elimeleki n'ekaye nibafurukira Moabu
1Omu makiro ag'abaramuzi babaire nibatwara, hakabaho eifa lingi omu nsi. Omushaija omoi owa Betelehemu eya Yuda afurukira omu nsi ya Moabu, wenene na mukaziwe n'abatabani babili. 2Omushaija ogwo eibaralye ni Elimeleki, na mukaziwe ni Naomi, kandi abatabani bombili amabara gabo ni Maloni na Kilioni. Bakaba bali Baefurati ba Betelehemu eya Yuda. Bagenda omu nsi ya Moabu, baba nimwo baikara. 3Kyonkai Elimeleki, iba Naomi, afa; Naomi asigara n'abatabani bombili. 4Aba bashwera Abamoabukazi. Omoi eibaralye akaba ali Oripa, n'ondijo ni Ruti. Baturayo nk'emyaka ikumi; 5mara bombili, Maloni na Kilioni, bafa; kityo Naomi aferwa mushaijawe n'abatabani bombili.
Naomi na Ruti nibagaruka Betelehemu
6Aho Naomi aruga Moabu hamoi n'abakamwana, aha rw'okuba akaba ahuliire akyali Moabu okwo Omukama yabaire ahabukiire ab'owabo, akabatunga ebyakulya. 7Aruga mbali yabaire ali hamoi n'abakamwana bombili; bakwata omuhanda bagaruka omu nsi ya Yuda. 8Kyonkai Naomi agambira abakamwana bombili ati, “Mugende, inywembili buli omoi agarukire nyina. Omukama asinge ababere nk'okwo mubeleire aba abafire, nanye. 9Omukama asinge abatunge amaka, buli omoi ashube abone omushaija, agire eka.”
Aho abanywegera, kandi bonene balira muno. 10Bamugambira bati, “Chei, ichwe turagenda na iwe omu bawe.”
11Kyonkai Naomi abagambira ati, “Bana bange, mushubeyo, mutampondera. Inye nkyazara abojo abandi ab'okwija kuba baibainywe? 12Mushubeyo, bana bange, mugende, ahakuba inye nakaikwire muno, tinkishwerwa. Nangu n'orwo nakugira nti nyina eshubi, n'orwo nakushwerwa omushaija omu kiro omu nkazara abana b'abojo, 13mwakulinda kuhika orwo balikura? Mwakwetanga kushwerwa? Chei, bana bange, nimbashasibwa muno munonga kubona okwo Omukama anshasize.”
14Aho bonene bashuba balira muno. Oripa anywegera nyinazara, kyonkai Ruti amwezingelera. 15Naomi agamba ati, “Leba, mukabaro yashuba omu babo n'ahali baruhangabe. Na iwe oshubeyo, ohondere mukabaro.”
16Kyonkai Ruti agamba ati, “Otantagiliza kukusigaho anga otantanga kukuhondera. Aha rw'okuba mbali oragya niyo ndagya, na mbali orashura niyo ndashura. Abawe nibo baraba bange; kandi Ruhanga wawe niwe araba Ruhanga wange. 17Mbali oligwa, nanye niho ndigwa, mara honene aho niho ndiziikwa. Kahalibaho eky'okuntaishurana naiwe, rutali rufu, Omukama ambonabonyie ambonabonyize.”
18Naomi kayaboine okwo Ruti yamaza kugenda nawe, tiyagambire bindi.
19Kityo bombili batamu, balemwa bagoba Betelehemu. Kabagobire Betelehemu, ekigo kyona batangara kubabona; abakazi bebaza bati, “Ogu ni Naomi?”
20Abagambira ati, “Mutanyeta Naomi#1:20 Naomi Nikwo kugamba “Kokunura.” munyete Mara#1:20 Mara Mara nikwo kugamba, “Rushalira.”, Rushoborabyona anteize enaku ezitali za kugambwa. 21Nkagenda nyijwize, kyonkai mbwenu Omukama yangarura ntaina kantu. Kubaki munyete Naomi, okwo Omukama ambonabonyize, Rushoborabyona anteize enaku?”
22Nikwo Naomi yagarukire atyo, na Ruti, Omumoabukazi, omukamwana, nibaruga omu nsi ya Moabu. Bakagoba Betelehemu omu mbandizo y'eigesha ly'eshayiri.
Currently Selected:
Ruti 1: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.