Luka 5
5
Yesu nayeta abegesibwa ba mbere
(Mat 4:18-22; Mar 1:16-20)
1Yesu kayabaire ayemeleire aha mwegego gw'Enyanja ya Genezareti, embaga emufunza negonza kuhulira ekigambo kya Ruhanga. 2Agya abona amato gabili aha mwegego, kyonkai abajubi bakaba bagarugiremu nibogya amashambo gabo. 3Ataaha omu bwato bumoi obwabaire buli bwa Simoni, amugambira kubwiliza kake omu maizi bukaruga aha mwaro. Ashuntama ayegesa abantu ayemire omu bwato. 4Kayalekeire kugamba, agambira Simoni ati, “Mugende omu nyanja engundu murashemu amashambo, mukwate enfuru.” 5Ndi Simoni ahorora ati, “Rugaba, ekiro kyona tufire twayosha, titukwete kantu! Kyonkai aha rw'ekigambo kyawe kangye nagemu amashambo.” 6Kabamazire kunagamu amashambo bakukumba enfuru zingi muno, n'amashambo gabo gabanza kugutuka. 7Aho bayeta bataahi babo ababaire bali omu bwato obundi kwija kubajuna. Baija baijuza amato gombili nago gabanza kwibira. 8Kyonkai Simoni Petero kayaboine okwo byaba bityo, agwa Yesu omu maguru nagamba ati, “Waitu Mukama ondugeho; inye ndi mufakare.” 9Nobona akatangara hamoi na bona abo yabaire ainabo. Enfuru ezo bakwete nizo zabatangaize. 10Yakobo na Yohana, batabani ba Zebedayo, ababaire bali bataahi ba Simoni, nabo kwakwo kibababera kitangaro. Yesu agambira Simoni ati, “Otatiina, kwema mbwenu orataga kujuba abantu.” 11Kabamazire kugarura amato aha mwaro, basigaho buli kantu bahondera Yesu.
Yesu nakiza omubembe
(Mat 8:1-4; Mar 1:40-45)
12Yesu kayabaire ali omu kigo kimoi aijwa omushaija arwaire ebibembe omubili gwona. Orwo yaboine Yesu ajumara ahansi amutagiliza ati, “Waitu Mukama, kawakwenda wakunyeza.” 13Yesu aimukya omukono amukwataho nagamba ati, “N'inyenda, yera.” Niho honkai akira ebibembe. 14Yesu amutanga kubigambira omuntu n'omoi. Amugambira ati, “Ogende oyeyoleke omukuhani, ogiire n'ekihongo ky'okumanyisa abantu okwo wayera, nk'okwo Musa yaragiire.” 15Kyonkai aho eirangalye lyaba nirwo likiraho kugoba harai. Abantu baija bangi muno kumuhuliliza, n'okutambirwa endwara. 16Wenene arugayo agya omw'irungu ashoma enshara.
Yesu nakiza akabire orubaju
(Mat 9:1-8; Mar 2:1-12)
17Limoi omu bir'ebyo, Yesu kayabaire nayegesa, Abafarisayo n'abeegesa b'Amateka bakaba barugire omu byaro byona bya Galilaya na Yerusalemu, bali aho bashuntamire. Kandi Yesu ogwo Omukama akaba amuhaire amani g'okutamba endwara. 18Aho abantu bamuletera omuntu aha machera akabire orubaju, bashaba kumutahya omu nju kumuteka omu maisho ga Yesu. 19Kyonkai kababuzirwe obumurabyo, aha rw'obungi bw'abantu, batemba aha rushwi rw'enju, bashakaruraho amategura, batemamu ekihuru bamusongora okwo ali aha machera, bamuteka omu maisho ga Yesu omugati y'abantu. 20Kayaboine okwesiga kwabo agamba ati, “Iwe mushaija wagarulirwa amafu gawe.” 21Abeegesa b'Amateka n'Abafarisayo babanza kwebaza bati, “Yab'ohai ogu alikurogota? N'ohai ow'okugarulira amafu, atali Ruhanga mushai?” 22Yesu kayamanyire okwo baliho nibebaza batyo, abahorora ati, “Kubaki nimwebaza mutyo omu mitima yanyu? 23Ekyorobire kushaaga ni kihai, kugamba nti ‘Wagarulirwa amafu gawe,’ anga kugamba nti, ‘Imuka otambuke?’ 24Kyonkai mubone kumanya okwo Omwana w'Omuntu aina obushobora omu nsi kugarulira amafu,” aho agambira omushaija ayabaire asharaire orubaju ati, “Ninkugambira, imuka, shutura amachera gawe otahe.” 25Aho naho okwo bakamulebire aimuka, ashutura amacherage ataaha nahaisiliza Ruhanga. 26Abantu bona bagwa omu kitangaro, bahaisiliza Ruhanga okwo oku baijwire obutini nibagamba bati, “Kir'eki twaboine eby'okutangaza.”
Yesu nayeta Levi
(Mat 9:9-13; Mar 2:13-17)
27Ekyo kakyahoire Yesu aturuka, abona omushoza eibaralye Levi, ashuntamire aha ofisi y'abashoza, amugambira ati, “Ompondere.” 28Levi asigaho buli kantu, aimuka amuhondera.
29Levi agya omwe akolera Yesu obugenyi bw'amani. Abashoza bangi n'abantu abandi nabo balya nabo. 30Abafarisayo n'abeegesa b'Amateka bajurujwitira abegesibwabe bati, “Kubaki inywe nimulya n'abashoza n'abafakare?” 31Yesu abahorora ati, “Abagumire tibalikwetaga mutambi, shana abarwaire. 32Inye tinyizire kweta bagorogoki; nyizire kweta abafakare kabechuza.”
Okusiiba
(Mat 9:14-17; Mar 2:18-22)
33Abantu abandi bagambira Yesu bati, “Abegesibwa ba Yohana baikara nibasiiba mara nibashoma enshara, kumoi n'abegesibwa b'Abafarisayo, kyonkai abawe balya mara banywa.”
34Yesu abahorora ati, “Wakusiibisa abagenyi abaizire aha bugenyi bw'obushwere oku baina kishwera? 35Ebiro biliija, orwo balibaihyaho kishwera, aho babe nirwo basiiba.” 36Ashuba abachwera enfumo ati, “Taliho muntu ataagura kishaato aha mwendo guhya akakiteka aha mwendo ogukuru. Kayakugira atyo, akataagura ekishaato ekihya, ekishaato ekyo ekyaruga aha mwendo oguhya tikizoke kurungi aha mwendo ogukuru. 37Kandi taliho muntu ateeka divai zihya mu nshaho zikuru ez'edivai. Kayakugira atyo, edivai empya erabarura enshaho, mara edivai yonene eshesheke, n'enshaho zife. 38Nawe edivai empya neragirwa kutekwa omu nshaho ezihya. 39Mara taliho muntu kushangwa yanyoire divai nkuru akagonza mpya, aha rw'okuba nagira ati, ‘Edivai enkuru niyo nungi.’ ”
Currently Selected:
Luka 5: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.