Obwijukiro 4

Musa nahana Abaisiraeli kababa besigwa

1“Mbwenu iwe Isiraeli, hulira ebiragiro n'emigenzo ebyo ndikukwegesa, obikore nirwo olirora, okataha omu nsi ey'Omukama Ruhanga wa bashwenkuru alikwija kubaha. 2Mutalyongera aha kigambo ekyo ndikubaragira anga kugira ekyo mwaihyaho, nirwo mulibona kukwata emihango y'Omukama Ruhanga wanyu eyo ndikubaragira. 3Mweboneire byona eby'Omukama akozire aha Ibanga lya Peori. Omuli inywe abafukamiire Baali owa Peori abaisire bona. 4Kyonkai inywe abamugumireho na mwaha nimurora. 5Mbegesize ebiragiro n'emigenzo nk'okw'Omukama Ruhanga wange yandagiire kamubikora omu nsi eyo mwaija kutahamu kugilya. 6Mubikwate mara mubihondere nirwo amahanga galibona okwo mwina obumanyi n'amagezi. Orwo balihulira ebiragiro ebi baligamba bati, ‘Mazima eihanga lihango eli bantu b'obumanyi n'amagezi.’ 7Haliho ihangaki elihango elina ruhanga alili haihi nk'okwo Omukama Ruhanga waitu ali ahali ichwe, rwona rwona orwo tumutakira? 8Isi bhaliho ihangaki elihango elina ebiragiro n'emigenzo emirungi nk'Amateka aga gona ago ndikubaha kir'eki?”

9“Ekikuru oyelinde, n'omwoyo gwawe ogulinde n'obwegendeleza otakwija okebwa eby'amaisho gawe gaboine, kandi bitaija bikakuruga aha mutima ebiro byona eby'oburora bwawe. Obimanyise abana bawe na baijukuru bawe 10okwo aha kiro ekyo wayemeleire omu maisho g'Omukama Ruhanga wawe, ahali Horebu#4:10 Horebu Niyo Sinai., Omukama akangambira ati, ‘Mpuruliza abantu, nyije mbagambire bahulire, baije bege babone kuntina ebiro byona ebyo balitura omu nsi, mara baije begese batyo n'abana babo.’ ” 11Mukailira haihi mwayemelera aha kibazi ky'eibanga orwo lyabaire nilyaka omuliro nigugoba eiguru, libunzirwe n'omwika gutali guke. 12Aho Omukama akabagambira ayemire omu muliro. Mukahulira nangambira kyonkai timwamuboine aha maisho; mukahulira eiraka lyonkai. 13Akabagambira ebyo muragiirwe kukora kuhikya endagano eyo yakozire nainywe, niyo mihango ikumi; mara akagihandika aha mbengo ibili z'amabare. 14Omu kanya ako akandagira kambegesa ebiragiro n'emigenzo kamubigobesheleza omu nsi eyo mukwatilire kutahamu kugilya.

Musa natanga abantu kufukamira ebishushani

15“Aha rw'ekyo mwelinde muno. Nk'okwo mutaboine mishusire yona yona orwo Omukama yabagambiire muli Horebu ayemire omu muliro, 16mwekenge mutaija mukakora kubi kubaija ekishushani ky'ekintu kyona kyona, kyaba kishaija anga kikazi. 17Mutalikora kishushani kya kigunju anga eky'ekinyonyi kyona kyona, 18anga eky'ekyekurura aha itaka, anga eky'enfuru. 19Oyelinde otakuraramira otaija okabona eizoba, okwezi n'enyanyinyi ezitaina rubara, okabifukamira mara okabikolera. Ebintu ebyo Omukama Ruhanga wawe akabiha abantu bona omu nsi yona, kyonkai bonene babifukamira. 20Nawe inywe Omukama akabakwata yabaihya omu kyokezo ky'ekyoma omuli Misiri, mubone kuba bantu ba wenene nyabwe nk'okwo muli kir'eki. 21Kushagaho Omukama akannigalira yantura ebyo mwagambire, yanahira okwo ntalishabuka Yorudani, n'okwo ntalitaha mu nsi nungi ey'alikwija kubaha obusika. 22Nindagirwa kugwa omu nsi egi; tindi wa kushabuka Yorudani, kyonkai inywe murashabuka mulye ensi nungi egyo. 23Mwelinde mutalyebwa ndagano y'Omukama Ruhanga wanyu eyo yakozire nainywe, mukabaija kishushani kyona kyona eky'Omukama Ruhanga wanyu yabatangire. 24Aha rw'okuba Omukama Ruhanga wanyu nashusha omuliro ogusosotora; agira eibuba.”

