Abaramuzi 21
21
Isiraeli nayefunya aha rwa Benjamini
1Kandi Abaisiraeli bhakaba banahiire bali Mizipa bati, “Omuli ichwe thaliho n'omoi alisiigira Mubenjamini muhara.” 2Abantu baija Betheli bashuntama aho omu maisho ga Ruhanga kugoba bwaigoro, balira muno n'obushasi bungi. 3Bagamba bati, “Waitu Mukama Ruhanga wa Isiraeli, eki kyaija kitai omuli Isiraeli, oruganda rwa Benjamini kir'eki ruraliire kuchweka omuli Isiraeli!” 4Bukeire abantu baimuka karai, bombekaho elutare, bahonga ebihongo by'okwokibwa n'ebihongo by'emilembe. 5Abaisiraeli bagamba bati, “Ni rugandaki omu nganda za Isiraeli orutaizire mu nteko omu maisho g'Omukama?” Omu kugamba batyo hakaba banahiire muno okwo omuntu atakugiire Mizipa aha Mukama bamwite. 6Kyonkai Abaisiraeli abo ahanyuma bagilira Ababenjamini barumuna babo embabazi, bagamba bati, “Kir'eki oruganda rumoi rwachweka omuli Isiraeli. 7Mbwenu tugire tutai kuha abaruhonokireho abakazi orwo tunahiire obuso bw'Omukama okwo tutalibasiigira bahara baitu?” 8Bashuba bati, “Ni rugandaki omu nganda za Isiraeli orutagiire Mizipa omu maisho g'Omukama?” Baija bamanya okwo Yabeshigileadi thaliho n'omoi yaizire mu rusisira aha muterano. 9Kuba orwo bahurwize abantu kubabara tibaina wo bashangiremu ali munyansi wa Yabeshigileadi. 10Aho enteko etwekayo abaisherukale bayo emanzi muno 12,000 babaragira bati, “Abanyansi ba Yabeshigileadi mugye mubaise embanda, kwakwo n'abakazi n'abana. 11Mukore muti: Buli mushaija na buli mukazi atakili mwisiki mubasilikye limoi limoi.” 12Omu banyansi ba Yabeshigileadi bashangamu abaisiki 400 abatakamanyanganaga na mushaija, babaleta Shilo omu nsisira. Shilo eli omu nsi ya Kanaani.
13Aho enteko yona etumaho Ababenjamini ababaire bali aha rwazi rwa Rimoni, babendera emilembe. 14Omu bir'ebyo Ababenjamini bagaruka. Babaha abakazi abo babaire bahungizeho omu bakazi ba Yabeshigileadi; kyonkai tibabamazire. 15Abantu bashasibwa Ababenjamini aha rw'okuba omu nganda za Isiraeli Omukama hakaba atairemu ekihuru.
16Aho abagurusi b'enteko bagamba bati, “Tukoreki kuha abashaga abakazi orwo omuli Benjamini abakazi baisirwe bakahwamu?” 17Bagamba bati, “Ababenjamini abakizire bagire abasika; oruganda rutakuchweka muli Isiraeli. 18Ekiliho titwakushobora kubasiigira bahara baitu.” Okugamba batyo bakaba banahiire bati, “Nakaraamwe alisiigira Omubenjamini.” 19Aho bagamba bati, “Leba, Shilo bhaliho obugenyi bw'Omukama obwa buli mwaka.” Shilo eli bikara bya Betheli, oburugaizoba bwa nyaihanda eruga Betheli ekatemba Shekemu, kandi eli kasi ya Lebanoni. 20Baragira Ababenjamini bati, “Mugende muzimbe omu ndimiro y'emizabibu, 21mulebe; k'abaisiki ba Shilo baraturuka kuzina amayaga, aho muruge omu ndimiro y'emizabibu. Buli mushaija omu baisiki ba Shilo akwatemu omukazi, mushube mugende omu nsi ya Benjamini. 22Baishebo anga banyanyabo kabaraija kutugeleka turabagambira tuti, ‘Musingire mubatutunge; ahakuba thaliho mushaija wotwanyagire mukazi mu ndashana, kandi nainywe timwababasiigiire aha rw'okuba mwakugizire entambara.’ ” 23Ababenjamini bagira batyo. Orwo abaisiki babaire nibazina, buli mushaija akwatamu omoi, amutwara kuba mukaziwe. Aho bagaruka omu butaka bwabo, bombeka buhya ebigo babituramu. 24Bir'ebyo Abaisiraeli nabo barugayo, buli mushaija agaruka omu rugandarwe n'omu bawenene; buli mushaija ashuba omu busikabwe.
25Makiro ago omuli Isiraeli hakaba hatalimu mukama; buli muntu yakoraga okwo yabonaga.
Currently Selected:
Abaramuzi 21: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
