Obwijukiro 3

Abaisiraeli nibasinga Omukama Ogi

(Orub 21:31-35)

1“Aho tukwata omuhanda turaba Bashani; Ogi omukama wamwo ashohora n'abashaijabe bona kuturashanisa omuli Edirei. 2Kyonkai Omukama angambira ati, ‘Otamutina aha rw'okuba namunaga omu mikono yawe n'abashaijabe n'ensiye. Omukore nk'okwo okozire Sihoni omukama w'Abaamori ayaturaga Heshiboni.’ 3Nikwo Omukama Ruhanga waitu yanagire atyo na Ogi omukama wa Bashani omu mikono yaitu n'abashaijabe bona; tukamutera nangu thaliho yahonokireho. 4Omu kanya kalinya tukakwata ebigobye byona; thaliho kigo na kimoi ekyo tutabakire. Byona hamoi bigo 60; ensi yona ya Arigobu, eyatwarwaga Ogi omukama wa Bashani. 5Ebi byona bikaba bili bigo ebyombekeirwe eboma ziina zirai zina ebihigi n'emihingo, kandi ebyaro bingi ebyabaire bitazitiirwe bitabulimu. 6Tukabasilikya limoi limoi nk'okwo twagizire Sihoni omukama wa Heshiboni. Twasilikya buli kigo, abashaija abakazi n'abana. 7Kyonkai ente zona n'eminyago y'ebigo tukabitwara. 8Kityo omu kanya ako tukanyaga ensi omu mikono y'abakama babili b'Abaamori ababaire bali buseli bwa Yorudani, kwema omu ruhanga rwa Arinoni kugoba aha Ibanga lya Herimoni. 9Eibanga lya Herimoni Abasidoni balyeta Sirioni, kandi Abaamoni balyeta Seniri. 10Tukakwata ebigo byona eby'eiguru y'amabanga na Gileadi yona na Bashani yona, kulemwa kugoba Saleka na Edirei, ebigo by'obukama bwa Ogi owa Bashani. 11Omu Barefai Ogi wenkai omukama wa Bashani niwe yabaire asigaireho. Ekitandakye kikaba kili ky'ebyoma, kili Raba omu kigo ky'Abaamoni. Oburai bwakyo bukaba buli bw'emita inai, n'obukika buli bw'emita nka ibili, kuhonderana n'ebipimo ebya buli kiro.”

12“Orwo twatwete ensi egi rulinya, ensi elikubandiza aha kigo kya Aroeri aha rukunakune rw'oruhanga rwa Arinoni, n'enusu y'amabanga ga Gileadi n'ebigo byayo, byona ebyo nkabiha Abarubeni n'Abagadi. 13Ekichweka kya Gileadi ekisigaire, na Bashani yona, obukama bwa Ogi, nikwo kugir'oti ensi yona ya Arigobu, nkabiha enusu y'oruganda rwa Manase. Bashani yona eyetwa nsi y'Abarefai. 14Yairi Omumanase akalya ensi yona ya Arigobu niyo Bashani, kulemwa kugoba aha rubibi rw'Abageshuri n'Abamaakati, mara ebyaro yabyetelera eibaralye, Havotiyairi, nk'okwo bikyali kir'eki. 15Makiri nkamuha Gileadi; 16n'Abarubeni n'Abagadi nkabaha ensi elikwema Gileadi kulemwa kugoba Oruhanga rwa Arinoni; omugati y'oruhanga nirwo rubibi; kugoba omwiga gwa Yaboki, orubibi rw'Abaamoni; 17ensi ya Araba kwakwo, hamoi na Yorudani nirwo rubibi, kwema Kinereti kulemwa kugoba Enyanja ya Araba, Enyanja y'Omwonyu, ahansi y'obusoka bwa Pisiga omu burugaizoba.”

18“Omu biro bilinya nkabaragira ningamba nti, ‘Omukama Ruhanga wanyu abahaire ensi egi; abaisherukare banyu bona barashabuka bakwete ebikwato bebembeire barumuna banyu, Abaisiraeli. 19Kyonkai abakazi banyu, abana banyu abato, n'ebitunganwa byanyu, nimanya okwo mwina ebitunganwa bingi, baraikara omu bigo ebyo mbahaire, 20kuhika orwo omukama araha barumuna banyu emilembe, nk'okwo yagibahaire, na bonene balye ensi ey'Omukama Ruhanga wanyu alikubaha buseli bwa Yorudani. Aho buli muntu ashube omu butaka bwa wenene obwo nabahaire.’ 21Nkagambira Yoshua omu kanya kalinya nti, ‘Oboine byona eby'Omukama Ruhanga wawe akozire abakama aba bombili, nikwo arakolera engoma zona ezo orashabuka. 22Mutakubatina; ahakuba Omukama Ruhanga wanyu niwe alikubarwanilira.’ ”

Musa tatahe Kanaani

23“Omu makiro galinya nkatagiliza Omukama nti, 24‘Waitu Mukama Ruhanga, wabanza kwoleka omwiru wawe obuhango bwawe n'obushobora bwawe; kuba ni ruhangaki omw'iguru anga omu nsi alikushobora kukora emilimo nk'egi n'ebikorwa eby'amani nk'ebyawe? 25Osingire bandeke nshabuke, mbone ensi nungi buseli bwa Yorudani, ensi nungi ey'amabanga na Lebanoni.’ 26Kyonkai Omukama akannigalira aha rw'enshonga yanyu, tiyampuliliize. Akangambira ati, ‘Nikimara ahali iwe; otangambira rundi bishagireho aha kigambo eki. 27Temba Eibanga lya Pisiga aha katwetwe, onage amaisho obugwaizoba na bikara na kasi n'oburugaizoba, ogilebege, aha rw'okuba toshabuke Yorudani egi. 28Ekiliho, oragire Yoshua, omuhe ekihika mara omugumise; aha rw'enshonga niwe arashabuka ayebembeire abantu aba, arabaha ensi ey'orabona.’ 29Kityo tukaikara omu ruhanga orulebangaine na Betipeori.”

Currently Selected:

Obwijukiro 3: RHAY01

Highlight

Copy

Compare