Yoshua 4

Amabare g'akaijukiro nigasimbwa

1Eihanga lyona kalyamazire kushabuka Yorudani, Omukama agambira Yoshua ati, 2“Oihye abashaija 12 omu mbaga, buli ruganda omushaija omoi. 3Obaragire oti, ‘Mwihye amabare 12 omu ndaragati ya Yorudani honene honene mbali abakuhani baba bemeleire, mushabuke nago mugateke mbali murashura kir'eki.’ ” 4Aho Yoshua ayeta abashaija 12 kuruga omu Baisiraeli abo yabaire ataireho, buli ruganda omushaija omoi; 5abagambira ati, “Murabe omu maisho g'Esanduku y'Omukama Ruhanga wanyu omu ndaragati ya Yorudani, buli muntu atware eibare aha ibega, kuhonderana n'orubara rw'enganda z'Abaisiraeli. 6Ako kaliba kabonero ahali inywe orwo baijukuru banyu balibaza biro ebilija bati, ‘Amabare aga gaina nshongaki omuli inywe?’ 7Aho mubagambire okwo amaizi ga Yorudani gayemeleire orwo Esanduku y'Endagano y'Omukama ebaire neshabuka Yorudani egyo gakomeera. Nikwo amabare aga Abaisiraeli baligaijukiraho ebiro byona.”

8Abashaija ba Isiraeli bakora okwo Yoshua yabaragira, baihya amabare 12 omu ndaragati ya Yorudani, kuhonderana n'orubara rw'enganda z'Abaisiraeli, nk'okwo Omukama yagambire Yoshua. Bashabuka nago bagatwara mbali basisiire baba niho bagatuura. 9Kandi Yoshua agasimba omu ndaragati ya Yorudani mbali abakuhani babaire balibasire orwo babaire bashutwire Esanduku y'Endagano. Mara gakyhalimu na kir'eki. 10Ababaire bashutwire Esanduku bakemelera omu ndaragati ya Yorudani kuhika orwo eby'Omukama yabaire agambiire Yoshua kugambira embaga byagobeleire byona.

Embaga erahuka eshabuka. 11Kabamazire kushabuka bona, Esanduku y'Omukama n'abakuhani bashabuka, bebembera embaga. 12Abarubeni n'Abagadi n'enusu y'oruganda rwa Manase, bashabuka bakwete ebikwato by'endashana bebembeire Abaisiraeli nk'okwo Musa yabaire abaragiire. 13Abantu nka 40,000 abakwete ebikwato by'endashana baraba omu maisho g'Omukama kugya omu ndashana omu miteleka ya Yeriko. 14Kiro ekyo Omukama akuza Yoshua omu maisho g'Abaisiraeli bona, bamutina nk'okwo batinaga Musa oburorabwe bwona.

15Omukama agambira Yoshua ati, 16“Oragire abakuhani abatwete Esanduku y'Endagano baruge omuli Yorudani.” 17Aha rw'ekyo Yoshua abaragira ati, “Muruge omuli Yorudani.” 18Orwo abakuhani babaire batwete Esanduku y'Endagano y'Omukama barugire omuli Yorudani bakalibata aha rukaru, amaizi ga Yorudani gagaruka omu mwanya gwago, gaijura gashaga enkungu zagwo zona nk'orwa mbere.

19Aha kiro kya ikumi ky'omwezi gwa mbere nirwo ebaga yashabukire Yorudani ekasisira Giligali oburugaizoba omu rubibi rwa Yeriko. 20Amabare galinya ikumi na gabili ago baihire omuli Yorudani, Yoshua agasimba omuli Giligali. 21Agambira Abaisiraeli ati, “Biro ebilija abana banyu kabalibabaza bati, ‘Amabare aga gaina nshongaki?’ 22Aho mubahorore muti, ‘Abaisiraeli bakashabuka Yorudani eyomire.’ 23Mubagambire okwo Omukama Ruhanga wanyu yayomize amaizi ga Yorudani nk'okwo yatukoleire aha Nyanja Rutuku kuhika orwo mwashabukire. 24Nirwo amahanga gona g'ensi galimanya okwo obushobora bw'Omukama buba bw'amani; na inywe aho mutine Omukama Ruhanga wanyu ebiro byona.”

Currently Selected:

Yoshua 4: RHAY01

Highlight

Copy

Compare