Abaramuzi 5
5
Ekizina kya Debora na Baraki
1Kir'ekyo Debora na Baraki eya Abinoamu bazina bati,
2“Kubona okwo abebembezi bahabura Isiraeli,
kubona okwo abantu bayehayo n'obweyendezi.
Muhaisilize Omukama.
3Muhulire inywe bakama,
mutege amatwi inywe barangira;
nzinire Omukama,
nzinire Omukama Ruhanga wa Isiraeli ekizina kilikunura.
4Waitu Mukama, orwo warugire Seiri,
orwo warugire omu nsi ya Edomu,
ensi ekatengeta, eiguru lyayoroba,
ego, ebichwi byayagilira.
5Amabanga gakatengeta omu maisho g'Omukama,
nangu na Sinai elinya,
omu maisho g'Omukama Ruhanga wa Isiraeli.
6Omu biro bya Shamugari eya Anati,
omu makiro ga Yaeli,
emihanda ekaba etakirabwa,
abagenzi batwarwaga ey'emparo.
7Abatwazi bakachweka omuli Isiraeli; bakachweka,
kuhika orwo waimukire, iwe Debora,
orwo waimukire oli nyinabantu omuli Isiraeli.
8Orwo baronzire baruhanga abahya,
aho endashana yagoba omu bihigi.
Engabo anga eichumu bikaba bitakiboneka,
omu bukumi bunai bwa Isiraeli.
9Omutima gwange nigurongotokera abakuru ba Isiraeli,
abayehayo omu bantu n'obweyendezi.
Muhaisilize Omukama.
10Inywe abakuuba endogobe zilikwera,
inywe abashuntama aha mikeka y'eiguzi;
na inywe abagenza amaguru omu kihanda,
mukigambeho.
11Muzine nk'okw'obona abashumba bali aha kyoshero#5:11 Kyoshero Mbali banyoisheza ebitunganwa.,
niho bahaisililiza Omukama asinga,
ebikorwabye by'oburokozi omu byaro bya Isiraeli.
Aho embaga y'Omukama basongokire bolekeire ebihigi.
12Sisimuka, sisimuka Debora!
Sisimuka, sisimuka, ozine ekizina.
Imuka, Baraki, ofunye endore zawe,
iwe mutabani wa Abinoamu.
13Aho abarangira abasigaireho basongoka,
abantu b'Omukama basongoka kumurashanira,
kurashanisa ab'amani.
14Baruga Efuraimu, baija omu ruhanga,
Benjamini akuhondeire n'abanyaruganda bawe.
Abakuru b'amahe basongoka barugire Makiri,
omuli Zabuloni harugayo balinya
abakwete enkoni y'omukuru w'eihe;
15abarangira ba Isakari baija na Debora,
mara Isakari mwesigwa ahali Baraki;
bairuka batahire omu ruhanga bamukuratiire aha bilenge.
Omu nganda za Rubeni,
bakebaza eby'amaani omu mwoyo.
16Kubaki wazebeire omu biraro by'entaama,
kuhuliliza emilere yobalikuzitelera?
Omu nganda za Rubeni
bakebaza eby'amaani omu mwoyo.
17Gileadi akaikara buseli bwa Yorudani;
kandi Dani kubaki yaikaire omu meli?
Asheri yashuntama bunyanungi aha mwegego gw'enyanja,
yatura omu myaro yayo.
18Zabuloni bantu abayenagire omu kabi bakeisa,
Nafutali kwakwo omu nshozi z'eirungu.
19Abakama bakaija lyarashana,
aho abakama ba Kanaani lyarashana,
ahali Taanaki, bwatana aha migera ya Megido,
tibakwese minyago ya feza.
20Enyanyinyi zayema omw'iguru zarashana,
zayema omu mihanda yazo zarashanisa Sisera.
21Engezi ya Kishoni yabatwara,
engezi y'amani, engezi ya Kishoni.
Shaya mwoyo gwange, tamu amani!
22Aho ebinono by'efarasi byakuntira muno,
orwo zilikwiruka nizikina, nizikina efarasi.
23Muraame Merozi, malaika w'Omukama yagamba,
murame kubi abatuzi bamwo,
aha rw'okuba tibaizire kujunira Mukama,
kujunira Mukama omu ndashanaye n'abanyamani.
24Yaeli omu bakazi abe muberwa muno,
muka Heberi Omukeni,
muberwa muno omu bakazi bakatura omu mahema.
25Akamwenza amaizi yamuha amata,
yamuletera amashununu omu pakuli y'ekitinwa.
26Omukonogwe yaguta aha mambo y'eihema,
n'omukonogwe gwa bulyo aha nyondo y'ababuya;
yabaikura Sisera, yamushekenyura omutwe,
yamwatayata hakabaibai, yamuchumita.
27Sisera akabutama, yagwa,
Yarambira omu maguru ga Yaeli,
akabutama omu maguru ga Yaeli, yagwa;
mbali yabutamire niho yagwire.
28Akalinguliza omw'idirisha,
nyina Sisera akalebera omu kihuru ky'edirisha;
kubaki egaliye yakelererwa kwija!
Kubaki akahiliro k'amagalige kakelererwa?
29Abamikazibe abagezi bahorora,
kyonkai na wenene kwakwo yayehorora;
30Tiwakushanga bakwasayo eminyago bhaliho nibagishonda?
Buli mushaija omuzana anga babili
Sisera yakwasa eminyago y'emyendo ezigire,
eminyago y'emyendo ezigire efumirwe
emitanda yange ebili ezigire efumirwe,
eminyago y'okujwara omu ngoto.
31Mukama osingire,
ababisha bawe basilike batyo.
Kyonkai batahi bawe bashane eizoba
okwo lishabuka n'amani.”
Aho ensi egira emilembe emyaka 40.
Currently Selected:
Abaramuzi 5: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.