Orubara 22
22
Omukama wa Moabu natuma ahali Balaamu
1Abaisiraeli baimukya, orusisira barutera bolekeire Yeriko omu mpita za Moabu buseli bwa Yorudani. 2Balaki eya Sipori hakaba yaboine ebyo Abaisiraeli bakozire Abaamori. 3Abamoabu batina muno Abaisiraeli, enshonga bakaba bali bangi, babahahanisa emyoyo. 4Abamoabu bagambira abakuru ba Midiani bati, “Omugana ogu gw'embwa nigwija kuramba ebyo twinabyo okwo ente ekuuta obunyasi mbali yaliira.” Omu biro ebyo omukama wa Moabu hakaba ali Balaki eya Sipori. 5Yatuma entumwa ahali Balaamu eya Beori, ayabaire atwire Petori, aha Mwiga gwa Efurati omu nsi ya Amawi, kumweta. Amuragiraho ati, “Haliho abantu barugire Misiri, ensi bagijwire, mara batwire omu maisho gaitu. 6Mbwenu oije, ondaamire abantu aba, kuba nibankira amani, shana nakushobora kubasinga n'okubaihya omu nsi egi, aha rw'okuba nimanya okwo ow'oha omugisha ahabwa omugisha, n'ow'oraama araamwa.”
7Abakuru ba Moabu n'aba Midiani bakwata emikimba y'okuha omufumu bagenda. Bagoba omwa Balaamu bamugambira ebyo Balaki yabatuma. 8Abagambira ati, “Kir'eki murare hanunju, ndabahorora nyenkya okwo Omukama arangambira.” Kityo abatwazi ba Moabu barara omwa Balaamu. 9Ruhanga aija ahali Balaamu amubaza ati, “Abantu aba ab'oinabo ni bahai?” 10Balaamu ahorora Ruhanga ati, “Balaki eya Sipori, omukama wa Moabu antumireho ati, 11‘Haliho abantu barugire Misiri, ensi bagijwire. Mbwenu oije obandaamire, shana nakushobora kubarashanisa nkababinga.’ ” 12Ruhanga agambira Balaamu ati, “Otagenda nabo mara otakuraama bantu abo ahakuba baina omugisha.” 13Aho bwankya Balaamu agambira abatwazi ba Balaki ati, “Mushube owanyu kuba Omukama yantanga kugenda na inywe.” 14Aho abatwazi ba Moabu baimukya bashuba owa Balaki bamugambira bati, “Balaamu yayanga kwija na ichwe.”
15Balaki ashuba atuma abatwazi abandi, abangi kushaga aba mbere mara ab'ekitinwa kukiraho. 16Baija omwa Balaamu bamugambira bati, “Balaki eya Sipori nagamba ati, ‘Hatabaho kya kukutanga kwija; 17ndakuha ekitinwa kingi, mara nkore kyona kyona eky'orangambira. Oije ondaamire abantu aba.’ ” 18Nawe Balaamu ahorora abairu ba Balaki ati, “N'orwo Balaki yakumpaire enjuye eijwire efeza n'ezahabu, tinakugireyo kuchwa muhango gw'Omukama Ruhanga wange, n'akati. 19Mbwenu nimbashaba mushube murare hanu na kir'eki, manye kushagaho ekyo Omukama arangambira.” 20Ruhanga aija ahali Balaamu omu kiro amugambira ati, “K'abantu aba baraba baizire kukweta, imuka ogende nabo; ekyo ndakuragira kyonkai nikyo orakora.”
Balaamu n'Endogobeye
21Bwankya Balaamu aimuka, ateka amatandiko aha ndogobe, agenda n'abatwazi ba Moabu. 22Kyonkai okugendakwe kunigaza muno Ruhanga n'omumalaika w'Omukama ayemelera omu muhanda kumutanga. Akaba akuubire endogobeye aina n'abairube babili. 23Endogobe ebona omumalaika w'Omukama ayemeleire omu muhanda, akwete embanda eshohorogokire omu ruraro. Endogobe eruga omu muhanda egya omu kikamba. Balaamu agitera kugigarura omu muhanda. 24Aho omumalaika w'Omukama ayemelera omu kahanda kafunzire omugati y'omusiri gw'emizabibu, n'orukuta rumuli oku n'oku. 25Orwo endogobe yaboine omumalaika ogwo w'Omukama esima orukuta, etekelera Balaamu okuguru aha rukuta orwo. Balaamu ashuba agitera. 26Aho omumalaika w'Omukama agenda omu maisho, ayemelera ahafunzire muno, ahataina buhindukiro obulyo anga obumosho. 27Orwo endogobe yamuboine ebwarama ahansi okwo Balaamu akagili aha mugongo. Balaamu atamwa muno agiteza enkoni. 28Omukama akomorora endogobe akanwa. Ebaza Balaamu eti, “Nakukoleraki kuntera emirundi eshatu egi?” 29Balaamu agihorora ati, “Kuba wanzanisa. Kanakuba naba nkwete embanda nakukwisire.” 30Endogobe emubaza eti, “Tindi ndogobe yawe ey'otuura nokuuba oburora bwawe bwona kugoba mbwenu? Ebi ndabikukozire?” Agihorora ati, “Chei.”
31Aho Omukama aburuza Balaamu amaisho, abona omumalaika ayemeleire omu muhanda, akwete embanda eshohorogokire omu ruraro; ainama, agwa ahansi ajumaire. 32Omumalaika w'Omukama amubaza ati, “Emirundi eshatu egi endogobe yawe wagiteleraki? Naija kukutanga omu muhanda aha rw'okuba mbali olikugya tindikwendayo. 33Endogobe yambona emirundi eshatu neshuba aha rubaju. Kuba etashuba kashatu aha rubaju kumpigiza, mazima mbwenu aha nakuba nakwisire mara yonene ngileka.” 34Balaamu agambira omumalaika w'Omukama ati, “Nafakara, kyonkai naba ntalikumanya okwo waba nompimbira muhanda. Aha rw'ekyo orwo olikubona okwo ndikukora kubi, nagaruka omuka.” 35Omumalaika w'Omukama amugambira ati, “Abantu abo ogende nabo; nawe ekigambo ekyo ndakuragira kyonkai obe nikyo ogamba.” Aho Balaamu agenda n'abatwazi ba Balaki.
Balaki nachwekera Balaamu
36Orwo Balaki yahuliire okwo Balaamu yaija, agenda Ari kumuchwekera aha Mwiga gwa Arinoni orubibi rwa Moabu. 37Balaki abaza Balaamu ati, “Orwo nakutumireho kubaki tiwaizire?” 38Balaamu amushubamu ati, “Mbwenu naija! Nyina obushobora kugira ekyo nagamba kyona kyona? Ekigambo ekyo Ruhanga arandagira kugamba nikyo ndagamba.” 39Aho Balaamu agenda na Balaki bagya Kiriatihuzoti. 40Balaki atamba enumi n'entaama, atumaho Balaamu n'abatwazi abo yabaire ainabo kubaha enyama.
41Bukeire Balaki atwara Balaamu aha ibanga eiguru elilikwetwa Bamotibaali kushobora kugira Abaisiraeli abo yabonaho.
Currently Selected:
Orubara 22: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
