Eby'abalevita 15
15
Obuhagare obw'okuruga omu mubili
1Omukama agambira Musa na Aroni ati, 2“Mugambire Abaisiraeli muti, Orwo omushaija wena wena arakwatwaga akaho, arabaga muhagare aha rw'akahoke. 3Eli nilyo iteka ly'obuhagarebwe aha rw'okukwatwa akaho: Yaba akwetwe akaho handiki yakizire. 4Buli kitanda ky'omuntu akwetwe akaho arabyamaho kirahagara; na buli kintu eky'arashuntamira kirahagara. 5Kandi wena wena arakwata aha kitandakye afure emyendoye, mara ayoge amaizi, ashube aikare ahagaire kugoba bwaigoro. 6Nangu n'omuntu wena wena arashuntamira ekintu ky'omuntu aina akaho yaba ashuntamireho, afure emyendoye mara ayoge amaizi, kandi aikare ahagaire kugoba bwaigoro. 7Buli omoi arakwata aha mubili gw'omuntu aina akaho afure emyendoye mara ayoge amaizi, kandi aikare ahagaire kugoba bwaigoro. 8K'ogwo aina akaho arachwera alikwera, ogwo alikwera afure emyendoye, ayoge amaizi, amare aikare ahagaire kugoba bwaigoro. 9N'eitandiko lyona lyona elyo aina akaho arashuntamaho lirahagara. 10Wena wena arakwata ekintu ekyo yaba ashuntamire araba muhagare kugoba bwaigoro. Aratwaraga ekintu ekyab'eki afure emyendoye kandi ayoge amaizi, ashube aikare ahagaire kugoba bwaigoro. 11Wena wena ow'omunyakaho arakwataho atarabize mikono mu maizi, afure emyendoye kandi ayoge amaizi, ashube aikare ahagaire kugoba bwaigoro. 12N'ekikwato ky'eibumba eky'omunyakaho arakwataho kyatwe; kandi ekikwato eky'omuti kyogibwe omu maizi.”
13“Orwo omunyakaho arahasilirwa aha rw'okugira akaho, aho wenene abare ebiro mushanju aha rw'okuhasilirwakwe, ashube afure emyendoye; ayoge amaizi galikugera, aho arayera. 14Aha kiro kya munana akwate entungurumaiba ibili anga ebiba ebito bibili, aije omu maisho g'Omukama aha mulyango gw'Eihema ly'Omuterano, abihe omukuhani. 15Omukuhani arabihonga; ekimoi ky'ekihongo ky'enyatano y'obufu, ekisigaire ky'ekihongo ky'okwokibwa. Omukuhani amugilire enyatano omu maisho g'Omukama aha rw'okurwara akaho.”
16“K'omushaija ararotelera ayoge amaizi wena, amare aikare ahagaire kuturuka bwaigoro. 17Buli kijwaro na buli ruhu ebyagobwaho empambo byogibwe n'amaizi, bimare bikare bihagaire kugoba bwaigoro. 18K'omushaija arabyama n'omukazi n'okugwa akagwa, bombili boge amaizi, bashube baikare bahagaire kugoba bwaigoro.”
19“Orwo omukazi arayebona nk'okwo akebona omu rugingorwe araba muhagare ebiro mushanju, kandi buli omoi aramukwataho arahagara kugoba bwaigoro. 20Na buli kintu eky'arabyamira orwo ahagaire kiraba kihagare; kwakwo buli kintu ekyo arashuntamira kirahagara. 21Wena wena arakwata aha kitandakye afure emyendoye, amare ayoge amaizi, ashube aikare ahagaire kugoba bwaigoro. 22Na buli muntu arakwataho ekintu ekyo ashuntamire afure emyendoye, kandi ayoge amaizi, ashuba aikare ahagaire kugoba bwaigoro; 23n'orwo kiraba kitanda anga kintu kyona kyona ekyo ashuntamire, orwo omuntu arakikwataho arahagara kugoba bwaigoro. 24Kandi k'omushaija wena wena arabyama nawe, obuhagarebwe nibumukwata; omushaija ogwo araba muhagare ebiro mushanju. Buli kitanda eky'omushaija ogwo arabyamaho kirahagara. 25K'omukazi arayebona ebiro bingi, bitali biro eby'ayeboneraho, anga k'arayebona akashaga ebiro by'okwebonakwe, ebiro byona by'okwebona araikara ali muhagare. 26Ekitanda ekyo arabyamaho ebiro byona by'okwebonakwe, kibe kitandakye omu kwebonakwe. Buli kintu ekyo arashuntamira kirahagara, nk'ekihagaziibwe omu kwebonakwe. 27Arakwata ebintu ebi arahagara, afure emyendoye, ayoge amaizi, mara aikare ahagaire kugoba bwaigoro. 28Kyonkai k'arahasilirwa arugire omu kwebona, wenene abare ebiro mushanju, ebyo bihoire arayera. 29Aha kiro kya munana akwate entungurumaiba ibili anga ebiba ebito bibili, aziletere Omukama aha mulyango gw'Eihema ly'Omuterano. 30Omukuhani ahonge entungurumaiba emoi aha rw'ekihongo ky'enyatano y'obufu, esigaire aha rw'ekihongo ky'okwokibwa. Omukuhani amugilire enyatano omu maisho g'Omukama aha rw'okwebonakwe okuhagare.”
31“Nikwo orahasilira otyo Abaisiraeli bataija bakagwa mu buhagare bwabo aha rw'okuhagaza ekiikaro kyange omu rusisira rwabo.”
32“Eli nilyo iteka ly'omunyakaho anga ararotelera, akahagara omu kuba atyo. 33Kwakwo iteka ly'omukazi arayebona; nikwo kugir'oti lya wena wena, abe mushaija anga mukazi, aragira ekyamuruga omu mubili; n'omushaija arabyama n'omukazi ahagaire.”
Currently Selected:
Eby'abalevita 15: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
