Yoshua 11

Yoshua nasinga Yabini n'abajunibe

1Orwo Yabini omukama wa Hazori yahuliire ebyo, atuma ahali Yobabu omukama wa Madoni, n'aha mukama wa Shimuroni, n'aha mukama wa Akishafu, 2n'aha bakama ababaire bali bikara omu nsi z'amabanga, n'omuli Araba orubaju rwa kasi rwa Kinereti, n'omu nsi y'omuteleka, n'omuli Dori obugwaizoba; 3n'omu Bakanaani oburugaizoba n'obugwaizoba, Abaamori, Abahiti, Abaperizi n'Abayebusi n'omu nsi z'amabanga n'Abahivi omu kibazi ky'Eibanga lya Herimoni omu nsi ya Mizipa. 4Batabara n'amahe gabo gona. Abantu obungi nk'omushenye gw'omwaro, baina n'efarasi zingi n'amagali gangi muno. 5Abakama abo bona bateranisa amahe gabo, baija basisira hamoi aha Kaiga ka Meromu kurashana na Isiraeli.

6Omukama agambira Yoshua ati, “Otabatina, aha rw'okuba nyenkya akanya nk'aka ndabakuheleza bona bafire, aha rwa Isiraeli. Olemaze efarasi zabo, amagali gabo ogokye n'omuliro.” 7Kityo Yoshua n'abaisherukarebe babagwamu kibandagara aha Kaiga ka Meromu, bababunda. 8Omukama abanaga omu mikono y'Abaisiraeli, babaita, abandi bababinga kuhika Sidoni Engundu na Misirefotimaimu, n'oburugaizoba babagobya omu Ruhanga rwa Mizipa; babaita, tibasigireho n'omoi. 9Yoshua akora nk'okwo Omukama yamugambiire, alemaza efarasi zabo, ayokya amagali gabo n'omuliro.

10Aho agaruka akwata Hazori, omukama wamwo amwisa embanda. Orwa mbere Hazori ekaba nekiza amani ebigo by'abakama balinya bona. 11Abaturagamu bona babaisa embanda. Babasilikiza kimoi, thalimu yasigairemu n'omoi, n'ekigo akitaho omuliro. 12Ebigo byona by'abakama abo n'abakama babyo, Yoshua abakwata abaisa embanda. Abasilikiza kimoi nk'okwo Musa omwiru w'Omukama yaragiire. 13Kyonkai Abaisiraeli tibayokize bigo byona byona ebyabaire bili aha tubanga shana Hazori yonkai niyo Yoshua yayokize. 14Ebintu by'ebigo ebyo n'ebitunganwa Abaisiraeli babinyaga, kyonkai abantu bhakabaisa embanda babasilikya. Tibasigireho n'omoi. 15Nk'okwo Omukama yabaire ahangiire omwiruwe Musa, nikwo na Musa wenene yaragiire Yoshua, Yoshua nawe nikwo yakozire. Eby'Omukama yabaire ahangiire Musa, Yoshua akabikora byona.

Ensi eyakwetwe Yoshua

16Yoshua akwata ensi egyo yona, ey'amabanga na Negebu yona, eya Gosheni n'ensi y'omuteleka na Araba n'ensi y'amabanga ga Isiraeli n'omuteleka gwayo. 17Ayema aha Ibanga lya Halaki elilebangaine na Seiri agoba Baaligadi omu Ruhanga rwa Lebanoni omu kibazi ky'Eibanga lya Herimoni. Akwata abakama bamwo bona, abatera abaita. 18Kyonkai akarashana nabo ebiro bingi. 19Taliho kigo kyagizire mirembe n'Abaisiraeli, kwihyaho Abahivi, abanyansi ba Gibeoni. Abasigaire bhakabakwata bona omu ndashana. 20Omukama hakabagumanganisa emitima akigendeleire, barashane n'Abaisiraeli. Abaisiraeli tibabagiliire buganyizi. Bakabasilikya nk'okwo Omukama yabaire ahangiire Musa.

21Omu biro ebyo Yoshua agya asilikya Abaanaki b'omu mabanga, n'aba Heburoni, Debiri na Anabu n'omu mabanga ga Yuda n'omu mabanga gona ga Isiraeli. Yoshua abasilikiza kimoi n'ebigo byabo. 22Taliho Muanaki n'omoi yasigaire mu nsi y'Abaisiraeli shana omuli Gaza mwonkai, n'omuli Gati na Ashidodi nimwo basigaire bake. 23Ensi agikwata yona nk'okwo Omukama yabaire agambiire Musa. Yoshua agiha Isiraeli obusika bwabo kuhonderana n'enganda zabo. Aho ensi echulera eba etakiina ndashana.

Currently Selected:

Yoshua 11: RHAY01

Highlight

Copy

Compare