Luka 6
6
Sabato
(Mat 12:1-8; Mar 2:23-28)
1Ekiro kimoi eli Sabato, Yesu ashangwa naraba omu misiri y'engano. Aho abegesibwabe baguturamu ebikumba, babinyukilira omu byara, baihyamu enjuma bazilya. 2Kyonkai Abafarisayo abandi babaza bati, “Kubaki nimukora ekilikutangwa ahali Sabato?” 3Yesu abahorora ati, “Inywe timukashomaga ekyo Daudi yakozire arumirwe enjara, wenene n'abo yabaire ainabo? 4Akataha Rwensinga yakwata omukate gw'obusinge bwa Ruhanga yagulya, ogutajubulirwa muntu weena weena shana abakuhani nibo bagulya.” 5Yashuba yabagambira ati, “Omwana w'Omuntu aba Mukama wa Sabato.”
Omushaija akokosire omukono
(Mat 12:9-14; Mar 3:1-6)
6Ahali Sabato endijo, Yesu kayatahire omu Sinagogi akegesa, hashangwamu omushaija akokosire omukono. 7Abeegesa b'Amateka n'Abafarisayo bahanga Yesu amaisho, kuleba nk'aragira owo yakiza aha kiro kya Sabato, baije bagire ekyo bamutoijera. 8Kyonkai Yesu amanya ebitekelezo byabo, agambira omushaija ayabaire akokosire omukono ati, “Rugayo oyemelere aha.” Omushaija aimuka ayemelera mbali yamugambira. 9Yesu abagambira ati, “Mbabaze, nikijuburwa kukora kurungi ahali Sabato anga kukora kubi?” 10Abarabyamu amaisho bona, agambira omushaija ayabaire akokosire omukono ati, “Imukya omukono gwawe.” Akora atyo, gukira. 11Kyonkai Abeegesa b'Amateka n'Abafarisayo batamwa muno, batabunkana, babanza kutensa bonene bonkai okwo baragira Yesu.
Yesu naronda entumwa ikumi na ibili
(Mat 10:1-4; Mar 3:13-19)
12Omu biro byonene ebyo Yesu agya omw'ibanga kushoma enshara. 13K'obwire bwakeire ayeta abegesibwabe, arondamu 12 nibo yayesire ntumwa: 14Simoni owo yayesire Petero, na Anderea omurumuna, Yakobo, Yohana, Filipo, Balitolomayo, 15Matayo, Tomasi, Yakobo eya Alufayo, Simoni (owo bayetaaga Omuferaihanga), 16Yuda eya Yakobo na Yuda Isikariote embanzi.
Yesu nayegesa nashuba nakiza
(Mat 4:23-25)
17Yesu aruga aha ibanga n'abegesibwabe ayemelera aha mwere hamoi n'abegesibwabe batali bake. Hakaba haliho n'embaga y'abantu bangi barugire Buyahudi yona na Yerusalemu n'omwaro gwa Tiro na Sidoni, kumuhuliliza kandi k'abakiza endwara. 18N'abo amasitani gabaire nigaita kubi abakiza. 19Embaga yona eyenda kumukoraho, enshonga amani gamurugagamu gabakiza bona.
Ebyera n'obushasi
(Mat 5:1-12)
20Yesu aleba abegesibwabe, agamba ati,
“Muli baberwa inywe abanaku, aha rw'okuba obukama bwa Ruhanga bwanyu.
21“Muli baberwa inywe abaina enjaara mwaha, aha rw'enshonga muliguta.
“Muli baberwa inywe abalikulira mwaha, ahakuba mulisheka.
22“Muliba baberwa orwo abantu balibanoba, bakabazira n'okubajaamya, bakabagamba okwo muli babi, nibabatura Omwana w'Omuntu! 23Kiro kiliinya mulishanduuka, mushemelerwe, kuba emperwa yanyu eliba mpango omw'iguru. Manyasi na baishenkurubo nikwo bagizire batyo abarangi. 24Kyonkai zabalya inywe abatungi, aha rw'okuba ebyer byanyu mwabiboine. 25Mwakagwerwa inywe abaigusire mwaha, aha rw'enshonga mulirumwa enjara. Mwakagwamu inywe abalikusheka mwaha, aha rw'okuba mulichura mulire. 26Mwagwerwa akabuta inywe abo abantu bona balikuhaisiliza, manya na baish'enkurubo nikwo bagiraga batyo abarangi b'ebishuba.”
