Orubara 7
7
Ebihongo by'abebembezi
1Kiro ekyo Musa yayemeleza ekiikaro akakikora amajuta n'okukiha omugisha hamoi n'ebikwato byakyo byona, na alutare akagikora amajuta, akagiha omugisha hamoi n'ebikwato byayo byona, 2abebembezi ba Isiraeli, abakuru b'enganda ababaire nibatwara abantu ababazirwe, 3bakaletera Omukama ebihongo babimuhongera: Amagali mukaga agasangiire, n'ente 12. Abebembezi babili gali emoi na buli mwebembezi ente. Bakabihonga aha kiikaro. 4Aho Omukama agambira Musa ati, 5“Otore ebihongo ebi ebyo bahonga, birakora omw'Ihema ly'Omuterano. Obihe Abalevita, buli Mulevita nk'okwo eikoralye lyemire.” 6Kityo Musa akwata amagali ago n'ente abiha Abalevita. 7Amagali gabili n'ente inai akabiha Abagerishoni kuhonderana n'eikora lyabo. 8Amagali ganai agasigaire n'ente munana ezindi akabiha Abamerari kuhonderana n'eikora lyabo. Abamerari aba bakaba nibakulirwa Itamari eya Aroni, omukuhani. 9Kyonkai Abakohati tiyabahaire kantu, kuba bakaba bakwasiibwe ebintu ebitakatifu byonkai eby'okushutulira aha mabega. 10Abebembezi bakagira ebihongo aha rw'obugenyi bw'okuha alutare omugisha kiro ekyo yakorwa amajuta. Ebihongo ebyo bakabiheleza omu maisho ga alutare. 11Omukama agambira Musa ati, “Aha rw'okuha alutare omugisha abebembezi bagire ebihongo, buli omoi kirokye.”
12Ayagizire ebihongo aha kiro kya mbere ni Nashoni eya Aminadabu, ow'oruganda rwa Yuda. 13Akagira ekihongo ky'esahani y'efeza ey'obusikizi bw'eshekeli kikumi mwomakumi gashatu; ebeseni emoi y'efeza ey'obusikizi bweshekeli 70 kuhonderana n'eshekeli y'ahatakatifu, obusikizi bw'esahani n'ebeseni, zombili zijwire ensano nungi etabirainwe n'amajuta, nk'okwo ekihongo ky'ensano kigenda. 14Nashoni ogwo yataho esahani mpango y'ezahabu ey'eshekeli 10, eijwire obunuma. 15Yayongeraho enumi y'ekigeto, empaya y'entaama, akapaya k'omwana gw'entaama ak'omwaka gumoi k'ekihongo ky'okwokibwa; 16empaya y'embuzi y'enyatano y'amafu; 17yazinda n'ente ibili, empaya z'entaama itanu, empaya z'embuzi itanu, n'obupaya bw'entaama butanu: Ebyo bihongo by'emilembe.
18Ayagizire ebihongo aha kiro kya kabili ni Natanaeli eya Zuari, omukuru w'oruganda rwa Isakari. 19Akagira ekihongo ky'esahani emoi y'efeza ey'obusikizi bw'eshekeli 130, ebeseni emoi ey'eshekeli nshanju, zombili obusikizi bwazo kuhonderana n'obw'eshekeli y'ahatakatifu, zijwire ensano nungi etabirainwe n'amajuta, nk'okwo ekihongo ky'ensano kigenda. 20Yayongelaho esahani mpango y'ezahabu ey'eshekeli ikumi eijwire obunuma. 21Yataho enumi emoi, empaya y'entaama, n'akapaya k'entaama ak'omwaka gumoi k'ekihongo ky'okwokibwa. 22Yagerekaho empaya y'embuzi y'enyatano y'amafu; 23n'ente ibili, empaya z'entaama ibili, empaya z'embuzi itanu, obutama butanu bw'omwaka gumoi: Ebyo bihongo by'emilembe. Ebi nibyo bihongo ebyo Natanaeli eya Zuari yagizire.
24Ayagizire ebihongo aha kiro kya kashatu ni Eliabu eya Heloni, mukuru w'oruganda rwa Zabuloni. 25Akagira ekihongo ky'esahani emoi y'efeza ey'obusikizi bw'eshekeli 130, ebeseni y'efeza ey'obusikizi bw'eshekeli 70, zombili kuhonderana n'eshekeli y'ahatakatifu, zijwire ensano nungi etabirainwe n'amajuta nk'okwo ekihongo ky'ensano kigenda. 26Yayongeraho esahani mpango y'ezahabu y'eshekeli 10 eijwire obunuma. 27Yataho enumi y'ekigeto, empaya y'entaama, akapaya k'entaama ak'omwaka gumoi: Ekyo kihongo ky'okwokibwa. 28Yagelekaho empaya y'embuzi y'enyatano y'amafu; 29n'ente ibili, empaya z'entaama ibili, empaya z'embuzi itanu, n'obutama butanu bw'omwaka gumoi: Ebyo bihongo by'emilembe. Ebi nibyo bihongo ebyo Eliabu eya Heloni yagizire.
