Eby'abalevita 21
21
Obutakatifu bw'abakuhani
1Omukama agambira Musa ati, “Ogambire abakuhani batabani ba Aroni okwo taliho mukuhani kwetahya mu michonchozo ya kuziika orwo yaferwa omunyabuzare, ataija akahagara. 2Shana abe ali munyabuzare amuli haihi muno, nka nyina, ishe, omutabani, omuhara, omurumuna, 3anga munyanya akyali mwisiki (amuli haihi aha rw'okuba yaba ataina mushaija; aha rwa munyanya yakuhagara). 4Atalyehagaza aha rw'ab'akwataine nabo aha rw'obushwere. 5Batalimoisa bihara mu mitwe yabo, anga kumoisa ntabiro za bireju byabo anga kwesharashara mibili. 6Babe batakatifu ahali Ruhanga wabo, batalihagaza ibaralye. Bahongere Omukama ebihongo by'okwokibwa n'ekyakulya; aha rw'ekyo babe batakatifu. 7Batalishwera mumalaya anga mukazi ahagaziibwe, nangu n'okushwera omukazi atambiibwe iba; aha rw'okuba omukuhani mutakatifu ahali Ruhangawe. 8Omutendeke aha rw'enshonga nahonga ekyakulya kya Ruhanga wawe. Omanye okwo ali mutakatifu aha rw'okuba inye Omukama ndi mutakatifu abahindura batakatifu. 9Kandi muhara w'omukuhani wena wena kayakutera obumalaya akahagara ahemura ishe. Bamwokye n'omuliro.
10“Omukuhani Nyamukuru ayakozirwe amajuta omu mutwe, atendekirwe kwambara enyambarwa, atakuza ishoke aha mutwe likaleremba, nangu n'okutagura emyendoye. 11Atalitaha mbali mufu ali, anga kwehagaza n'orwo yakuferwa ishe anga nyina. 12Atalishohora kuruga ahatakatifu, nangu n'okuhagaza ahatakatifu ha Ruhangawe, enshonga akozirwe amajuta gatakatifu ga Ruhangawe: N'inye Omukama. 13Kandi ashwere omwisiki. 14Atalishwera ntumbwakazi anga omukazi atambiibwe, anga ahagaziibwe, anga omumalaya. Ashwere omwisiki kuruga omu banyarugandabe, 15ataija akahagaza baanabe omu rugandarwe; aha rw'enshonga nye Omukama n'inye muhindura kuba mutakatifu.”
16Omukama agambira Musa ati, 17“Ogambire Aroni oti, Omuli baijukuru bawe ow'akatalizi atalimpongera kyakulya. 18Taliho n'omoi aina katalizi kumpongera kihongo: Omuntu aigaire amaisho anga alemaire anga aina obuso bunimpwire, anga orugingo orumoi nirukira orundi, 19anga ahutaire ekilenge anga omukono, 20anga aina eibango, anga ow'okuba ali nkomba, anga ow'amarali, anga aina obuhere, anga amazombo, anga kushangwa ali mukobe. 21Mwijukuru wa Aroni omukuhani aina akatalizi atalimpongera kihongo kya kwokibwa. Orwo aina akamogo atalihongera Ruhangawe kyakulya. 22Yakulya ekyakulya kya Ruhangawe: Engeli zombili z'ebintu ebitakatifu muno n'ebitakatifu, 23kyonkai ataligoba aha rutimbe anga ahali alutare, aha rw'enshonga aina akamogo, atalija akahagaza emyanya yange emitakatifu, aha rw'okuba n'inye Omukama abahindura batakatifu.” 24Nikwo Musa yagambiire atyo Aroni n'abatabani n'Abaisiraeli bona.
Currently Selected:
Eby'abalevita 21: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
