Orubara 33
33
Okwo Abaisiraeli barugire Misiri kugoba Moabu
1Egi niyo migendere y'Abaisiraeli orwo barugire Misiri kuhonderana n'enganda zabo omu mahe. 2Musa akahandika emiimukize yabo, kuruga aha na hali nk'okwo Omukama yabaire amuhangiire. Mbwenu egi niyo migendere yabo okwo bagenzire: 3Bakaruga Ramesesi kili kiro kya ikumi na bitanu ky'omwezi gwa mbere. Baraire baliire Pasika, nirwo Abaisiraeli basigireho Abamisiri nibeshanda, 4aho Abamisiri nibaziika emizigaijo yabo eyo Omukama yaisire, akolekya okwo aina obushobora kukira baruhanga babo.
5Abaisiraeli baruga Ramesesi basisira Sukoti. 6Baruga Sukoti basisira Etamu aha rubibi rw'eirungu. 7Baruga Etamu bagaruka Pihahiroti oburugaizoba bwa Baalisefoni, basisira bolekeire Migidoli. 8Baruga mbali babaire basisiire bolekeire Hahiroti baraba omu nyanja baturukira omw'Irungu lya Etamu, bagenda orugendo rw'ebiro bishatu basisira Mara. 9Baruga Mara bagoba Elimu, mbali bashangire enchuro ikumi na ibili z'amaizi n'emiti y'emitende nshanju, baba niho basisira. 10Kabarugire Elimu basisira aha Nyanja Rutuku. 11Baruga aha Nyanja Rutuku basisira omw'Irungu lya Sini. 12Baruga omw'Irungu lya Sini basisira Dofuka. 13Baruga Dofuka basisira Alushi. 14Baruga Alushi basisira Refidimu mbali babuzirwe amaizi g'okunywa. 15Baruga Refidimu basisira omw'Irungu lya Sinai. 16Baruga omw'Irungu lya Sinai basisira Kiburotihataava. 17Baruga Kiburotihataava basisira Hazeroti. 18Baruga Hazeroti basisira Ritima. 19Baruga Ritima basisira Rimoniperezi. 20Baruga Rimoniperezi basisira Libuna. 21Baruga Libuna basisira Risa. 22Baruga Risa basisira Kehelata. 23Baruga Kehelata basisira aha Ibanga lya Sheferi. 24Baruga aha Ibanga lya Sheferi basisira Harada. 25Baruga Harada basisira Makeloti. 26Baruga Makeloti basisira Tahati. 27Baruga Tahati basisira Tera. 28Baruga Tera basisira Mitika. 29Baruga Mitika basisira Heshimona. 30Baruga Heshimona basisira Moseroti. 31Baruga Moseroti basisira Beneyakani. 32Baruga Beneyakani basisira Horihagidigadi. 33Baruga Horihagidigadi basisira Yotibata. 34Baruga Yotibata basisira Aburona. 35Baruga Aburona basisira Eziongeberi. 36Baruga Eziongeberi basisira omw'Irungu lya Sini (niyo Kadeshi). 37Baruga Kadeshi basisira aha Ibanga lya Hori, omu rubibi rw'ensi ya Edomu.
38Aha kiro kya mbere ky'omwezi gwa katanu, Aroni omukuhani atemba Eibanga lya Hori okwo Omukama yamuhangiire, aba niyo agwa, omu mwaka gwa 40 kwema Abaisiraeli barugire Misiri. 39Akaba aina emyaka 123, nirwo yafire akagwa aha Ibanga lya Hori. 40Omunyakanaani omukama wa Aradi ayaturaga Negebu omuli Kanaani, agya ahulira okwo Abaisiraeli balikwija.
41Baruga aha Ibanga lya Hori basisira Salumona. 42Baruga Salumona basisira Punoni. 43Baruga Punoni basisira Oboti. 44Baruga Oboti basisira Iyeabarimu omuli Moabu. 45Baruga Iyeabarimu basisira Dibongadi. 46Baruga Dibongadi basisira Alimondibulataimu. 47Baruga Alimondibulataimu basisira omu Mabanga ga Abarimu agolekeraine n'Eibanga lya Nebo. 48Baruga omu Mabanga ga Abarimu basisira omu mpita za Moabu haihi na Yorudani aholekeraine na Yeriko. 49Ahanyuma basisira haihi na Yorudani kwema Betiyeshimoti kuhika Abelishitimu omu mpita za Moabu.
Ebiragiro Batakashabukire Yorudani
50Omukama agambira Musa omu mpita za Moabu haihi na Yorudani ahali Yeriko ati, 51“Ogambire Abaisiraeli oti, Orwo mulishabuka Yorudani mukagya Kanaani, 52mubingemu abanyansi bamwo bona abo mulishangamu, mushube mwate ebishushani bya baruhanga byona eby'amabare n'ebiheshano byona, mukambure na ealutare. 53Ensi egyo mugitware mugituremu, aha rw'okuba nkagibaha k'eba yanyu. 54Kugya kugitwara mugitekere enshoga kuhonderana n'enganda zanyu. Oruganda oruhango muruhe obusika bungi; kandi oruganda oruke muruhe obutaka buke. Mbali enshoga ziliboleka omuntu niho haliba ha wenene. Ensi egyo mugilye nk'okwo enganda zanyu zili. 55Nawe kamuliba mutabingiremu banyansi bamwo abo mulishangamu, abo mulisigamu balikara babashasize babatuze kubi omu nsi egyo. 56Kamuliba mutababingiremu ndiita inywe, okwo nagonzaga kwita bonene.”
Currently Selected:
Orubara 33: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
