Obwijukiro 11

Obukuru bw'Omukama

1“Mugonze Omukama Ruhanga wanyu, ebiro byona mukwate emikuye, emigenzoye, ebiragirobye n'emihangoye. 2Kir'eki mutekeleze ekigambo eki; tindikugambira bana banyu abatabimanyire anga kubibona. Mwijuke eby'Omukama Ruhanga wanyu yabegesize, mwijuke obuhangobwe, amanige n'obushoborabwe, 3obubonero n'okwo yakozire Farao omukama wa Misiri n'ensiye yona; 4n'okwo yagizire eihe lyona lya Misiri, efarasi zabo n'amagali gabo; okwo yababundize Enyanja Rutuku orwo babaire nibababinga, n'okwo yabasilikize. 5Mwijuke n'ebyo yabakoleire omw'irungu kulemwa kuhika munu; 6n'okwo yakozire Datani na Abiramu baijukuru ba Eliabu eya Rubeni, ensi ekabamira, n'emitungo yabo, amahema gabo, n'abairu babo n'ebitunganwa byabo omu maisho ga Isiraeli yona. 7Eby'amani byona ebyo Omukama yakozire mukabyebonera.”

Emigisha y'ensi y'endagano

8“Aha rw'ekyo mukwate emihango yona eyo ndikubaragira kir'eki, nirwo muragira amani g'okutaha omu nsi egyo mukagilya 9n'okuturamu ebiro bingi. Ensi egyo elikusheshekana amata n'obwoki Omukama akagiraganisa baisheinywe na baijukuru babo. 10Ensi eyo mulikutahamu kulya ti nsi nka Misiri eyo murugiremu, mbali ebyo mwalimaga mwabitahiraga amaizi kubisheshera nk'ebustani. 11Eyo mulikutahamu kulya nsi y'amabanga n'empanga, eina n'enjura. 12Nsi ey'Omukama Ruhanga wanyu alikwetaho. Kwema aha mbandizo y'omwaka kugoba aha nzindo yagwo aikara agitaireho amaisho.”

13“Kandi kamurahulira emihango yange eyo ndikubaragira kir'eki, mukangonza n'okunkolera n'omutima gwanyu gwona n'omwoyo gwanyu gwona, 14ensi yanyu ndagiha enjura omu kirumo kyayo: Enjura y'etoigo n'ey'omuhanguko mubone kweza emyaka yanyu, mubone n'edivai n'amajuta. 15Enyeya zanyu ndazimezamu obunyasi, ente zanyu zilye. Kandi nainywe muralya mara mwigute. 16Mwelinde mutakutenguka mitima, mukahinduka mukakolera baruhanga n'okubafukamira. 17Kamwakugira mutyo mbatamwa muno, eiguru ndikoma, enjura eburwa kugwa, ensi eburwa kweza, nainywe muchweka bwangu omu nsi eyo ndikubaha.”

18“Kityo ebigambo byange ebi mubite aha mutima n'aha mwoyo, mushushe oti mubyekomire aha mukono n'omu kasoso kwikara nimubijuka. 19Mubyegese abana banyu, mubifumoreho orwo muraba mushuntamire omu maju ganyu, n'orwo muli aha mihanda nimugenda, n'orwo muraba mubyamire n'orwo muraimuka. 20Mubihandike aha nti zanyu z'emilyango n'aha bihigi, 21nirwo inywe n'abana banyu ebiro byanyu biliba bingi omu nsi ey'Omukama yanahiliire baisheinywe okwo aligibaha kulemwa kugoba aha maheleruka. 22Kamurayegendeleza kwekomya emihango egi yona eyo ndikubaragira kukwata, mukagonza Omukama Ruhanga wanyu, mukakora ebyo ndikwenda byona, mara mukamugumaho, 23arabinga amahanga aga gona agali mbali mulikugya, munyage n'agahango mara ag'amani kubashaga. 24Hona mbali mulilibata haliba hanyu. Ensi yanyu elyema aha rubaju orwa kasi, egobe aha Mabanga ga Lebanoni rubaju orwa bikara, eshube eyeme aha Mwiga gwa Efurati oburugaizoba egobe aha Nyanja ya Mediterania obugwaizoba. 25Thaliho muntu alishobora kubasimbalira. Omukama Ruhanga wanyu alitinisa ensi yona eyo mulilibatamu eturutume aha rw'enshonga yanyu nk'okwo yabaraganisize.”

26“Leba, kir'eki ninteka omu maisho ganyu omugisha n'omuraamo: 27Kamulihulira emihango y'Omukama Ruhanga wanyu eyo ndikubaragira kir'eki mulibona omugisha. 28Kamuliba mutahuliire mihango yange, mukaburwa kukora ebyo ndikubaragira kir'eki, mukahiga baruhanga abandi abo mutamanyire, mulikwatwa omuraamo. 29Orwo inye Omukama Ruhanga wanyu ndibagobya omu nsi eyo mulikutahamu kulya, muliteka omugisha aha Ibanga lya Gerizimu n'omuraamo aha Ibanga lya Ebali. 30Amabanga ago gali buseli bwa Yorudani obugwaizoba bw'omuhanda, mbali eizoba litobelera, omu Bakanaani ba Araba elebangaine na Giligali aha rubaju rw'omwaloni gwa Moreki. 31Kuba nimuragirwa kushabuka Yorudani, kutaha omu nsi ey'Omukama Ruhanga wanyu alikubaha kulya. Orwo muliba mwagiliire mwagitwiremu, 32Mwekomeleze kukwata ebiragiro byona n'emigenzo ebyo ndikubaragira kir'eki.”

Currently Selected:

Obwijukiro 11: RHAY01

Highlight

Copy

Compare