Orubara 28
28
Ebihongo bya buli kiro
(Oku 29:38-46)
1Omukama akagambira Musa ati, 2“Ragira Abaisiraeli, obagambire ebyo ndikugamba ningira nti, ‘Ebihongo byange, ebitambo by'okwokibwa ebyo mulikumpongera, eby'akataachu akalikunshemelera, mugume mwijuke kubimpongera omu makiro gabyo agaragiirwe.’ 3Obagambire oti, Eki nikyo kihongo ky'okwokibwa ekyo muratambiraga Omukama: Amakiro gona buli kiro Omukama mumutambire obupaya bubili bw'emyana y'entaama, obw'omwaka gumoi obutaina kamogo. 4Akatama akamoi mukatambe bwankya, akandi mukatambe bwaigoro. 5Mushube mugelekeho ekihongo ky'ensano enungi ekilo emoi etabiraine n'erobo lita y'amajuta agakamwire. 6Ekyo nikyo kihongo ky'okwokibwa eky'obutosha eky'okutambira Omukama ekyaragiirwe aha Ibanga lya Sinai, eky'akataachu akarungi. 7Buli mwana gw'entaama gugendweho erobo lita y'ekihongo eky'okunywa. Ekihongo ky'amarwa ekyo mwahongera Omukama, mwihyeho otwarwa mutusheshe ahatakatifu. 8Akataama akandi mukatambe bwaigoro. Mukatambe, mukalekeho ekihongo kyako ky'ensano n'eky'okunywa nk'ebya bwankya. Ekyo kibe kihongo ky'okwokibwa eky'akataachu ak'okushemelera Omukama.”
Ekitambo kya Sabato
9“Aha kiro kya Sabato mutambe obupaya bubili bw'entaama obw'omwaka gumoi obutaina kamogo, hamoi n'ekilo ibili z'ensano nungi etabiraine n'amajuta n'ekihongo ky'okunywa. 10Ekyo nikyo kihongo ky'okwokibwa ekya buli Sabato, ekya buli kiro n'eky'okunywa ekikigendaho ebyo bitabulimu.”
Ebihongo by'ekiro kya mbere ky'omwezi
11“Ahali buli mbandizo y'omwezi mutega nimuhongera Omukama ebihongo by'okwokibwa: Enumi z'ebigeto ibili, empaya y'entaama emoi, kandi obupaya mushanju bw'entaama obw'omwaka gumoi obutaina kamogo. 12Buli numi egendweho ekihongo ky'ekilo ishatu z'ensano nungi etabiraine n'amajuta, kandi empaya emoi y'entaama egendweho ekihongo ky'ekilo ibili z'ensano enungi etabiraine n'amajuta. 13Omwana gw'entaama gugendweho ekilo emoi y'ensano enungi etabiraine n'amajuta. Ebi bitambo by'okwokibwa eby'akataachu ak'okushemelera Omukama. 14Ebihongo eby'okunywa, eby'okugenda ahali ebyo, mugire elita ibili z'edivai aha rwa buli numi. Empaya y'entaama mugiteho elita emoi n'enusu z'edivai, kandi omwana gw'entaama gugendweho elita emoi. Nibyo bihongo bya buli mwezi eby'okwokibwa omwaka gwona. 15Ekihongo kya buli kiro eky'okwokibwa, hamoi n'ekihongo kyakyo eky'okunywa, bigelekweho ekihongo ky'okuhongera Omukama eky'empaya y'embuzi aha rw'enyatano y'amafu.”
Ebihongo aha bugenyi bw'emikate etatumbisiibwe
(Eby 23:5-14)
16“Pasika y'Omukama eshemezibwe aha kiro kya ikumi na binai ky'omwezi gwa mbere. 17Ekiro kikuru kyonene kikorwe bukeire, aha kiro kya ikumi na bitanu. Mube nirwo mulya omukate gutaina itumbyo kumara ebiro mushanju. 18Aha kiro kya mbere orwo mulikulya omukate gutaina itumbyo, habeho enteko, mufukame; mutalikora mulimo gwa mpita. 19Mutambe ebitambo, muhongere Omukama ebihongo by'okwokibwa: Enumi ibili z'ebigeto, empaya y'entaama, n'obupaya mushanju bw'emyana y'entaama obw'omwaka gumoi obutaina kamogo. 20Muteho n'ebihongo by'ensano etabiraine n'amajuta ebigendanwa n'ebitambo ebyo: Enumi mugiteho ekilo ishatu z'ensano; empaya y'entaama mugiteho ekilo ibili; 21kandi buli mwana gw'entaama, kilo emoi. 22Mushube mugire empaya y'embuzi aha rw'ekihongo ky'enyatano y'amafu kwatilira amafu ganyu. 23Orwo mulikutamba ebitambo ebi, ekihongo eky'okwokibwa ekya buli kiro bwankya nikiba kitabulimu. 24Kutyo buli kiro omu biro mushanju mutambire Omukama ekitambo ky'okwokibwa, eky'akataachu k'okumushemelera. Ekitambo eki kigirwe eli nyongelera aha kitambo kya buli kiro hamoi n'ekitambo ky'okunywa ekikigendaho. 25Aha kiro kya mushanju habeho enteko, mufukame. Mutalikora mulimo gwa mpita.”
Ebihongo eby'Obugenyi bw'Amagesha
(Eby 23:15-22)
26“Aha kiro kya mbere ky'Obugenyi bw'Amagesha, orwo mulikuganuza Omukama omu bugenyi bw'amalimansi mushanju habehoga enteko, mufukame. Kir'ekyo mutalikora mulimo gwa mpita. 27Muhongere Omukama ekitambo ky'okwokya eky'akataachu k'okumushemelera: Enumi ibili z'ebigeto, empaya emoi y'entaama, n'obupaya mushanju bw'entaama obw'omwaka gumoi. 28Kwakwo ebihongo ebi bigendweho ebihongo byabyo eby'ensano nungi etabiraine n'amajuta. Enumi negendwaho ekilo ishatu z'ensano; empaya z'entaama buli emoi negendwaho ekilo ibili z'ensano; 29kandi emyana y'entaama omushanju buli gumoi nigugendwaho ekilo emoi. 30Mushube muteho empaya y'embuzi aha rw'okwatilira amafu ganyu. 31Ebihongo ebi mubigire hamoi n'ebihongo byabyo eby'okunywa ebikabigendaho. Ahonu ekihongo eky'okwokibwa ekya buli kiro n'ekihongo kyakyo eky'ensano bitabulimu. Mwekomeleze bitagira kamogo.”
Currently Selected:
Orubara 28: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
