Eby'abalevita 10
10
Obufu bwa Nadabu na Abihu
1Nadabu na Abihu batabani ba Aroni, buli omoi akwata ekyotezo ekye, akitamu omuliro, omuliro agutaho obunuma, aguhongera Omukama. Kyonkai omuliro ogwo gukaba guli guhagare kuba Omukama akaba atagubaragiire. 2Omuliro guruga omu maisho g'Omukama gubokya, bagwaho. 3Aho Musa agambira Aroni ati, “Eki nikyo Omukama yagambire ati, ‘Abalinkolera bona bamanye okwo mba mutakatifu; kandi abantu bona ndiboleka ekitinwa kyange.’ ” Kyonkai Aroni ayesiza atekana.
4Musa ayeta Mishaeli na Elisafani, batabani ba Uzieli, nyinarumi Aroni, abagambira ati, “Ija aha mwihye barumuna banyu omw'Ihema litakatifu, mubatware enjai y'orusisira.” 5Kityo baija, babashohoza nkabwo omu nyambarwa zabo enjai y'orusisira nk'okwo Musa yabaire yagambire. 6Musa agambira Aroni n'abatabani Eleazari na Itamari ati, “Mutakweshurura mitwe kuzora ishoke, nangu n'okutagura ebijwaro byanyu. Kamwakuchura, Omukama yakunigalira enteko yona na inywe mufa. Kyonkai Abaisiraeli bona barumuna banyu, nibajuburwa kuchura aha rw'orufu orwaletwa omuliro ogw'Omukama yahemba. 7Mutakuruga aha mulyango gwa Ihema lya Muterano kuturuka aheru, mutaija mukafa, ahakuba mukozirwe amajuta g'Omukama.” Bakora nk'okwo Musa yagambire.
Amateka g'abakuhani
8Omukama agambira Aroni ati, 9“Iwe na batabani bawe mutalinywa marwa mukataha mw'Ihema lya Muterano mutalija mukafa. Eki kiliba kiragiro eirai lyona omu mizarwa yanyu yona. 10Nimuragirwa Musaine kwahurana ebintu ebitakatifu n'ebintu ebya buli kiro, ebihagare n'ebilikwera. 11Kandi muli b'okwegesa Abaisiraeli ebiragiro byona ey'Omukama yabagambiire omu kanwa ka Musa.”
12Musa agambira Aroni n'abatabani Eleazari na Itamari, abasigaireho ati, “Mukwatega ekihongo ky'emyaka ekirasigarahoga aha bihongo by'Omukama ebirayokesibwaga omuliro, mukilye kitatumbisiibwe aha kabaju ka alutare, aha rw'okuba kitakatifu muno. 13Mukiliirega omu mwanya gutakatifu aha rw'enshonga mugabo gwawe na batabani bawe ogurarugaga aha bihongo by'Omukama ebirayokesibwaga omuliro. Nikwo Ruhanga yampangiire. 14Kyonkai enkoro erachunkezibwaga n'ekirumbu ekirahongwaga murabiliraga omu mwanya gwona gwona ogulikwera, iwe na batabani bawe na bahara bawe. Ebyo ahali iwe nibijuburwa: Mugabo gwawe na batabani bawe kuruga aha bitambo by'ebihongo by'emilembe ebiragirwaga Abaisiraeli. 15Ekirumbu ekirahongwaga n'enkoro erachunkezibwaga, babileterane n'ebihongo by'ebishaju eby'okwokesibwa omuliro, babichunkeze omu maisho g'Omukama. Kiliba kyawe na batabani bawe; mugabo gwanyu eirai lyona, nk'okwo Omukama ahangire.”
16Aho Musa abaliliza bunyanungi aha mbuzi y'ekihongo ky'enyatano y'obufu, ashanga yayokiibwe! Anigalira Eleazari na Itamari, batabani ba Aroni abasigaireho nagamba ati, 17“Kubaki mutaliira kihongo kya nyatano ya bufu ahatakatifu? Aha rw'enshonga kintu ekitakatifu muno. Omukama yakibaha kumwatilira entambara y'enteko ahali wenene. 18N'obwamba bwayo timubutahize hatakatifu omunda. Taliho kindi, mwaba nimuragirwa kugilira ahatakatifu omunda nk'okwo ndagiire.” 19Aroni agambira Musa ati, “Kir'eki abantu bahongera Omukama ekihongo kyabo ky'enyatano y'obufu n'ekihongo ky'okwokibwa; kyonkai leba, ebyangwaho! Isi kuba kir'eki nalya ekihongo ky'enyatano y'obufu Omukama yakukikunzire?” 20Orwo Musa yahuliire ekigambo ekyo, agwelera.
Currently Selected:
Eby'abalevita 10: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
