Yoshua 3
3
Abaisiraeli nibashabuka Yorudani
1Bwankya karai Yoshua aruga Shitimu n'Abaisiraeli bona bagoba Yorudani, bararaho tibashabukire. 2Ebiro bishatu kabyahingwire, abatwazi baraba omu rusisira 3baragira embaga bati, “Kamurabona Esanduku y'Endagano y'Omukama Ruhanga waitu eshutwirwe abakuhani Abalevita, muruge mbali muraba muli mugihondere. 4Nirwo muramanya omuhanda ogwo murarabamu, kuba timukagurabaga. Kyonkai hasigarwemu omwanya omugati yayo na inywe, nk'ekilomita emoi. Mutagigoba haihi.” 5Ashuba abagambira ati, “Mwehasilire kuba bukeire Omukama naija kubakolera ebitangazo.” 6Agambira n'abakuhani ati, “Mwetweke Esanduku y'Endagano murabeho mwebembere embaga.” Bagyetweka bagenda bebembeire embaga.
7Omukama agambira Yoshua ati, “Kir'eki nabanza kukukuza omu maisho ga Isiraeli yona, nirwo baramanya okwo ndaba hamoi na iwe nk'okwo mbaire ndi na Musa. 8Iwe oraragira abakuhani abetwekire Esanduku y'Endagano oti, ‘Kamuragoba aha rukunakune rw'amaizi ga Yorudani, mwemelere omu maizi.’ ” 9Yoshua agambira Abaisiraeli ati, “Mwije aha muhulire okwo Omukama Ruhanga wanyu yagamba.” 10Abagambira ati, “Aha niho muramanyira okwo Ruhanga nyamurora atulimu, n'okwo arabingira kimoi omu maisho ganyu Abakanaani, Abahiti, Abahivi, Abaperizi, Abagirigashi, Abaamori n'Abayebusi. 11Leba, Esanduku y'Endagano y'Omukama w'ensi yona, neshabuka ebebembeire omuli Yorudani. 12Mbwenu aha rw'ekyo muronde abashaija 12 omu nganda za Isiraeli, omoi kuruga buli ruganda. 13Orwo abakuhani abetwekire Esanduku y'Omukama w'ensi yona baralibata omu maizi ga Yorudani, garalekera kugera, agalikuruga oruguru garayemelera gabe ntuumo emoi.”
14Kityo orwo abantu barugire omu mahema gabo kushabuka Yorudani n'abakuhani batwete Esanduku y'Endagano babebembeire 15aho ababaire betwekire Esanduku kabagobire Yorudani, kulibata bati omu maizi (Yorudani eijura eshaga enkungu zayo omu biro byona by'amagesha), 16amaizi agabaire nigaruga oruguru gemelera, gaijura gakanga eiguru ahali Adamu, ekigo ekyataine Zaretani. Amaizi agabaire nigagera gatahire Enyanja ya Araba niyo, Nyanja y'Omwonyu, gomeera, abantu bashabuka bolekeire Yeriko. 17Abaisiraeli bona orwo babaire nibashabuka aha rukaru, abakuhani ababaire betwekire Esanduku y'Endagano y'Omukama, bemelera omu ndaragati ya Yorudani aha rukaru, kuhika orwo eihanga lyona lyamazire kushabuka.
Currently Selected:
Yoshua 3: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