Okugonza ababisha
(Mat 5:38-48; 7:12a)
27“Kyonkai mbagambire nimuhulira: Mugonze ababisha banyu, mukolerege ababanoba, 28ababaraama mubendere emigisha, mushabire ababajuma. 29Alikutera eitama omutege n'elisigaire. Alikwaka eikoti lyawe omutaishulire n'eishati. 30Alikagira ekyo yakutakaho omujune, kandi alikwaka ebili byawe otabimutonga. 31Kandi okwo mwenda abantu kababakolera, nainywe mubakolere mutyo.
32“Kamuragonzaga abababagonza nimuba mwinaho kakizoki? Manya n'abafakare bagonza ababagonza. 33Isi kamurakolerage ababakolerage, nimuba mwinaho kakizoki? Manya n'abakafare ebyo babikora. 34Kamurahoraga abarabahora, nimuba mwinaho kakizoki? N'abafakare bahora abafakare, ngu babone bingi ahanyuma. 35Kyonkai inywe mugonze ababisha banyu, mukolere banu kurungi, kandi mubahore, mutalikushubira byo mwabakolera kababa nibyo babakolera. Aho emperwa yanyu eliba mpango, mara muliba baana ba Rukirabyona, aha rw'okuba aba mufura aha bantu abatagira siimi n'abeyenda. 36Mugire obuganyizi nk'okwo Isheinywe agira obuganyizi.
Okuramura abandi
(Mat 7:1-5)
37“Mutaramura banu, nirwo na inywe mutaliramurwa. Mutalisingisa muntu nirwo na inywe mutaliramurwa. Mugarulire, na inywe muligarulirwa. 38Muhe, na inywe mulihabwa. Na inywe mulihabwa ekipimo kirungi, ekigatiirwe, ekichundachunzirwe, ekisheshekaine. Ekipimo ekyo murahaga banu nikyo nainywe mulihabwa.”
39Ashuba abagambira enfumo ati, “Empume yakuhabura empume? Bombili tibagwe mu kiina? 40Omwegesibwa takira mwegesawe, shana buli muntu k'ayegesibwa akabimanya byona ogwo alishusha omwegesawe. 41Kubaki nobona akabwabwa akali omu liisho lya murumuna wawe, kyonkai enchuma y'omuti eli omu liisho lyawe otalikugibona? 42Anga wakugambir'otai murumuna wawe oti, ‘Murumuna wange, kankwihyemu akabwabwa omu liisho,’ okwo iwe omu liisho elyawe halimu enchuma y'omuti? Inywe ngobya inywe! Banza oihye enchuma y'omuti omu liisho lyawe, nirwo orabonage okashobora kwihyamu akabwabwa akali omu lya murumuna wawe.
Omuti n'ebiraba byagwo
(Mat 7:16-20; 12:33-35)
43“Taliho muti gurungi guraba biraba bibi. 44Enshonga buli muti gumanyikira aha biraba byagwo. Etini tizinogwa aha miti eina mahwa, n'ezabibu tizinogwa aha matoju. 45Omuntu omurungi, ebirungi abiha aha birungi ebyo ainabyo aha mutima. Kandi n'omuntu omubi, ebibi abihya aha bibi ebyo ainabyo aha mutima. Nomanya akanwa k'omuntu kagamba ebimwijwire aha mutima.
Abombeki babili
(Mat 7:24-27)
46“Ahakubaki inye nimunyeta ‘Mukama! Mukama!’ Kyonkai ebyo ndikubagambira tibyo mulikukora? 47Buli omoi aija ahali inye akahulira ebigambo byange mara akabigobesheleza kanyije mboleke okwo alikushusha. 48Nashusha omuntu ayagiire kwombeka enju akalima orwina akagoba aha rwazi, orwazi akaba nirwo abandizaho omusingi. K'omutunga gwayasire, omugera gukataba nigusindika enju egyo, tigwashoboire kugitengya, kuba ekaba eyombekire aha rwazi. 49Kyonkai omuntu ahulira ebigambo byange atabigobesheleize nashusha omuntu ayayombekire enju etaina musingi, eyakumbiibwe omugera aho n'aho; n'emigwere y'enju egyo ekaba eli y'amani.”
Currently Selected:
Luka 6: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.