25“N'orwo muliba mwatwire omu nsi egyo eibanga lirai, mwazaire abana mwagizire n'abaijukuru, kamulikora kubi mukabaija ekishushani kyona kyona, mukagokera Omukama Ruhanga wanyu mukamunigaza, 26ninjulira eiguru n'ensi okwo mulisilika kubi muhwe omu nsi eyo mulikwija kulya mushabukire Yorudani. Timuligituramu ibanga lirai, mulisilika kubi. 27Omukama alibanaganaga omu mahanga, na yonene kulinya mulisigaraho bake. 28Kulinya mulikolera baruhanga abakozirwe abantu omu miti n'amabare, abatalikubona anga kuhulira, anga kulya, anga kunukiliza. 29Kyonkai kulinya kamulihiga Omukama Ruhanga wanyu n'omutima gwanyu gwona n'omwoyo gwanyu gwona, mulimubona. 30Omu biro ebilija kamuliba muli omu biyengo ebi byona, bibagwireho, aho muligarukira Omukama Ruhanga wanyu, muhulire eirakalye, 31ahakuba aba Ruhanga omuganyizi; talibanaga kubasilikya anga kwebwa ndagano eyo yanahiliire bashw'enkurw'inywe.”

32“Mubaze amakuru g'amakiro ag'eirai agabebembeire kwema kiro kili orwo Ruhanga yatonzire omuntu omu nsi; obaze omu nsi yona nk'ekintu eki kirabaireho anga kuhulirwa. 33Haliho abantu abarahuliire eiraka lya ruhanga nagamba ayemire omu muliro nk'okwo muhulire, bakashuba bakarora? 34Haliho ruhanga arazilize kugenda kweihira eihanga omu ihanga elindi n'ebibundo, n'obubonero, n'ebitangazo, n'endashana n'obushobora bungi, hamoi n'eby'okutiinisa muno nka byona eby'Omukama Ruhanga wanyu yabakoleire muli Misiri nimubona? 35Inywe akabiboleka kamumanya okwo Omukama aba Ruhanga; thaliho ondijo atali wenene. 36Akagamba ayemire omw'iguru mwahulira abone kubegesa; kandi omu nsi akaboleka omulirogwe gw'amani, mara mwahulira ebyo yagambiire ayemire omu muliro. 37Kuba akagonza bashw'enkurw'inywe yaronda baijukuru babo, mara yabaihya Misiri omu bushoborabwe obutali buke abebembeire. 38Akabinga amahanga agahango mara againa amani kushaga inywe nywenene nimubona, kubatahya omu nsi yabo k'eba busika bwabo nk'okwo eli kir'eki. 39Mbwenu aha rw'ekyo mumanye mara mukiteke aha mitima okwo Omukama aba Ruhanga omw'iguru n'omu nsi. Thaliho ondijo. 40Aho mukwate ebiragirobye n'emihangoye ebyo ndikubaragira kir'eki, nirwo muligoshoka, hamoi na baijukuru banyu, nirwo mulibona kugira oburora burai omu nsi ey'Omukama Ruhanga wanyu alikubahera kimoi.”

Ebigo by'obuhungiro buseli bwa Yorudani

41Aho Musa aihyaho ebigo bishatu ebili buseli bwa Yorudani oburugaizoba 42eby'omuntu arairukiragamu akahunga kayakwita omuntu atagendeleire, mara ataina bwiko nawe mu biro eby'enyuma. Kimoiho omuli ebyo abe nimwo ahungira batamwita. 43Ekigo kya Bezeri omw'irungu aha muteleka gw'amabanga kibe ky'Abarubeni. Ekigo kya Ramoti omuli Gileadi kibe ky'Abagadi; na Golani omuli Bashani kibe ky'Abamanase.

Omuku gutakaizire

44Aga nigo Mateka ago Musa yahaire Abaisiraeli: 45Egi niyo miku, ebiragiro n'emigenzo ebyo Musa yagambiire Abaisiraeli orwo barugire Misiri 46bakyali buseli bwa Yorudani omu ruhanga orulebangaine n'ekigo kya Betipeori, omu nsi ya Sihoni omukama w'Abaamori, ayaturaga Heshiboni, owo Musa n'Abaisiraeli basingiire orwo barugire Misiri. 47Bakatwara ensiye n'ensi ya Ogi omukama wa Bashani. Bombili aba bakaba bali bakama b'Abaamori, abaturaga oburugaizoba buseli bwa Yorudani. 48Bayemaga Aroeri ekigo ekili aha rukunakune rw'oruhanga rwa Arinoni kulemwa kugoba aha Ibanga lya Sirioni, niyo Herimoni, 49hamoi na Araba yona orubaju rw'oburugaizoba bwa Yorudani kulemwa kugoba Enyanja ya Araba, omu kibazi ky'Eibanga lya Pisiga.

Currently Selected:

Obwijukiro 4: RHAY01

Highlight

Copy

Compare