Eby'abalevita 9

Aroni natamba ebitambo

1Aha kiro kya munana Musa ayeta Aroni n'abatabani n'abebembezi ba Isiraeli. 2Agambira Aroni ati, “Okwate ebuguma y'enumi aha rw'ekihongo ky'enyatano y'obufu, n'empaya y'entama y'ekihongo ky'okwokibwa, byombili enzira kamogo, obihonge omu maisho g'Omukama. 3Ogambire Abaisiraeli oti, ‘Mukwate empaya y'embuzi aha rw'ekihongo ky'enyatano y'obufu, enyana n'omwana gw'entama, byombili by'omwaka gumoi, enzira kamogo aha rw'ekihongo ky'okwokibwa, 4enumi n'empaya y'entama aha rw'ebihongo by'emilembe, by'okutambira omu maisho g'Omukama, ekihongo ky'emyaka kitabirainwe n'amajuta, aha rw'enshonga kir'eki Omukama naija kubabonekera.’ ” 5Ebyo Musa yaragiire babileta omu maisho g'Eihema ly'Omuterano, enteko yona egob'aho eyemelera omu maisho g'Omukama. 6Musa agamba ati, “Eki nikyo kigambo eky'Omukama abahangiire kukora; Omukama arababonekera omu kitinwakye.” 7Ashuba agambira Aroni ati, “Ija ahali alutare, ohonge ekihongo kyawe ky'enyatano y'obufu n'ekihongo kyawe eky'okwokibwa, oyegilire enyatano, iwe n'abantu. Kandi olete ekihongo ky'abantu obagilire enyatano, nk'okwo Omukama ahangire.”

8Kityo Aroni agoba alutare, aita enyana y'ekihongo ky'enyatano y'obufu eyabaire egizirwe aha rwa wenene. 9Abatabani bamuletera obwamba, abwibikamu orukumu abuteka aha mahembe ga alutare, kandi obwamba abushesha aha maguru gayo. 10Kyonkai ebishaju n'ensigo n'ekiteko ky'eine, ebyarugire aha kihongo ky'enyatano y'obufu abyokeza ahali alutare, nk'okwo Omukama yabaire ahangiire Musa. 11Enyama n'oruhu abyokeza enjai y'orusisira.

12Aita n'ekihongo ky'okwokibwa, abatabani bamuheleza obwamba, abushaimulira alutare kugizingora. 13Bamuhereza n'ekihongo ky'okwokibwa akachweka aha kandi, n'omutwe; abyokeza ahali alutare. 14Ayogya amara n'ebilenge abyokejanyia n'ekihongo ky'okwokibwa.

15Aho ahonga ekihongo ky'abantu, akwata embuzi y'ekihongo ky'enyatano y'obufu eyabaire egizirwe aha rw'abantu, agiita, agihonga aha rw'enyatano y'obufu nk'ekihongo ky'enyatano y'obufu ekya mbere. 16Ahonga ekihongo ky'okwokibwa, mara akihonga kuhonderana n'ekiragiro. 17Ahonga ekihongo ky'emyaka, akiyoraho ekikamato akyokeza ahali alutare, ekihongo ky'okwokibwa ekya bwankya kitabulimu.

18Kwakwo aita enumi n'empaya y'entama, ekitambo ky'ebihongo by'abantu eby'emilembe. Abatabani bamuheleza obwamba, obwamba obwo abushaimulira alutare kugizingora. 19Ebishaju by'enumi n'eby'empaya y'entama, ebishaju by'eikira, n'orushaju rw'amara, ensigo, n'ekiteko ky'eine, 20babitungika aha nkoro, babitwara byona alutare. Ebishaju Aroni abyokeza aha alutare, 21kyonkai enkoro n'ekirumbu kya bulyo Aroni abichunkeza omu maisho g'Omukama, nk'okwo Musa yabaire aragiire.

22Aho Aroni aimukya emikono ayolekeire abantu abaha omugisha. Kayamazire kuhonga ekihongo ky'enyatano y'obufu n'eky'okwokibwa n'ebihongo by'emilembe, asongoka. 23Musa na Aroni bataha omw'Ihema ly'Omuterano. Orwo baturukire baha abantu omugisha, N'Omukama omu kitinwakye abonekera abantu bona. 24Omuliro guzibuka omu maisho g'Omukama, gwokeza kimoi ekihongo ky'okwokibwa n'ebishaju ahali alutare. Orwo abantu bona baguboine, batamu enduru, bajumara ahansi.

Currently Selected:

Eby'abalevita 9: RHAY01

Highlight

Copy

Compare