2 Samweli 22
22
Oruhoya rwa Daudi rw'esiimi
(Zab 18)
1Aho Daudi kiro eky'Omukama yamwihya omu mikono ya Shauli n'ababishabe abandi, amuhoyera ati,
2“Omukama niwe rwazi rwange,
boma yange mara murokozi wange.
3Ruhanga wange, rwazi rwange owo mpungiraho,
ngabo yange, mani gange agandokora.
Boma yange, buhungiro bwange,
murokozi wange andokora bangingiize.
4Ntakira Omukama asaine kuhaisilizibwa,
niwe andokora aha babisha bange.
5Amayengo ga rufu gakantangatanga,
engezi nyamwita zanzinda,
6engoye za Sheoli zikanzingazinga,
emitego ya rufu yantanga omu maisho.
7Omu bujune bwange nkatakira Omukama,
nkatakira Ruhanga wange.
Akahulira eiraka lyange ayemire Rwensingaye,
nkalira yampulira.
8Aho ensi ekajugumba yatengeta,
emisingi y'eiguru yachundwa,
yatengeta okuba hakaba atamirwe.
9Omwika gukamuruga omu nyindo gwachunkera,
omuliro rusosotora gwamuruga omu kanwa,
akanwake karugwamu amakara galikumengeta nigarabagira.
10Akakingura eiguru yasongoka,
omwilima lindindi nigwo yabaire alibasiremu.
11Akakuuba aha mukerubi y'aharara,
akatwarwa amapapa g'omuyaga.
12Omwilima akaguhindura ihemalye,
nibyo bichwi bilikwiragura n'omwijuro gw'amaizi.
13Okwengelera kw'amaishoge,
kukakya amakara g'omuliro.
14Omukama akema omw'iguru yasharuka,
Rukirabyona akataishura eirakalye.
15Akarasha emyambi yabatataamya,
yababingisa orurabyo.
16Aho nirwo empanga z'ahansi z'enyanja zabonekire,
n'emisingi y'ensi ekashuruguka,
orwo Omukama yakabukire,
n'akahiliro k'orwoya kakamuruga omu nyindo.
17Akema eiguru yaimukya omukono yankwata,
yanyihya omu maizi gangi.
18Akandokora aha mubisha wange w'amani,
yanyihya omu bannobaga;
okuba bakaba nibankiza amani.
19Bakambunda kiro eky'enaku zantera,
kyonkai Omukama hakaba bweyegeko bwange.
20Akanshohoza yanta aheyanjaire,
akanshemelerwa yandokora.
21Omukama akandongora kuhonderana n'obugorogoki bwange,
akampeera kuhonderana n'okwera kw'engaro zange.
22Enshonga nkakwata emihanda y'Omukama,
mara tinkafakaraga kuruga ahali Ruhanga wange.
23Emigenzoye yona yanyikaraga omu maisho,
n'ebiragirobye tinabisigireho.
24Nkaba ndi nyakatetere omu maishoge,
mara nayeshumbaga entambara.
25Aha rw'ekyo Omukama akampeera
kuhonderana n'obugorogoki bwange,
kuhonderana n'okwera kw'engaro zange.
26Waitu Mukama, omwesigwa omubera mwesigwa,
kandi nyakatetere omubera nyakatetere.
27Enshemere ogibera nshemere,
kyonkai omuhabe olimuhwamu.
28Olirokora abantu abetohya,
kyonkai amaisho gawe gali aha banyaikuru kubafutika.
29Aha rw'okuba iwe, waitu Mukama, oli tara yange,
Mukama wange ombingira omwilima.
30Kanyina iwe ndashobora kushekenyura eihe,
kanyina Ruhanga wange ndashobora kuguruka orukuta.
31Ruhanga ogu omuhandagwe gugorogokire,
ekigambo ky'Omukama kibakwo,
wenene aba ngabo ya bona abamuhungiraho.
32Ruhanga n'ohai k'atali Mukama?
Mara rwazi n'ohai shana Ruhanga waitu!
33Ruhanga niwe buhungiro bwange obugumire,
niwe ampindura mugorogoki.
34Amaguru gange akashushanisa ag'enjaza,
yanyemeleza ngumire ahatungamire.
35Anyegesa kurashana,
nshobore kuleega obuta bw'omulinga.
36Ondokoize engabo yawe,
obujuni bwawe bukandetera eiranga.
37Okanteza ebitambi ebirai,
ebilenge byange tibyateleire.
38Nkabinga ababisha bange nabasilikya,
mara tinagarukire kuhika orwo bahoireho.
39Nkabatundwigura nabamaraho, orw'ekyo tibaimukire,
bakangwa omu maguru.
40Okangumisa wampa amani g'okurashana,
watokya ababisha bange nabakiza amani.
41Okahindura ababisha bange bantera emigongo,
abannobaga nabasilikya.
42Bakakunga kyonkai tihabaireho wa kubajuna,
bakatakira Omukama kyonkai tiyabahoroire.
43Nkabatwanga bashusha echuchu,
nkabashekenyura nabajungilira nk'eshabo aha muhanda.
44Okandokora omu mpaka z'abantu bange,
okandinda naba mwebembezi w'amahanga;
abantu abo ntamanyaga bankolera.
45Abana b'omunyamahanga bakanyijaho nibabondabonda,
orwo bampuliire bati bankunira.
46Abana b'omunyamahanga bakanywelererwa,
bakaruga omu boma zabo nibajugumba.
47Omukama narora, rwazi rwange asingizibwe,
Ruhanga wange, rwazi andokora ahaisilizibwe.
48Ruhanga ayanyeholeire,
akateka amahanga ahansi yange,
49niwe yanyihire omu babisha bange,
okanteka eiguru y'abagingiiza,
okandokora omu bantu engwagwa.
50Aha rw'eki, waitu Mukama, ndakwebugaga omu mahanga,
mpoyere eibara lyawe.
51Ruhanga aha Omukama amani g'okusinga endashana,
agilira enkorwa majutaye ekisha;
niwe Daudi na baijukurube eirai lyona.”
Currently Selected:
2 Samweli 22: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
