2 Samweli 19

Yoabu nakabukira Daudi

1Bagambira Yoabu bati, “Leba Omukama nalira, nachulira Abusalomu.” 2Aho abantu bachura, ebyera by'okusinga endashana bilekera, okuba bakahulira okwo Omukama Daudi okufa kw'omutabani kwamujunaize. 3Kir'ekyo abantu bakagaruka omu kigo nibashooba nk'abagaruka bajunaire aha rw'okusingwa endashana. 4Omukama ayebunda aha maisho atongya n'eiraka lihango ati, “Yo, mwana wange Abusalomu, yo Abusalomu mwana wange, mwana wange!” 5Yoabu ataha omu nju, agoba Omukama amugambira ati, “Kir'eki washonaza abairu bawe bona abakurokora kir'eki batakwita, bakarokora na bakazi bawe, abana bawe n'ensholeke zawe; manya nabo bakubaisire. 6Wagonza abakunoba, wanoba abakugonza. Wayolekera kimoi okwo abakuru b'eihe n'abaramata bawe batalikukugasha kantu. Nanye kir'eki namanya okwo ka Abusalomu yakuhungiire, kandi ichwe chwena tukafa, iwe wakushemeleirwe. 7Mbwenu aha oshohore, ofumore n'abairu bawe obaihyemu entima mbi. Obuso bw'Omukama k'otashohoire kir'eki tolikusigara na muntu, kandi ekyo kirakurugiramu akabi kushaga buli kabi akarakugwireho kwema buto kugoba mbwenu.” 8Omukama Daudi nikwo kwimuka akabandaara omu kihigi. Bagambira abantu bona okwo Omukama abandaire omu kihigi. Bona baija omu mabonage.

Okutekateka kw'okugaruka kwa Daudi

Abaisiraeli bona bakaba bairukire, buli muntu agarukire omwe. 9Enganda zona omuli Isiraeli bikaba bibashobeize, bati, “Omukama akatuhungya omu mikono y'ababisha baitu, Abafilisiti, mbwenu wenene airukire Abusalomu yaruga aha ngoma. 10Kandi Abusalomu owo twakozire amajuta k'atutwara agwire omu ndashana. Mbwenu kubaki inywe mutalikugamba kantu aha kugarura Omukama?”

11Omukama Daudi atuma ahali Zadoki na Abiatari abakuhani ati, “Mubaze abagurusi ba Yuda muti, ‘Omukama yamanyire okwo Abaisiraeli bona bagambire kumugarura omwe, mbwenu inywe n'inywe mwaija kuba b'enzindo? 12Inywe muli barumuna bange, muli bwamba bwange, mubili gwange; kiki inywe kuba b'enzindo kungarura?’ 13Mumbalize Amasa muti, ‘Iwe toli bwamba bwange, mubili gwange? Ruhanga n'akanyite kantakuhindwire mukuru w'eihe lyange aha mwanya gwa Yoabu.’ ” 14Agweleza atyo abantu bona ba Yuda bagamba eiraka limoi, bamutumaho bati, “Ogaruke n'abaramata bawe bona.” 15Omukama agaruka, agoba Yorudani. Aba Yuda baija Giligali kumuchwekera n'okumushabura Yorudani.

Shimei nayetonganira

16Shimei eya Gera, Omubenjamini wa Bahurimu, ayanguha asongoka n'abashaija ba Yuda kuchwekera Omukama Daudi. 17Akagenda n'abashaija 1,000 ab'oruganda rwa Benjamini. Ziba omusigire w'omwa Shauli, nawe agenda n'abatabani 15 n'abairube 20, basongoka Yorudani bebembeire Omukama. 18Bashabuka ekyambu kushabura eka y'Omukama, n'okumukolera eby'alikwenda. Orw'Omukama yabaire yaija kushabuka Yorudani, Shimei amugwa omu maisho, 19amugambira ati, “Mukama wange, singa otankwata ntambara, otaijuka na kyo nakukozire, nkakushenga kiro ekyo waruga Yerusalemu; oyebwe, osingire. 20Nomanya okwo nafakaire, kyonkai olebe okwo omu ruganda rwona rwa Yozefu n'inye naija ndi wa mbere kukuchwekera!” 21Kyonkai Abishai eya Zeruya ahorora ati, “Shimei bamwite azire ekyo yakozire, kuba akakeena enkorwa majuta y'Omukama.” 22Nawe Daudi agamba ati, “Mbagiire ntai inywe batabani ba Seruya, nka mwambera Sitani? Mbwenu aha Omukama wa Isiraeli n'inye; kir'eki taliho Mwisiraeli alikwija kwitwa.” 23Aho arahilira Shimei ati, “Tofe.”

