Eby'abalevita 20
20
Ebibonabonyio by'obutahulira
1Omukama agambira Musa ati, 2“Ogambire Abaisiraeli oti, Omwisiraeli wena wena anga omufuruki alikutura omuli Isiraeli, alihongera Moleki omwanawe wena wena bamwite; abanyansi bamuteze amabare. 3Inye nyenene ndinigalira omuntu ogwo, mara muchwe omu ba wenene, aha rw'okuhongera Moleki omwanawe, akahagaza ahatakatifu hange, akajangura eibara lyange elitakatifu. 4K'abanyansi baliziza kutetaho muntu ogwo, orwo alikuhongera Moleki omwanawe batamwisire, 5ahonu ndinigalira omuntu ogwo n'abanyarugandabe. Ndibachwa omu babo, wenene na bona abalimurondora kusiyana na Moleki.”
6“K'omuntu alyekwata abatungamiirwe abazimu n'abarogi, akatera obumalaya nka bonene, ndimunigalira muchwe omu ba wenene. 7Aha rw'ekyo mwikare nimwera mube batakatifu kuba n'inye Omukama Ruhanga wanyu. 8Mwekomye ebiragiro byange mubikwate; n'inye Omukama alikubahindura batakatifu. 9Aha rw'okuba buli muntu alikeena ishe anga nyina, bamwite. Yakeena ishe anga nyina, okwitwakwe aliturwa entambaraye.”
10“K'omuntu alisiyana na muka mutahiwe, bombili omushaija n'omukazi babaite. 11Omushaija alibyama na muka ishe ogwo aliba ajwire ishe; bombili babaite. Okwitwa kwabo baliturwa entambara yabo. 12K'omuntu alibyama n'omukamwana, bombili babaite; baliba bakozire ekizira; okwitwa kwabo baliturwa entambara yabo. 13K'omushaija alibyama n'omushaija okw'obon'oti mukazi, bombili baliba bakozire eihano, babaite; okwitwa kwabo baliturwa entambara yabo. 14K'omuntu alishwera omukazi akataho na nyina, elyo liliba lili ihano, babokye n'omuliro, wenene na bonene. Hatalibaho kihemu nk'ekyo omuli inywe. 15K'omuntu alibyama n'ekigunju, bamwite, n'ekigunju ekyo mukite. 16K'omukazi aligoba ekigunju kyona kyona akabyama nakyo, mumwite n'ekigunju ekyo; okwitwa kw'omukazi n'ekigunju eliba eli ntambaraye n'ekigunju.”
17“K'omuntu alibyama na munyanya, owa ishe anga owa nyina, ekyo kiliba kili kigambo ky'enshoni, mubaitire omu maisho g'abaabo; okubyama na munyanya, entambara nemukwata. 18K'omushaija alibyama n'omukazi alikwebona, akashurura okwebona kw'omukazi, n'omukazi wenene yayeshurura okwebonakwe; bombili babachwe omu babo. 19Otalibyama na nyokwento handiki shwenkazi, aha rw'okuba okwo kubyama omunyabuzare wawe akuli haihi; entambara nebakwata. 20K'omushaija alibyama na mukanyinarumi, aliba ajwire nyinarumi; entambara nebakwata, balifa bagumbaire. 21K'omushaija alishwera omuramu, obwo buliba buli buhagare; yajura omurumuna, baligumbara.”
22“Aha rw'ekyo mukwate ebiragiro byange byona n'emigenzo yange yona, mara mubihikye, nirwo ensi mbali ndikubatwara kutura etalibatanaka. 23Mutalirondora migilire ya ihanga elyo ndikubinga omu maisho ganyu, aha rw'okuba bakagira ebigiro ebi nabazira. 24Kyonkai nabagambira nti, ‘Mulisika ensi yabo, nanye ndigibaha mugilye, ensi elikusheshekana amatai n'obwoki.’ N'inye Omukama Ruhanga wanyu ayabashoroire omu mahanga. 25Aha rw'ekyo mwahurane ekigunju ekilikwera n'ekihagare, n'ekinyonyi ekilikwera n'ekihagare. Mutalilya kigunju anga kinyonyi anga na kintu kyona kyona, ekyo nshoroire kamumanya okwo bili bihagare. Mutalibilya mukahagara. 26Mumbere batakatifu aha rw'okuba inye Omukama ndi mutakatifu, mara mbahwire omu mahanga, kamuba bange nyabwange.”
27“Omushaija anga omukazi alikubandwa abazimu anga k'ali murogi mumwite, mumuteze amabare. Okwitwakwe yaturwa entambaraze.”
Currently Selected:
Eby'abalevita 20: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
