Abaramuzi 6
6
Abamidiani nibabonesa Isiraeli enaku
1Abaisiraeli bakagokera Omukama; aho yabanaga omu mikono y'Abamidiani emyaka mushanju. 2Abamidiani bakiza Abaisiraeli amani. Aha rw'Abamidiani, Abaisiraeli balima ebinyanga omu mabanga, bakora n'empako n'eboma kweshelekamu. 3Aha rw'enshonga omu Baisiraeli orwo kyabaga kirumo ky'okulima, nirwo Abamidiani n'Abaamaleki n'amahanga g'oburugaizoba babatabaliraga. 4Basisira kubarashanisa mara basilikya n'emyaka, kulemwa kwija bwatana Gaza, obuzira kusigira Isiraeli ekyakulya, entaama anga ente n'endogobe. 5Baijaga bangi nk'enzige, n'ebitunganwa byabo n'amahema gabo. Bonene n'engamia zabo tibakushoboire kubarwa, kityo kumara kutaha omu nsi bagihindura mparamata. 6Abamidiani batera muno Isiraeli ahansi; aho Abaisiraeli batakira Omukama k'abajuna.
7Orwo Abaisiraeli batakiire Omukama nibazira Abamidiani, 8Omukama yabatwekera omurangi, abagambira ati, “Omukama Ruhanga wa Isiraeli nagamba ati, ‘Nkabaihya Misiri omu bwiru. 9Nkabaihya omu mikono y'Abamisiri na bona ababaire nibabaita kubi, nababinga orwo mulikutaha omu nsi yabo nagibaha.’ 10Nkabagambira nti, ‘N'inye Omukama Ruhanga wanyu; mutaliha kitinwa baruhanga b'Abaamori abo mulikutura omu nsi yabo.’ Kyonkai ebyo nabagambire timwabihuliire.”
11Omumalaika w'Omukama aija ashuntama aha mwaloni gwa Yoashi Omwabiezeri ahali Ofura, orw'omutabani Gideoni yabaire natera engano omw'ijungiro ly'edivai, kugisheleka Abamidiani. 12Amubonekera amugambira ati, “Omukama aina iwe, iwe manzi y'omushaija w'amani.” 13Gideoni amugambira ati, “Rugaba, k'Omukama araba aina ichwe, ahonu kubaki ebi byona bitugwireho? Isi ebitangazobye ebyo batataichwe batubaruliraga bati, ‘Omukama akatwihya Misiri!’ Kyonkai mbwenu Omukama atuhoiremu yatunaga omu mikono y'Abamidiani.” 14Omukama ahinduka amugambira ati, “Ogende n'amani gawe aga, oihure Isiraeli omu mikono y'Abamidiani; alikukutuma n'inye.” 15Gideoni amubaza ati, “Waitu Mukama, nakurokora ntai Isiraeli? Leba oruganda rwange rujege muno omuli Manase, kandi nanye ndi muke muno omu ka ya tata.” 16Omukama amugambira ati, “Kyonkai ndakwemamu oite Abamidiani oti noita omuntu omoi.” 17Gideoni amugambira ati, “Mbwenu onsingire onyoleke akabonero okwo niwe olikufumora nanye. 18Otaruga hanu olikasinga, kuhika orwo ndakuletera egabo yange nkagikuteka omu maisho.” Omukama agamba ati, “Ndaikaraho kuhika orw'oragaruka.”
19Aho Gideoni ataha omwe, aita omwana gw'embuzi, ataho n'obukeki butatumbisiibwe obw'ekilo ikumi z'ensano. Enyama agiteka omu kiibo, kandi omukubi aguteka omu nyungu, abimuletera aha mwaloni abimubonekya. 20Omumalaika wa Ruhanga amugambira ati, “Okwate enyama n'obukeki butatumbisiibwe obiteke aha rwazi obishesheho omukubi.” Gideoni akora atyo. 21Aho omumalaika w'Omukama araisiliza akora aha nyama n'aha bukeki butatumbisiibwe akozaho enshonga y'enkoni eyo yabaire akwete. Omuliro gufumuka omu rwazi gwokya bwokya enyama n'obukeki butaina itumbyo; kandi amubura aha maisho. 22Aho Gideoni amanya okwo yabaire ali mumalaika w'Omukama. Agamba ati, “Waitu Mukama Ruhanga! Mbwenu nabonangana n'omumalaika wawe.” 23Kyonkai Omukama amugambira ati, “Ogire emilembe, otatina, tofe.” 24Aho Gideoni ayombekeraho Omukama alutare, agyeta “Omukama milembe.” Kugoba kir'eki ekyayemeleire Ofura ey'Abaabiezeri.