Mefibosheti nayetongorora

24Mefibosheti eya Shauli nawe asongoka kuchwekera Omukama. Kwema orwo Omukama yarugire Yerusalemu kulemwa kugaruka eli milembe, Mefibosheti hakaba atakanabaga maguru, atakasharaga bileju anga kufura myendoye. 25Orwo yarugire Yerusalemu kuchwekera Omukama, Omukama amugambira ati, “Mefibosheti, kubaki otagenzire nanye?” 26Amuhorora ati, “Rugaba Mukama wange, omwiru wange akambeiya. Nkamugambira nti, ‘Nyalira endogobe ngikuube ngende n'Omukama,’ kuba mba mulema. 27Wenene ogwo akampangilira ahali iwe, kyonkai kandi Rugaba Mukama wange oshusha omumalaika wa Ruhanga; aha rw'ekyo singa okore okw'orayenda. 28Ab'omwaitu wakubaisire bona, kyonkai okandonkamu kuta nindya aha kiihuro kyawe. Mbwenu nkutongeki ekishagireho?” 29Omukama amugambira ati, “N'orwo wakuba otagambire bindi; naramwire. Iwe na Ziba murabegana ensi ya Shauli.” 30Mefibosheti agambira Omukama ati, “Ziba agitware yona, orwo wagaruka omwawe n'emilembe, Rugaba Mukama wange.”

Daudi nasiima Barizilai

31Na Barizilai Omugileadi hakaba arugire Rogelimu yashendekeleza Omukama yamugobya Yorudani, yasiga yashabuka. 32Akaba ali mugurusi muno ow'emyaka 80. Yahaga Omukama Daudi ekyakulya orwo yaikaraga Mahanaimu, okuba hakaba ali mushaija mushongore muno. 33Omukama amugambira ati, “Tushabuke hamoi tugye Yerusalemu, ndakugabira, nkumanye.” 34Kyonkai Barizilai amuhorora ati, “Nkyaina emyaka engahai y'okurora, inye kugenda naiwe Yerusalemu? 35Inye aha nyina emyaka 80, tinkiina kya kunshemelera. Na kulya na kunywa tinkishemelerwa kantu. Na bashaija na bakazi tibakizina bikantaha. Mbwenu aho Rugaba Mukama wange, nakushasizaki? 36Yorudani turagishabuka hamoi; kyonkai kubaki ondongore erongoro etyo? 37Ninkushaba onjubure ngaruke, nfere omu kigo kyange, banziike omu nziiko ya tata na mawe. Omwiru wawe Kimuhamu murashabuka hamoi, okw'orayenda obe nikwo omukora.” 38Omukama agamba ati, “Kimuhamu turashabuka hamoi, ekiranshemelera kyona kyona ndakimukolera; kandi naiwe eky'orayenda ndakikukolera.” 39Aho abantu bona bashabuka Yorudani, n'Omukama ashabuka; anywegera Barizilai, mara amuha omugisha, Barizilai agaruka omuka. 40Omukama ashabuka na Kimuhamu, bagya Giligali, aba Yuda bona enusu y'abantu ba Isiraeli bamushendekeleza.

Yuda na Isiraeli nibahakanira Omukama

41Ahanyuma Abaisiraeli bona baija aha Mukama, bamubaza bati, “Kubaki barumuna baitu aba Yuda bakwibire, bakakushabura Yorudani n'eka yawe n'abashaija bawe?” 42Aba Yuda bahorora aba Isiraeli bati, “Okuba Omukama w'oruganda rwaitu. Aho kubaki ekyo nikibanigaza? Haliho eky'Omukama kyona kyona ekyo tuliire, anga aina eky'atuhaire?” 43Abaisiraeli bahorora aba Yuda bati, “Omukama Daudi waitu emirundi ikumi nangu n'okushaga. Aho kubaki mutugahire? T'ichwe tutabaire tuli ba mbere kugamba kugarura Omukama waitu?” Kyonkai aba Yuda bakakiza Abaisiraeli amani aha rulimi.

Currently Selected:

2 Samweli 19: RHAY01

Highlight

Copy

Compare