2 Samweli 23

Ebigambo bya Daudi eby'enzindo

1Ebi nibyo bigambo bya Daudi eby'enzindo. Ebigambo bya Daudi mutabani wa Yese, ebigambo by'omushaija ayatungikirwe, enkorwa majuta ya Ruhanga wa Yakobo, omuhoyi w'empoya zinura eza Isiraeli:

2“Mwoyo w'Omukama akangambira omu kanwa kange,

ekigambokye kikaba kindi aha rulimi.

3Ruhanga wa Isiraeli agambire,

Rwazi rwa Isiraeli angambiire.

Orwo omuntu atwaza abantu amazima,

hakabatwara natina Ruhanga,

4abaakiza nk'omushana gwa bwankya,

abashamulira nk'eizoba lilikushabuka,

ashusha obwankya obutaina bichwi,

aba nk'enjura emeza obunyasi omw'itaka.

5Nikwo Ruhanga alitunga baijukuru bange omugisha,

okuba akozire nanye endagano y'eirai lyona,

egobeleire omuli byona mara ehamire.

Alinjunira kimoi antunge n'ebyo ndikwenda.

6Kyonkai ababi bona balinagwa nk'amahwa,

agatakwatwa mikono.

7Omuntu wena alyenda kugakwata,

agakwase ekyoma n'orubango rw'eichumu,

mara baligasosotoza omuliro.”

Abaisherukare emanzi za Daudi

(1Ma 11:10-41)

8Aga nigo mabara g'abaisherukare emanzi abo Daudi yabaire ainabo: Yoshebashebeti owa Takemoni; hakaba ali mukuru w'abashatu. Akakwata eichumulye yarashanisa abantu 800, yabaita omu kanya kamoi.

9Alikumuhondera omu baisherukare abashatu emanzi hakaba ali Eleazari eya Dodo, ow'oruganda rwa Ahohi. Akaba ali hamoi na Daudi orwo bakooleize Abafilisiti ababaire batabaire, Abaisiraeli bakairuka. 10Wenene akaimuka yatera Abafilisiti kuhika orwo omukonogwe gwalemirwe gukomera aha mbanda; Omukama akakora obujuni bungi kir'ekyo. Abantu bakagaruka kunyaga abaisirwe kwonkai.

11Alikuhondera Eleazari hakaba ali Shama eya Age owa Arari. Abafilisiti bakaba bateraniire Lehi mbali habaire hali omusiri gwijwire enkore; abantu bakabairuka, 12kyonkai wenene yayemelera omugati y'omusiri yagulinda, yaita n'Abafilisiti. Omukama akakora obujuni bungi.

13Haihi n'eigesha abashatu omu bebembezi 30 bagya ahali Daudi aha Nyanja ya Adulamu orwo omutwe gw'Abafilisiti gusisiire omu Ruhanga rwa Refaimu. 14Omu kanya ako Daudi hakaba ali omu boma, kandi orusisira rw'Abafilisiti rukaba ruli Betelehemu. 15Daudi aija agira eiliho, agamba ati, “K'omuntu yakunyihiire amaizi g'okunywa aha iziba lya Betelehemu bwatana aha kihigi nkaganywa!” 16Aho abashaija bashatu emanzi baraba omu rusisira rw'Abafilisiti, bataha amaizi aha iziba lya Betelehemu bwatana aha kihigi, baija bagamuletera. Kyonkai ayanga kuganywa shana agashesha nk'ekihongo ky'okunywa, agahongera Omukama. 17Agamba ati, “Nikikabure, waitu Mukama, kunywa amaizi aga! Manya nakushusha ayanywa obwamba bw'abashaija aba abehoiremu bakagenda kugahiiga.” Aha rw'ekyo ayanga kuganywa. Ebi nibyo abashaija bonshatu emanzi bakozire.

18Abishai murumuna Yoabu (nyinabo hakaba ali Zeruya) niwe yabaire ali mukuru wa balinya 30. Akakwata eichumulye yarashana n'abantu 30 yabaita, nikwo kugira eibara omu 30 ago. 19Omu 30 niwe yaranganwaga muno, yaba mukuru wabo; kyonkai tiyagobire ahali balinya abashatu.

20Benaya eya Yehoyada, omushaija emanzi ya Kabuzeeli ayakozire eby'amaani bingi, nangu yaita n'emanzi z'amani ibili eza Moabu. Ashuba asongoka aitira entare omu kiina omu bukiro bw'eseluji. 21Akaita Omumisiri, omushaija ekishoka. Omumisiri hakaba akwete eichumu, kyonkai Benaya yamugendera n'enkoni, yamwaka eichumu elye yaba nilyo amwisa. 22Ebyo nibyo Benaya eya Yehoyada yakozire akabona eibara omu baisherukare 30 emanzi. 23Akaba ainakwo eiranga omu 30, kyonkai tiyagobire ahali balinya abashatu. Daudi amuronka amuhindura mukuru w'abalinzibe.

24Asaheli murumuna Yoabu hakaba ali omu 30; Elihanani eya Dodo owa Betelehemu, 25Shema owa Harodi, Elika owa Harodi, 26Helesi Omupeleti, Ira eya Ikeshi owa Tekoa, 27Abiezeri owa Anatoti, Mebuni Omuhushati, 28Salumoni Omuhohi, Maharai owa Netofa, 29Helebu eya Baana owa Netofa, Itai eya Ribai owa Gibea ey'Ababenjamini, 30Benaya owa Piratoni, Hidai ow'obugera bwa Gaashi, 31Abialiboni Omwarubati, Azimaweti owa Bahurimu, 32Eliaba owa Shaalaboni, batabani ba Yasheni, Yonatani, 33Shama Omuharari, Ahiamu eya Sharari Omuharari, 34Elifeleti eya Ahasibai owa Maaka, Eliamu eya Ahitofeli Omugiloni, 35Heziro owa Karimeli, Paarai Omwauribi, 36Igali eya Natani owa Zoba, Bani Omugadi, 37Zeleki Omwamoni, Naharai Omubeeroti, omutwazi w'ebikwato bya Yoabu mutabani wa Seruya, 38Ira Omwitiri, Garebu Omwitiri, 39na Uria Omuhiti. Bona hamoi bali makumi 37.

Currently Selected:

2 Samweli 23: RHAY01

Highlight

Copy

Compare