Orubara 6
6
Eiteka ely'okuhonderwa omwehonge
1Omukama akagambira Musa ati, 2“Ogambire Abaisiraeli, yaba mushaija anga mukazi, k'alikora ekiragano ekili kwakyo, ekiragano eky'omwehonge, akehongera Omukama, 3ogwo alekelere kimoi edivai n'amarwa. Atalinywa nshalizi erugire mu divai anga mu marwa. Atalinywa muramba gwa zabibu anga kulya zabibu zonene, zaba zitomire anga zomire. 4Omwehonge ogwo oburorabwe bwona atalilya kantu kona kona akaraba aha muzabibu nangu n'empambo chei, n'akashushu chei.”
5“Ebirobye byona eby'obwehonge orumoiso rutalimuraba mu mutwe kuhika orwo alihikya ebirobye ebyo aliba aragaine kwehongera Omukama. Arabaga mutakatifu, n'eishokelye alileke likure liraihye.”
6“Ebiro byona ebyo aliba ayehongeire Omukama ataligoba aha mutumbi. 7Gwaba mutumbi gwa ishe anga gwa nyina, gube gw'omurumuna anga gwa munyanya. Batalifa hakabagoba akahagara. Eishokelye aha mutwe kabonero okwo yayehongeire Omukama. 8Ebiro byona by'obwehongebwe aliba mutakatifu w'Omukama.”
9“K'omuntu yakufa orufu rw'ekibwangu akamufera aha rubaju, eishokelye akabonero k'obwehonge likahagara, aho aha kiro kya mushanju orwo alyeyeza amoise n'eishoke elyo. 10Aha kiro kya munana atwalire omukuhani entungurumaiba ibili anga obwana bw'ebiba bubili aha mulyango gw'Eihema ly'Omuterano. 11Omukuhani atambe entungurumaiba emoi aha rw'enyatano y'obufu. Endijo agitambe ekitambo ky'okwokibwa amwatilire, kuba afakaire orwo agobirweho omutumbi. Kiro kyonene kyonene ahongere Omukama omutwegwe. 12Amwehongere, agire n'omwana gw'entaama ogw'omwaka gumoi aha rw'enyatano y'entambara. Kyonkai ebiro by'obwehongebwe ebyebembeire biliba bitakibarwa aha rw'enshonga y'obwehongebwe obwo kuhagara.”
13“Eli nilyo iteka ly'omwehonge, orwo ebirobye by'obwehonge birahwaga. Bamulete aha mulyango gw'Eihema ly'Omuterano. 14Ahongere Omukama ekihongo, akapaya k'omwana gw'entaama ak'omwaka gumoi enzira kamogo aha rw'ekihongo ky'okwokibwa, n'omuagazi gw'omwana gw'entaama ogw'omwaka gumoi enzira kamogo aha rw'ekihongo ky'enyatano y'obufu. Ashube agire n'empaya y'entaama etaina kamogo ey'ekihongo ky'emilembe. 15Ayongereho entukuru y'emikate etatumbisiibwe, n'ekeki z'ensano nungi ezirungirwemu amajuta, n'ebisikuti bitatumbisiibwe ebisiigire amajuta hamoi n'ekihongo ky'ensano n'ebihongo by'okunywa. 16Omukuhani arahongera Omukama ekihongo ky'enyatano y'obufu n'ekihongo ky'okwokibwa eky'omwehonge yaleta. 17Atambire Omukama empaya y'entaama, nikyo kihongo ky'emilembe hamoi n'entukuru y'emikate etatumbisiibwe. Ekihongo ky'emilembe kigendwaho ekihongo ky'ensano n'ekihongo ky'okunywa; ebi nabyo omukuhani abihonge. 18Omwehonge amoise omutwegwe ogutakatifu aha mulyango gw'Eihema ly'Omuterano, alinage omu muliro ogulikwokya ekihongo ky'emilembe. 19Omukuhani akwate omukono gw'empaya y'entaama orwo guramara kuhya aha mahiga, aihye n'omukate gumoi ogutatumbisiibwe omu ntukuru n'ekisikuti kimoi ekitatumbisiibwe, abikwase omwehonge yamazire kumoisa eishokelye ly'obwehonge. 20Omukuhani abichunkeze, nikyo kihongo ky'okuchunkeza, akihongere Omukama. Ebi mugabo gutakatifu gw'omukuhani hamoi n'ekidari ekyo bachunkeza n'ekirumbu ekyahongwa. Ahanyuma nirwo omwehonge yakunywa edivai.”
21“Eli nilyo iteka lirahonderwaga omwehonge alikuragana ekiragano. Ahongere Omukama ekihongo nk'okwo ekiraganokye eky'obwehonge kilikumuragira, nirwo yakushobora kugira ebihongo ebindi. K'ali mwehonge akore okwo ekiraganokye n'eiteka ly'obwehonge bilikumuragira.”
Omugisha gw'abakuhani
22Omukama akagambira Musa ati, 23“Ogambire Aroni n'abatabani oti, Oku nikwo murahaga Abaisiraeli omugisha, nimubagambira muti: 24Omukama abatunge omugisha mara abalinde. 25Omukama ababonekere mara abasingire. 26Omukama abahabukire mara abatunge emilembe.”
27Omukama agamba ati, “Kabaliha batyo Abaisiraeli omugisha omw'ibara lyange, Abaisiraeli abo ndibaha omugisha.”
Currently Selected:
Orubara 6: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
