Yoshua 8

Okukwatwa n'okusilika kwa Ai

1Omukama agambira Yoshua ati, “Otatiina mara otahwahwana. Okwate abaisherukare bona, oimukye ogye Ai. Omukama wa Ai namunaga omu mikono yawe, n'abantube, n'ekigo n'ensiye. 2Okore Ai n'omukama wayo nk'okwo wakozire Yeriko n'omukama wayo. Shana eminyago y'ekigo ekyo n'ebitunganwa bibulimu mugitware. Ekigo mukizimbire mukyemire enyuma.”

3Aho Yoshua aimukya n'abaisherukare bona agya Ai. Aronda abaisherukare emanzi 30,000 abatweka omu kiro. 4Abaragira ati, “Inywe muhunire ekigo mukyemire enyuma, mutakigya harai muno kandi inywena mwikare mwetekatekire, 5Inye n'abantu bona abo nyinabo turagoba aha kigo. Kabarashohora kututera nk'orwa mbere turabairuka. 6Turabaihya omu kigo batuhondere kuba nibaija kugamba bati, ‘Batwiruka nk'orwa mbere.’ Kityo turabairuka, 7aho mwimuke mbali muraba muhunire, mukwate ekigo Omukama Ruhanga wanyu arakinaga omu mikono yanyu. 8Kamuramara kukikwata, mukichumike omuliro nimukora nk'okwo Omukama yaragira; nanye nikwo ndikubaragira.” 9Aha rw'ekyo Yoshua abaragira kugya omu maisho, bagya mbali barazimba, barara omugati ya Beteli na Ai obugwaizoba bwa Ai. Kyonkai kir'ekyo Yoshua arara omu mbaga.

10Yoshua aimuka bwankya karai, ahuruza embaga, agyebembera n'abagurusi ba Isiraeli bagiire Ai. 11Abaisherukare abo yabaire ainabo batemba, bagoba ekigo omu maisho, basisira rubaru orwa bikara bya Ai. Omugati yabo n'ekigo hakaba halimu oruhanga. 12Yoshua akwata abaisherukare 5,000 abateeka, abaragira kuzimba omugati ya Beteli na Ai bwolekera obugwaizoba bw'ekigo. 13Aho bateka eihe lyona elyabaire lili rubaju orwa bikara by'ekigo n'abalinzi ab'enyuma ababaire bali obugwaizoba bw'ekigo ekyo. Kyonkai kir'ekyo Yoshua arara omu ruhanga. 14Omukama wa Ai kayaboine byaba bityo wenene n'embagaye yona y'abanyakigo barahuka, bagenda karai aha busoka obwolekeraine na Araba, kukwatangana na Isiraeli omu ndashana, kyonkai tiyamanyire okwo haliho abamuzimbiire enyuma y'ekigo. 15Yoshua na Isiraeli yona beshushanisa abalikusingwa, bairuka batwetwe ogw'eirungu. 16Nikwo abantu bona ababaire bali omu kigo bahurura kubabinga. Babinga Yoshua babaihya aha kigo. 17Taliho muntu yasigaire mu kigo kya Ai anga Beteli, atashohoire kubinga Isiraeli. Basiga ekigo kirangaire.

18Aho Omukama agabira Yoshua ati, “Imukya eichumu ely'okwete olyolekeze Ai, enshonga ninyija kugikunaga omu mikono.” Yoshua aimukya eichumu elyo yabaire akwete alyolekeize ekigo. 19Ababaire bahunire bajumbuka mbali babaire bali. Kayaimukize ati omukono bairuka, bataha omu kigo bakibunda. Barahuka bakichumika omuliro. 20Aho abantu ba Ai kabakebukire babona omwika gw'ekigo kilikuhya niguchunkera aha iguru; baburwa obwirukiro, aha rw'okuba abantu ababaire bairukire omw'irungu nabo bakakubuka babinga abo ababaire bababingire. 21Yoshua na Isiraeli yona kababoine abahunire okwo bakwata ekigo n'okwo omwika gw'ekigo kilikuhya gulikuchunka, bahinduka baita abantu ba Ai. 22Abaisiraeli abandi baruga omu kigo kubatera; batanga aba Ai embaju zona. Babaita bona, taliho yahungire n'omoi. 23Kyonkai omukama wa Ai bamukwata obunyangaro bamuletera Yoshua.

24Abaisiraeli kabamazire kwita abanyansi bona ba Ai omu kangaratete k'eirungu mbali babaire bababingire bagaruka Ai. Bona aba Ai kuhika ow'enzindo bakaitwa embanda. 25Kir'ekyo abafire bona omuli Ai abashaija n'abakazi bakagoba 12,000. 26Yoshua orwo yaimukize eichumu tiyagwisize mukono, kuhika orwo yabaisire hakabamaraho. 27Ebitunganwa byonkai n'eminyago y'ekigo nibyo Abaisiraeli batwete nk'okwo Omukama yabaire aragiire Yoshua. 28Aho Yoshua ayokya Ai, agihindura ndaara, esigara amatongo ebiro byona na mambwenu. 29Ahanika omukama wa Ai aha muti kugoba bwaigoro. Kalyaizire kutobera Yoshua aragira kabahanantura omutumbigwe bakagunaga aha kihigi ky'ekigo omu kishasi. Bagutumaho entumiro mpango y'amabare gakyabaho na kir'eki.

Amateka nigashomwa aha Ibanga lya Ebali

30Yoshua ayombekera Omukama Ruhanga wa Isiraeli ealutare aha Ibanga lya Ebali. 31Nikwo na Musa omwiru w'Omukama yabaire aragiire Abaisiraeli N'omu Kitabo ky'Amateka ga Musa kikahandikwa kiti, “Altare y'amabare ag'omuntu atagobizeho kikwato kya kyoma.” Bagihongeraho Omukama ebihongo by'okwokibwa, batamba n'ebihongo by'emilembe. 32Aho honene omu maisho g'Abaisiraeli, Yoshua ahandika aha amabare ekopi y'aMateka ga Musa ago wenene Musa yabaire ahandikire. 33Isiraeli yona, omufuruki n'omuzarwa kumoi, n'abagurusi babo n'abakuru, n'abaramuzi babo, bemelera embaju zombili z'Esanduku y'Endagano omu maisho g'abakuhani Abalevita ababaire bagishutwire. Enusu bemelera omu maisho g'Eibanga lya Gerizimu n'enusu omu maisho g'Eibanga lya Ebali nk'okwo Musa omwiru w'Omukama yabaire aragiire obubere abakuhani abo kuha Abaisiraeli omugisha. 34Ahanyuma ashoma Amateka gona: Omugisha n'omuraamo bibulimu, nk'okwo byahandikirwe omu Kitabo ky'Amateka. 35Taliho kigambo na kimoi ahali byona ebyo Musa yaragiire ebyo Yoshua atashomeire nteko yona ya Isiraeli, abakazi, abana nangu n'abafuruki bona abaturagamu.

Currently Selected:

Yoshua 8: RHAY01

Highlight

Copy

Compare