30Ayagizire ebihongo aha kiro kya kanai ni Elizuri eya Shedeuri, mukuru w'oruganda rwa Rubeni. 31Akagira ekihongo ky'esahani y'efeza ey'obusikizi bw'eshekeli 130, n'ebeseni y'eshekeli nshanju, zombili kuhonderana n'eshekeli y'ahatakatifu zijwire ensano nungi etabirainwe n'amajuta nk'okwo ekihongo ky'ensano kigenda. 32Yayongeraho esahani mpango y'eshekeli ikumi eijwire obunuma. 33Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa. 34Yagerekaho empaya y'embuzi y'enyatano y'amafu, 35n'ente ibili, empaya z'entaama ibili, n'obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo ebyo Elizuri eya Shedeuri yagizire.
36Ayagizire ebihongo aha kiro kya katanu ni Shelumieli eya Zurishadai, mukuru w'oruganda rwa Simeoni. 37Akagira ekihongo ky'esahani emoi y'efeza, ey'obusikizi bw'eshekeli 130, ebeseni y'efeza ey'eshekeli 70, zombili obusikizi bwazo kuhonderana n'eshekeli y'ahatakatifu, zijwire ensano nungi etabirainwe n'amajuta nk'okwo ekihongo ky'ensano kigenda. 38Yayongeraho esahani mpango y'ezahabu ey'eshekeli 10 eijwire obunuma; 39n'enumi y'ekigeto, empaya y'entaama, n'akapaya k'entaama ak'omwaka gumoi: Ebyo bihongo by'okwokibwa. 40Yataho empaya y'embuzi y'enyatano y'amafu. 41Yagerekaho ente ibili, empaya z'entaama itanu, empaya z'embuzi itanu, n'obupaya butanu bw'entaama obw'omwaka gumoi: Ebyo bihongo by'emilembe. Ebi nibyo bihongo ebyo Shelumieli eya Zurishadai yagizire.
42Ayagizire ebihongo aha kiro kya mukaga ni Eliasafu eya Deweli, mukuru w'oruganda rwa Gadi. 43Akagira ekihongo ky'esahani y'efeza ey'obusikizi bw'eshekeli 130, n'ebeseni y'efeza ey'eshekeli 70; zombili obusikizi bwazo kuhonderana n'eshekeli y'ahatakatifu, kandi zijwire ensano nungi etabirainwe n'amajuta, nk'okwo ekihongo ky'ensano kigenda. 44Yayongeraho esahani emoi mpango ey'ezahabu ey'eshekeli 10 eijwire obunuma; 45yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa, 46n'empaya y'embuzi y'enyatano y'amafu. 47Yagerekaho ente ibili, empaya z'entaama itanu, empaya z'embuzi itanu, obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo bya Elisafu eya Deweli.
48Aha kiro kya mushanju ayagizire ebihongo ni Elishama eya Amihudi, mukuru w'oruganda rwa Efuraimu. 49Akagira ekihongo ky'esahani y'efeza ey'eshekeli 130, n'ebeseni y'efeza ey'eshekeli 70; zombili z'obusikizi bw'eshekeli y'ahatakatifu, zijwire ensano nungi etabirainwe n'amajuta, nk'okwo ekihongo ky'ensano kigenda. 50Yayongeraho esahani emoi mpango ey'ezahabu ey'eshekeli 10 eijwire obunuma. 51Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa; 52n'empaya y'embuzi y'enyatano y'amafu. 53Yagerekaho enta ibili, empaya z'entaama itanu, empaya z'embuzi itanu, obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo bya Elishama eya Amihudi.
54Aha kiro kya munana ayagizire ebihongo ni Gamalieli eya Pedazuri, mukuru w'oruganda rwa Manase. 55Akagira ekihongo ky'esahani y'efeza ey'eshekeli 130, n'ebeseni emoi ey'eshekeli 70; zombili z'obusikizi bw'eshekeli y'ahatakatifu, zijwire ensano nungi etabirainwe n'amajuta nk'okwo ekihongo ky'ensano kigenda. 56Yayongeraho esahani mpango y'ezahabu y'eshekeli 10 eijwire obunuma. 57Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa; 58n'empaya y'entaama y'enyatano y'amafu. 59Yagerekaho ente ibili, empaya z'entaama itanu, empaya z'embuzi itanu, obupaya bw'entaama butanu obw'omwaka gumoi. Ebi nibyo bihongo bya Gamalieli eya Pedazuri.
60Aha kiro kya mwendai ayagizire ebihongo ni Abidani eya Gideoni, mukuru w'oruganda rwa Benjamini. 61Akagira ekihongo ky'esahani y'efeza ey'eshekeli 130, n'ebeseni y'eshekeli 70, zombili z'obusikizi bw'eshekeli y'ahatakatifu, zijwire ensano nungi etabirainwe n'amajuta nk'okwo ekihongo ky'ensano kigenda. 62Yayongeraho esahani mpango y'ezahabu ey'eshekeli 10, eijwire obunuma. 63Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa; 64n'empaya y'embuzi y'enyatano y'amafu. 65Yagerekaho ente ibili, empaya z'entaama itanu, empaya z'embuzi itanu, obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo bya Abidani eya Gideoni.
