Eby'abalevita 14

Okuhasilira emibili erwaire

1Omukama agambira Musa ati, 2“Eli lirabaga iteka ly'omubembe aha kiro ky'okuhasilirwakwe. Araletwaga aha mukuhani. 3Omukuhani aturuke omu rusisira, alebe endwara. Aho k'omubembe aliba akizire endwara y'ebibembe, 4omukuhani abaragiire bakwatiire ogwo alikwija kuhasilirwa ebinyonyi bibili ebitaina muziro ebilikurora, n'akati k'omwelezi n'akendo kalikutukura na hisopo. 5Omukuhani abaragiire baiteho ekinyonyi kimoi, bakitire omu kikwato ky'eibumba aha maizi galikugera. 6Akwate ekinyonyi ekilikurora hamoi n'akati k'omwelezi, n'akendo kalikutukura na hisopo abibikirane n'ekinyonyi kilikurora omu bwamba bw'ekinyonyi ekyaitirwa aha maizi galikugera. 7Ashaimulire omuhasilirwa w'ebibembe emirundi mushanju; aho amurange okwo alikwera, kandi ataishure ekinyonyi kilikurora kiharalire omw'ishwa. 8Omuhasilirwa ogwo afure emyendoye, mara amoise eishoke lyona, ayoge amaizi, aho arayera. Ebyo kumara kuhwa atahe omu rusisira, kyonkai aikare enjai y'eihemalye ebiro mushanju. 9Aha kiro kya mushanju amoise eishoke lyona aha mutwegwe, amoise ebireju n'ebisige, eishoke lyona elimuli aha mubili. Aho afure emyendoye, ayoge amaizi, aho arayera.”

10“Aha kiro kya munana akwate obupaya buto bubili bw'entaama obutaina kamogo, n'omuagazi gumoi gw'entama ogw'omwaka gumoi enzira katalizi, n'ekihongo ekilo ishatu z'ensano nungi etabiraine n'amajuta nk'enusu lita. 11Aho omukuhani alikumuhasilira ayemeleze omuhasilirwa ogwo n'ebintu ebi omu maisho g'Omukama aha mulyango gw'Eihema ly'Omuterano. 12Omukuhani akwateho akapaya kamoi k'entama, akahonge ekihongo ky'enyatano y'entambara, hamoi n'amajuta nk'enusu lita, kiehongo ekyo akichunkeze omu maisho g'Omukama. 13Aitire akatama mbali baitira ekihongo ky'enyatano y'obufu n'ekihongo ky'okwokibwa omu mwanya gutakatifu, aha rw'okuba ekihongo ky'enyatano n'ekihongo ky'enyatano y'obufu, kiba ky'omukuhani, kitakatifu muno. 14Omukuhani aihyeho obwamba bw'ekihongo ky'enyatano y'entambara, abuteke aha mbarakutwi ya bulyo y'omuhasilirwa ogwo n'aha kyara kishaija ky'omukonogwe gwa bulyo, n'aha kyara kishaija ky'okugurukwe kwa bulyo. 15Aho omukuhani aha majuta ago nk'enusu lita agiire ago yaihyaho agafuke omu kiganja ky'omukono gwa bumosho, 16agaibikemu orukumu rwa bulyo, agashaimuze orukumurwe orwo emirundi mushanju omu maisho g'Omukama. 17Amajuta agaramusigara omu kiganja agateke aha mbarakutwi ya bulyo y'omuhasilirwa ogwo, n'aha kyara kishaija ky'omukonogwe gwa bulyo, n'aha kyara kishaija ky'okugurukwe kwa bulyo; egyo nyongelera aha bwamba bw'ekihongo ky'enyatano y'entambara. 18Amajuta agamusigaire omu kiganja, omukuhani agateke omu mutwe gw'omuhasilirwa. Aho amugilire enyatano omu maisho g'Omukama. 19Ahonge ekihongo ky'enyatano y'obufu, ayatilire omuhasilirwa amwihyeho omu obuhagare. Ahanyuma aite ekihongo ky'okwokibwa. 20Ahonge ekihongo ky'okwokibwa n'ekihongo ky'emyaka ahali alutare. Nikwo omukuhani aramugilira atyo enyatano; mara arayera.”

