Orubara 21
21
Abaisiraeli nibasinga Abakanaani
1Orwo omukama Omukanaani owa Aradi ayaturaga Negebu yahulire okwo Abaisiraeli baletwa omuhanda gwa Atarimu, abatabalira, abandi abakwata endore. 2Abaisiraeli baraganisa Omukama Ruhanga nibagira bati, “Mazimakwo k'Abakanaani aba orabatunaga omu mikono, ebigo byabo turabirandura.” 3Omukama Ruhanga ahulira okutaka kwabo, abanaga Abakanaani omu mikono, babaita omwebura n'ebigo byabo babirandura. Omwanya ogwo gw'endashana bakagweta Horima#21:3 Horima Omu Ruyahudi nikwo kusilika..
Enjoka y'Omulinga
4Abaisiraeli baruga aha Ibanga lya Hori bakwata omuhanda gw'Enyanja Rutuku, bazingora ensi ya Edomu. Kyonkai omu rugendo orwo bekanaishura. 5Bakeena Ruhanga na Musa nibagira bati, “Mukatwihiraki Misiri kutuleta omw'irungu kugwamu? Talimu byakulya, n'amaizi chei. Kandi n'ebyakulya ebi ebitaina kwo bili nibitutama.” 6Aho Omukama abasindikira enjoka z'omuliro, zibatema, bafa bangi. 7Abantu baija ahali Musa bamugira bati, “Tufakaire orwo tukeenire Omukama tukakeena na iwe. Singa otagilize Omukama atwihyemu enjoka ezi.” Kityo Musa abashabira. 8Omukama agambira Musa ati, “Oheshe enjoka ogihanike aha muti. Buli muntu aratemwa enjoka k'aragileba ararora.” 9Musa ahesha enjoka y'omulinga, agihanika aha muti. Enjoka kayakutemire omuntu, akaleba enjoka y'omulinga, arora.
Kuruga Hori kugya Moabu
10Abaisiraeli baimukya bagya basisira omuli Oboti. 11Kabarugire Oboti bagya basisira omuli Iyeabarimu, mukono ogw'oburugaizoba, omw'irungu elyolekeraine na Moabu. 12Baruga aho bagya basisira omu ruhanga rwa Zeredi. 13Baruga omwo basisira buseli bw'Omwiga gwa Arinoni omw'irungu elilikubandiza aha rubibi rw'Abaamori. Omwiga gwa Arinoni nirwo rubibi rwa Moabu n'Abaamori. 14Nikyo omu Kitabo ky'Endashana z'Omukama bagambira bati,
“Ekigo kya Wahebu omuli Sufa,
n'empanga z'Omwiga gwa Arinoni;
15n'obusoka bw'empanga
ezilikuhika aha kigo kya Ari,
kugya omu rubibi rwa Moabu.”
16Kabarugire buseli bw'Omwiga gwa Arinoni bagya Beri. Beri nilyo iziba elyo Omukama yagambilireho Musa ati, “Ohikanise abantu mbahe amaizi.” 17Nirwo Abaisiraeli bahoyire oruhoya oru:
“Tabuka amaizi iwe iziba!
Twije tuzine eiziba elyo,
18eiziba elyalimirwe abatwazi,
ely'abanyiginya batiibisize enkoni zabo z'obutwazi,
bakalishokoza ebikoni byabo.”
Baruga omw'irungu bagenda Matana, 19kabarugire Matana bagenda Nahalieli, kuruga Nahalieli bagya Bamoti. 20Baruga Bamoti bagya omu ruhanga omuli Moabu, bagoba aha mutwe gw'Eibanga lya Pisiga elilebangaine n'Eirungu lya Yeshimoni.
Omukama Sihoni n'Omukama Ogi nibasingwa
(Obw 2:26–3:11)
21Abaisiraeli batuma entumwa ahali Sihoni omukama w'Abaamori bati, 22“Katurabe omu nsi yawe. Titulikwija kuraba mu misiri, n'orwo kwakuba kuraba omu ndimiro z'emizabibu. N'aha iziba titunyweho maizi. Turatwarwa Nyaihanda y'Omukama kulemwa kugoba orwo turarugira kimoi omu nsi yawe.” 23Sihoni tiyaikiliize Baisiraeli kuraba mu nsiye. Sihoni akahikanisa abaisherukalebe yatabalira Abaisiraeli abo omw'irungu. Kayagobire Yahazi aba nimwo akwatanganira nabo. 24Abaisiraeli bamwisa embanda. Ensiye bagilya kugyema aha Mwiga gwa Arinoni kugituruka aha Mwiga gwa Yaboki, kulemwa kugoba aha rubibi rw'Abaamoni, kuba orubibi orwo rw'Abaamoni rukaba rwina amani. 25Bakwata ebigo ebyo byona by'Abaamoni, nka Heshiboni n'ebyaro byayo byona. 26Heshiboni nikyo kyabaire kili kikaare kya Sihoni, omukama ogwo w'Abaamoni, ayabaire arashaine n'omukama wa Moabu obwa karai, akamunyaga n'ensiye yona kugituruka aha Mwiga gwa Arinoni. 27Nikyo abachwi b'ebizina bagambira bati,
“Mwije Heshiboni eyombekwe,
ekigo kya Sihoni kyombekwe, kihame.
28Aha rw'okuba omuliro gukaranda gwemire Heshiboni,
endimi z'omuliro zaruga omu kikaare kya Sihoni,
gwayokya ekigo kya Ari omuli Moabu,
n'abakama b'amabanga ga Arinoni.
29Zakulya iwe Moabu!
Mwahwa, inywe abafukamira Kemoshi!
Abamufukamira abahindwire nsingwa,
n'abakazi, Sihoni omukama w'Abaamori
yabatwara endore.
30Tubarasire Heshiboni yaranduka,
ensi twagisilikisa omuliro,
twagigoba Medeba.”
31Abaisiraeli batura batyo omu nsi y'Abaamori. 32Musa atuma ab'okurambura ekigo kya Yazeri, bakwata ebyaro byayo, babingamu Abaamori ababaire batwiremu. 33Bagaruka bakwata omuhanda ogulikugya Bashani. Ogi omukama wa Bashani atabara n'abantube bona kubarashanisa omuli Edirei. 34Nawe Omukama agambira Musa ati, “Otamutina. Wenene n'abantube bona n'ensiye nabakunagire omu mikono. Omugire nk'okwo wagizire Sihoni omukama w'Abaamori, ayaturaga Heshiboni.” 35Kityo bamwita n'abanabe n'abantube bona. Ali wa wenene tiyasigaireho n'omoi, n'ensiye bagilya.
Currently Selected:
Orubara 21: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