66Aha kiro kya ikumi ayagizire ebihongo ni Ahiezeri eya Amishadai, mukuru w'oruganda rwa Dani. 67Akagira ekihongo ky'esahani y'efeza ey'obusikizi bw'eshekeli 130, n'ebeseni y'efeza ey'eshekeli 70; zombili obusikizi bwazo kuhonderana n'eshekeli y'ahatakatifu, zijwire ensano nungi etabirainwe n'amajuta, nk'okwo ekihongo ky'ensano kigenda. 68Yayongeraho esahani mpango y'ezahabu ey'eshekeli 10, eijwire obunuma. 69Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokya; 70n'empaya y'embuzi y'enyatano y'amafu. 71Yagerekaho ente ibili, empaya z'entaama itanu, empaya z'embuzi itanu, n'obutama butanu obw'omwaka gumoi: Ebyo bihongo by'emilembe. Ebi nibyo bihongo ebyo Ahiezeri eya Amishadai yagizire.
72Aha kiro kya ikumi na kimoi ayagizire ekihongo ni Pagieli eya Okarani, mukuru w'oruganda rwa Asheri. 73Akagira ekihongo ky'esahani y'efeza ey'eshekeli 130, n'ebeseni emoi y'efeza ey'eshekeli 70, zombili obusikizi bwazo kuhonderana n'eshekeli y'ahatakatifu, zijwire ensano nungi etabirainwe n'amajuta, nk'okwo ekihongo ky'ensano kigenda. 74Yayongeraho esahani mpango y'ezahabu ey'eshekeli 10, eijwire obunuma. 75Yataho enumi y'ekigeto, empaya y'entaama, akapaya k'entaama ak'omwaka gumoi: Ebyo bihongo by'okwokibwa; 76n'empaya y'embuzi emoi y'enyatano y'amafu. 77Yagerekaho ente ibili, empaya z'entaama itanu, empaya z'embuzi itanu, n'obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo bya Pagieli eya Okarani.
78Aha kiro kya ikumi na bibili ayagizire ebihongo ni Ahira eya Enani, omukuru w'oruganda rwa Nafutali. 79Akagira ekihongo ky'esahani y'efeza ey'eshekeli 130, n'ebeseni emoi y'eshekeli 70; zombili obusikizi bwazo kuhonderana n'eshekeli y'ahatakatifu, zijwire ensano nungi etabirainwe n'amajuta nk'okwo ekihongo ky'ensano kigenda. 80Yayongeraho esahani mpango y'ezahabu ey'eshekeli 10, eijwire obunuma. 81Yataho enumi y'ekigeto, empaya y'entaama n'akapaya k'entaama ak'omwaka gumoi: Ebyo bihongo by'okwokya; 82n'empaya y'embuzi y'enyatano y'amafu. 83Yagerekaho enumi ibili, empaya z'entaama itanu, empaya z'embuzi itanu, n'obupaya bw'entaama butanu obw'omwaka gumoi: Ebyo bihongo by'emilembe. Ebi nibyo bihongo bya Ahira eya Enani.
84Ebi nibyo bihongo ebyagizirwe bakuru b'enganda za Isiraeli aha rw'okuha alutare omugisha, kiro ekyo yakorwa amajuta. Bakagira esahani ikumi na ibili z'efeza, ebeseni 12 z'efeza, n'esahani zihango 12 z'ezahabu. 85Buli sahani y'efeza ekaba eina obusikizi bw'eshekeli 130. Kandi buli besheni ekaba eina obusikizi bw'eshekeli 70. Ebikwato byona by'efeza nibigobya eshekeli 2,400 kuhonderana n'eshekeli y'ahatakatifu. 86Esahani ezihango ez'ezahabu, ezijwire obunuma, buli emoi shekeli 10, kuhonderana n'eshekeli y'ahatakatifu, ezahabu yazo negoba eshekeli 120. 87Ebitunganwa byona eby'ebihongo by'okwokibwa numi 12, empaya z'entaama 12, obupaya bw'entaama 12 obw'omwaka gumoi hamoi n'ekihongo ky'ensano ekibugendaho; n'empaya z'embuzi 12 ez'enyatano y'amafu. 88Ebitunganwa byona eby'ebihongo by'emilembe numi makumi 24, empaya z'entaama 60, empaya z'embuzi 60, n'obupaya bw'entaama obw'omwaka gumoi 60. Ebi nibyo bihongo ebyagizirwe orwo alutare yakozirwe amajuta ekahabwa omugisha.
89Orwo Musa yatahire omw'Ihema ly'Omuterano kukurata Omukama, akahulira alikumugambira ayemire eiguru y'Esanduku ly'Endagano aha ntebe y'obuganyizi omugati y'abakerubi.
Currently Selected:
Orubara 7: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
