Yoshua 7

Obufu bwa Akani

1Abaisiraeli tibagizire bwesigwa aha bintu ebyabaire bihongirwe. Akani eya Karimi, Karimi eya Zabudi Zabudi eya Zera ow'oruganda rwa Yuda, aina ebyo yaihireho. Omukama anigalira muno Isiraeli.

2Yoshua ayema Yeriko atuma abantu Ai. Ai kigo ekyataine Betiaveni, oburugaizoba bwa Beteli. Abagambira ati, “Mugende munyomoize ensi.” Abantu abo bagenda banyomoza Ai. 3Bagaruka ahali Yoshua, bamugambira bati, “Abaisherukare batagenda bona, shana nka 2,000 anga 3,000 bonkai babe nibo bagenda bakatera Ai. Otatwekayo bona kubalemesa bushai, kuba namwo abantu bamwo bake.” 4Abaisherukare nka 3,000 bagyayo, kyonkai aba Ai babasinga. 5Baitaho abantu makumi gashatu na mukaga, bababinga kwema aha kihigi babagobya Shebarimu, babatemera aha busoka; Abaisiraeli bahukuka emitima.

6Aho Yoshua atagura emyendoye, ajumara ahansi omu maisho g'Esanduku y'Omukama kugoba bwaigoro, hamoi n'abagurusi ba Isiraeli. Betuumulira echuchu aha mitwe. 7Yoshua agamba ati, “Yo, waitu Mukama Ruhanga, oshaabuliireki abantu aba Yorudani kutunaga omu mikono y'Abaamori kutusilikya? Kyakumazire katwakutwire buseli bwa Yorudani! 8Waitu Mukama, ngambeki orwo Abaisiraeli bairuka ababisha babo bhakabatera emigongo? 9Abakanaani n'abanyansi bamwo bona nibaija kuhulira ekigambo eki batuzingore, batusilikye batumare omu nsi. Orakoraki kulinda ekitinwa kyawe ekikuru kityo?”

10Omukama agambira Yoshua ati, “Imuka! Kubaki wajumara ahansi oti? 11Abaisiraeli bafakaire bachwa endagano yange eyo nabaragiire. Batwete ebihongo, baiba mara babeiya, babiteranisize n'ebyabo. 12Aha rw'ekyo tibashobora kusinga babisha babo. Nibabairuka aha rw'okuba babaire b'okusilika. Tingendelere kwikara na inywe eminyago eyo mwinayo kamutagitambire kitambo kya kwokibwa. 13Imuka ohasilire embaga mara ogambe oti, ‘Mweshemeze aha rwa bukeire Omukama Ruhanga wa Isiraeli nagamba ati, “Halimu Abaisiraeli abaina eminyago ehongirwe, kityo timushobora kusinga babisha banyu kuhika orwo murataishura eminyago egyo eyo mwinayo.” 14Aha rw'ekyo bwankya babalete kuhonderana n'enganda zanyu. Oruganda orw'Omukama ararondamu rwije omu maisho kuhonderana n'ebika byarwo. N'ekika eky'ararondamu kije omu maisho kuhonderana n'amaka okwo gali. Eka eyo ararondamu eije omu maisho, ab'eka egyo baije nibahonderana. 15Omuntu arakwatwa aina eminyago etangirwe bamwokye, n'eby'ainabyo byona aha rw'okuba achwire endagano y'Omukama, mara akozire eihano yagora Isiraeli.’ ”

16Kityo Yoshua aimuka bwankya karai, ahuruza Isiraeli oruganda aha rundi; oruganda rwa Yuda rukwatwa. 17Ayeta ebika byarwo, ekika ky'Abazera kikwatwa. Ayeta ekika ky'Abazera omuntu ah'ondijo, Zabudi akwatwa. 18Ayeta omutungogwe omuntu ah'ondijo, Akani eya Karimi, Karimi eya Zabudi, Zabudi eya Zera ow'oruganda rwa Yuda akwatwa. 19Aho Yoshua agambira Akani ati, “Mwana wange, ohe Omukama Ruhanga wa Isiraeli ekitinwa omuhaisilize, mara aha ongambire eky'okozire, otakinshereka.” 20Akani amuhorora ati, “Eky'amazima, inye nfakaliire Omukama Ruhanga wa Isiraeli; mara ekyo nkozire niky'eki: 21Kamboine omu minyago ebebo nungi eya Babiloni n'ekilo nka ibili z'efeza n'omuti gw'ezahabu nk'enusu kilo nabyegomba nabitwara. Mbishelekire omw'itaka omwange omw'ihema. Efeza eli ahansi yabyo.”

22Yoshua atuma entumwa ziruka zigiire omw'ihema, zishanga okwo ebebo agishelekirekwo mwonene. 23Babiihyamu babimutwalira omu maisho g'Abaisiraeli bona. Babihumuza ahansi omu maisho g'Omukama. 24Aho Yoshua na Isiraeli yona bakwata Akani eya Zera, n'efeza, n'ebebo, n'omuti gw'ezahabu n'abatabani n'abahara, n'enteze, n'endogobe n'entaama, n'eihemalye n'ebindi byona ebyo yabaire ainabyo, babatwara omu Ruhanga rwa Akori. 25Yoshua amubaza ati, “Kubaki otwisire kubi? Kir'eki Omukama nakubonesa enaku.” Isiraeli yona emuteza amabare, n'aba wenene babokya n'omuliro. 26Bamutuumaho entuumo mpango y'amabare ekyaliho na kir'eki. Aho Omukama ahwa ekinigakye ekingi. Aha rw'ekyo kuhika mwaha omwanya ogwo gwetwa Ruhanga rwa Akori.#7:26 Akori Nizo naku.

Currently Selected:

Yoshua 7: RHAY01

Highlight

Copy

Compare