Obwijukiro 12

Omwanya gw'okufukamiramu

1“Egi niyo migenzo n'ebiragiro ebyo mulyegendeleza kukwata omu nsi ey'Omukama Ruhanga wa baisheinywe abahaire kulya, ebiro byona ebyo muligiroleramu. 2Mukambure emyanya yona mbali amahanga ago muranyaga gafukamiramu baruhanga bago, aha mabanga agarai n'aha bubanga, n'ahali buli muti gubisi. 3Mukambure ealutare zabo, mushekenyure enyomyo zabo, mwokye Abaashera babo n'omuliro. Ebishushane bya baruhanga babo ebibaijano mubiteme mubikumbye, babe batakifukamirwa mu myanya egyo.”

4“Inye Omukama Ruhanga wanyu, mutalinfukamira nk'okwo amahanga ago gafukamira baruhanga bago. 5Omu nganda zanyu zona ndarondamu mbali murata kunfukamira nkaba niho ntura. Okwo mube niyo mugya, 6n'ebihongo byanyu by'okwokibwa n'ebitambo byanyu mube niyo mubitwara; ekichweka kya ikumi, ebihongo byanyu ebyo muragaine, ebihongo byanyu by'obweyendezi, n'ebitunganwa byanyu by'ente n'entaama emizigaijo. 7Yonene okwo mulye mushemelerwe n'emitungo yanyu omu maisho g'Omukama. Byona ebyo mulyeza, eby'Omukama Ruhanga wanyu aliba ahaire omugisha mubilye. 8Okwo mulikunfukamira hanu aha kir'eki, mutalinfukamira mutyo, buli muntu okwo yashanga. 9Mbwenu timukagobire mu nsi eyo ndikubaha mukagira milembe. 10Kyonkai orwo mulishabuka Yorudani, mukatura omu nsi ey'Omukama Ruhanga wanyu alikubaha kusika, k'aliba yabaihwire aha babisha banyu ababataine, mukatura omu milembe, 11aho mutware byona ebyo ndikubaragira mbali Omukama Ruhanga wanyu alironda kufukamirwaho: Ebihongo byanyu eby'okwokibwa, n'ebitambo byanyu, ekichweka kya ikumi kyanyu, n'ebihongo byanyu byona ebyo muliba muraganisize Omukama. 12Mushanduke omu maisho g'Omukama Ruhanga wanyu, inywe na batabani banyu na bahara banyu, abairu banyu n'abazana banyu, n'Abalevita abali omu maju ganyu, aha rw'okuba tibaina mugabo anga busika mu nganda zanyu. 13Mwekenge muthalihonga bihongo bya kwokibwa hona hona mbali mulibona. 14Hamoiho omu nganda zanyu mbali ndironka mube niho muhongera ebihongo by'okwokibwa, mube niho mukolera na byona ebyo ndikubaragira.”

15“Kyonkai wakubaga olya enyama nyingi okw'olikwenda omu kigo kyawe kyona kyona, kuhonderana n'omugisha ogw'Omukama Ruhanga wawe aliba akuhaire; abahagare n'abalikwera bakulya nk'abalya engabi anga enjaza. 16Ekiliho otaliliirana bwamba, obusheshe ahansi nk'amaizi. 17Otaliliira mwawe kichweka kya ikumi ky'emyaka yawe anga eky'edivai yawe anga eky'amajuta gawe anga emizigaijo y'amahyo gawe ag'ente n'ag'embuzi, anga ebihongo ebyo waragaine, anga ebihongo byawe by'obweyendezi. 18Obiliire omu maisho g'Omukama Ruhanga wawe omu mwanya ogw'alironka, iwe na mutabani wawe na muhara wawe, omwiru wawe n'omuzana wawe, n'Omulevita ali omwawe. Eby'oliba oyelize obiliire omu maisho g'Omukama Ruhanga wawe. 19Olimanya otalyebwa Mulevita ebiro byona eby'olituura omu nsi yawe egyo.”

20“Orwo Omukama Ruhanga wawe alihanguhya ensi yawe nk'okwo yakuraganisize, aho iwe okagira engombwa y'enyama, wakulya nyingi nk'okwo olikwenda. 21Omwanya ogw'Omukama Ruhanga wawe alironda kuba niho afukamirwa kaguliba guli harai, aho wakwita ente anga embuzi yona yona omu buhyo bwawe obw'Omukama akutungire. Mwakulya enyama nyingi omu bigo byanyu nk'okwo mulikwetaga n'okwo mbaragire. 22Okwo engabi anga enjaza eliibwa, nikwo wakugilya. Abahagaire n'abalikwera kwakwo bakugilya. 23Ekiliho oyekomeleze otakulirana bwamba; obwamba buba burora. Aho enyama otagiliirana na burora. 24Otalibulya, obusheshe ahansi nk'amaizi. 25Otalibulya, nirwo oliramuka iwe na baijukuru bawe. Orwo olikora otyo Omukama alikusiima. 26Kyonkai ebintu eby'olikuragirwa eby'osaine kugira, n'ebihongo ebyo waragaine obitware, ogende nabyo mbali Omukama araronka. 27Ohonge ebihongo byawe eby'okwokya: Enyama n'obwamba, ahali ealutare y'Omukama Ruhanga wawe. Obwamba bw'ebitambo byawe busheshwe ahali ealutare y'Omukama Ruhanga wawe, kyonkai enyama wakugilya. 28Oyelinde oyekomeleze ebigambo ebi byona ebyo inye ndikukuragira nirwo oliramuka iwe na baijukuru bawe eirai lyona. K'olikolera Omukama Ruhanga wawe ebirungi oliramuka.”

Okutafukamira bihuuku

29“Orwo Omukama Ruhanga wawe alisilikya amahanga ag'olikutabalira, okanyaga ensi yago okagituramu, 30olyemanya othalihondera michwo yabo. Kandi otalinyomoza baruhanga babo, okwese, ‘Amahanga aga gabaire nigafukamira gatai baruhanga bago? Nanye nkore nka bonene!’ 31Otaligilira kwo otyo Omukama Ruhanga wawe, aha rw'okuba buli kintu ekibi eky'Omukama anoba nikyo bakoleraga baruhanga bago. Kuba abana babo babatambira baruhanga babo ebihongo by'okwokibwa. 32‘Buli kintu ekyo ndikubaragira mwekomeleze kukikora; otagira kyowayongeraho anga kwihyaho.’ ”

Currently Selected:

Obwijukiro 12: RHAY01

Highlight

Copy

Compare