21“Kyonkai k'omuhasilirwa aliba ali mworo atalikushobora kubona bityo, aho alete akapaya k'omwana gw'entama aha rw'ekihongo ky'enyatano y'entambara eky'okuchunkezibwa, bamwatilire. Ateho n'ekilo emoi y'ensano enungi etabiraine n'amajuta aha rw'ekihongo ky'emyaka, n'amajuta nk'enusu lita. 22Kwakwo n'entungurumaiba ibili anga ebiba bibili ebito ebyo yakushobora kubona. Ekimoi kiraba kihongo ky'enyatano y'obufu kandi ekindi kihongo ky'okwokibwa. 23Aha kiro kya munana abiletere omukuhani aha rw'okuhasilirwakwe aha mulyango gw'Eihema ly'Omuterano. 24Omukuhani akwate omwana gw'entama ogw'ekihongo ky'enyatano y'entambara, n'amajuta nk'enusu lita abichunkeze omu maisho g'Omukama; ekyo kihongo ky'okuchunkeza. 25Kandi aite omwana gw'entama ogw'ekihongo ky'enyatano y'entambara. Aihyeho obwamba bw'ekihongo ky'enyatano y'entambara abuteke aha mbarakutwi y'omuhasilirwa, n'aha kyara kishaija ky'omukonogwe gwa bulyo, n'aha kyara kishaija ky'omukono gwa bumosho. 26Omukuhani asheshe amajuta aha kiganja ky'omukono gwa bumosho; 27ashube ashaimuzeho orukumurwe rwa bulyo amajuta agamuli omu kiganja kya bumosho emirundi mushanju omu maisho g'Omukama. 28Ate amajuta aha mbarakutwi ya bulyo y'omuhasilirwa, n'aha kyara kishaijakye ky'omukono gwa bulyo, n'aha kyara kishaijakye ky'okuguru kwa bulyo, honene honene mbali basiiga obwamba bw'ekihongo ky'enyatano y'entambara. 29Amajuta agasigaire agali omu kiganja ky'omukuhani, omukuhani agate omuhasilirwa omu mutwe, kumugilira enyatano omu maisho g'Omukama. 30Ahonge entungurumaiba anga ebiba bito ebyo yakushobora kubona, 31ekimoi aha rw'ekihongo ky'enyatano y'obufu kandi ekindi aha rw'ekihongo ky'okwokibwa, hamoi n'ekihongo ky'emyaka. Omukuhani agilirwe omuhasilirwa enyatano omu maisho g'Omukama. 32Eli nilyo iteka ly'omurwaire w'ebibembe, atalikushobora kubona bihongo aha rw'okuhasilirwakwe.”

Ebibembe omu maju

33Omukama agambira Musa na Aroni ati, 34“Orwo murataha omu nsi ya Kanaani eyo ndikubaha kulya, mara nkateza enju endwara y'ebibembe omu nsi y'obutware bwanyu, 35aho nyin'enju aije agambire omukuhani ati, ‘Nimbon'oti omwange halimu endwara nanka.’ 36Aho omukuhani aragiire bashombore ebintu byona ebili omu nju batakagenzire kuleba ndwara, ebintu byona eby'omu nju bitaija bikagambwa okwo bihagaire; ahanyuma omukuhani aratahamu kuleba enju. 37Alebe endwara. K'endwara eraba eli omu nkuta z'enju nezoka omu bibara oti bya kijani anga oti nibitukura, kandi k'eraboneka netontobera omu rukuta, 38aho omukuhani aruge omu nju agye aha kishasi, agikome ebiro mushanju. 39Ashube agaruke aha kiro kya mushanju ekyo alebe. K'endwara eraba yayagaire aha nkuta z'enju, 40aho abaragiire bashomonkoremu amabare againa endwara, baganage omu mwanya oguhagaire enjai y'ekigo. 41Ahanyuma omukuhani aragiire baharure enkuta z'omunda hamoi n'einoni babisheshe mbali bashesha ebihagaire enjai y'ekigo. 42Aho bakwate amabare agandi bagashoke omu mwanya gw'amabare galinya, wenene akwate einoni elindi asilibe enju egyo.”

43“K'endwara erashuba ekagaruka omu nju mbali aihire amabare akaharura n'enju, akagisiliba, 44aho agende alebe. K'endwara eraba yayagaire omu nju, ebyo bibembe bibi omu nju, enju yahagaire. 45Agikambure yona: Amabare n'embaho n'einoni lyona. Ebyo byona abiturukye enjai y'ekigo abitware aha mwanya oguhagaire. 46Kandi omuntu aratahaga omu nju ekomire arahagaraga kugoba bwaigoro. 47Arabyamaga omu nju egyo ayogyega emyendoye; mara n'araliiraga omu nju egyo, nawe ayogyega emyendoye.”

48“Kyonkai k'omukuhani araijaga akaleba, akashanga endwara etayagaire mu nju orwo eliba yasilibirwe, aho omukuhani agambe okwo enju elikwera, aha rw'okuba endwara yakizire. 49Aha kwija kuhasilira enju egyo akwate obunyonyi bubili n'akati k'omwelezi n'akendo kalikutukura na hisopo; 50akanyonyi akamoi akaitire omu kikwato ky'eibumba aha maizi galikugera. 51Akwate akati k'omwelezi na hisopo n'akendo kalikutukura, abikwatirane n'akanyonyi akalikurora, abibike omu bwamba bw'akanyonyi ako akaitwa, n'omu maizi galikugera, ashaimulire enju emirundi mushanju. 52Nikwo arahasilira atyo enju n'obwamba bw'akanyonyi kalikurora, n'akati k'omwelezi, na hisopo n'akatambara kalikutukura. 53Ataishure akanyonyi kalikurora karuge omu kigo kagende omw'ishwa. Agilirega atyo enju enyatano, mara yonene erayeraga.”

54Eli nilyo iteka ly'endwara yona yona ey'ebibembe: Ekisheshe, 55ebibembe by'omu mwendo anga by'omu nju, 56ekizimba, anga ekihere, anga ekibamba, 57kumanyisa orwo ekintu kihagaire anga orwo kilikwera. Eli nilyo iteka ly'ebibembe.

Currently Selected:

Eby'abalevita 14: RHAY01

Highlight

Copy

Compare