Gideoni nakambura alutare ya Baali
25Omu kiro omwo, Omukama agambira Gideoni ati, “Okwate enumi ya sho, enumi eya kabili ebe eina emyaka mushanju, okambure elutare eyo sho yayombekeire Baali, oshube oteme Ashera egili aha rubaju. 26Oyombekere Omukama Ruhanga wawe elutare eiguru y'eboma hanu aha, amabare gagyeho kurungige. Aho okwate enumi eya kabili ogihonge ekihongo ky'okwokibwa, okyokese Ashera ez'oratema.” 27Kityo Gideoni akwata abairube 10, akora nk'okwo Omukama yabaire amugambiire. Kyonkai aha rw'okutina abanyarugandabe n'abanyakigo kukikora bwamushana, akakikora ekiro.
28Orwo abanyakigo baimukire omu rubungubungu, leba elutare ya Baali ekambwirwe na Ashera aha rubaju rwayo etemirwe, n'enumi ya kabili ehongirwe aha elutare eyabaire eyombekirwe. 29Babazangana bati, “Ayakora ati n'ohai?” Kababaire bahigahigire, babalize, bagamba bati, “Gideoni mutabani wa Yoashi niwe yakora atyo.” 30Aho abanyakigo bagambira Yoashi bati, “Oshohoze mutabani wawe afe, enshonga yakambura elutare ya Baali, na Ashera eyaba eli aha rubaju yagitema.” 31Kyonkai Yoashi abaza ababaire bamuzinzire ati, “Nimurwanilira Baali? Anga nimwenda kumurabira? Wena wena aramurwanilira bamwite bwankya obu. K'araba ali ruhanga ayerwanilire orwo bakambura elutareye.” 32Aha rw'ekyo kir'ekyo Gideoni bamweta Yerubaali, nikwo kugir'oti, “Baali amurwanise,” enshonga akakambura elutareye.
Gideoni nayeta Isiraeli kurashana
33Abamidiani bona n'Abaamaleki n'abantu b'oburugaizoba bahikana bashabuka Yorudani basisira omu Ruhanga rwa Yezireeli. 34Kyonkai Mwoyo wa Mukama atungamira Gideoni; Gideoni atera enzamba Abaabiezeri kuturuka kumuhondera. 35Atuma entumwa omuli Manase yona kubeta kumuhondera. Atuma entumwa ezindi Asheri, Zabuloni na Nafutali; batemba kubabuganganwa.
Akabonero k'oruhu rw'entaama
36Gideoni agambira Ruhanga ati, “K'oraba orarokoza Isiraeli amani gange nk'okwo ogambire, 37leba, nayara oruhu rw'entaama aha rwano. K'oruhu rushai ruragira orume, ensi yona ekoma, aho ndamanya okwo orarokoza Isiraeli amani gange nk'okw'ogambire.” 38Mara nikwo byhakabaire. Orwo Gideoni yaimukire omu rubungubungu, oruhu akarukamuramu orume rungi orw'okwijuza epakuli. 39Aho agambira Ruhanga ati, “Otangilira kiniga. Kangambe eli limoi lyonkai; ninshaba ndengese oruhu rw'entaama eli limoi lyonkai; ninshaba oruhu rushai rwome, kandi ensi yona egire orume.” 40Ruhanga aba nikwo akora atyo omu kiro omwo, enshonga oruhu rushai nirwo rwasigaire rwomire, kandi ensi yona yagira orume.
Currently Selected:
Abaramuzi 6: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
