2 Samweli 18

Abusalomu nagwa omu ndashana

1Aho Daudi ateka abantu abo yabaire ainabo, abateraho abakuru b'enkumi n'ab'ebikumi. 2Abatabaza, ekichweka kimoi omu bishatu kikulirwa Yoabu, ekindi kikulirwa Abishai eya Zeruya murumuna wa Yoabu, ekya kashatu kikulirwa Itai Omugiti. Omukama agambira abantu ati, “Kakuli kutabara ndatabara na inywe.” 3Kyonkai abantu bagamba bati, “Totabare, okuba katurairuka, tibatufeho; n'orwo enusu yaitu yakufa tibatufeho. Kyonkai iwe noigana abantu baitu enkumi 10,000; hakili osigare omu kigo obe nimwo oyema notutwekera obujuni.” 4Omukama abagambira ati, “Ekyo murabona kili kirungi kushaga nikyo ndakora.” Aho ayemelera aha rubaju rw'ekihigi orwo abantu babaire nibatabara ebikumi n'enkumi. 5Aragira Yoabu na Abishai na Itai ati, “Mugilire Abusalomu obuganyizi aha bwange.” Orwo alikuragira abakuru b'eihe okwo baragira Abusalomu, abantu bakabihulira.

6Eihe lya Daudi litabara omw'ishwa, lirashana n'Abaisiraeli omu kibira kya Efuraimu. 7Aba Daudi basinga Abaisiraeli. Bakagwayo abantu bangi muno 20,000. 8Endashana eranda ensi yona; kandi abagwire omu kibira bakashaga abagwire omu ndashana.

9Abusalomu agwa omu bairu ba Daudi kibandagara. Akaba akuubire enyumbu, emurabya omu matagi g'omuti guhango gw'omwaloni, ghakaba gakwataine. Omutwegwe gukwatira muno omu matagi ago, asigaraho alerembire omu rwerwerwe, enyumbu egenda yonkai. 10Omuntu omoi amubona, abarulira Yoabu ati, “Nabona Abusalomu alerembire omu mwaloni.” 11Yoabu amubaza ati, “Orwo wamubona kubaki otamuchumita okamutuura hansi? Nakushemeleirwe nkuha ebichweka 10 by'efeza n'omukandara.” 12Omushaija ogwo agambira Yoabu ati, “N'orwo nakushutwire ebichweka 1,000 by'efeza, tinakwimukize mukono gwange kwita mwana wa Mukama, kuba tukahulira Omukama nakuragira na Abishai na Itai ati, ‘Mumpungize omwana wange Abusalomu.’ 13Kandi n'orwo nakuba namugobeza (mara okwo Omukama taliho ky'atamanya), aho iwe wenene wakweshumbire.” 14Yoabu agamba ati, “Tinyina mwanya gwa kwita bushai na iwe nk'ogu.” Akwata amachumu gashatu agachumita Abusalomu omu mutima orwo yabaire akyarora omu mwaloni. 15Aho abasigazi 10 abatwaraga ebikwato bya Yoabu, bazingora Abusalomu bamuchumita bamwita.

16Yoabu atera enzamba abantu balekera kubinga Abaisiraeli, kuba hakabatanga bagaruka. 17Bakwata Abusalomu bamunaga omu kina kihango omu kibira, bamutuumaho n'entuumiro mpango muno y'amabare. Abaisiraeli bahunga, buli omoi airukira omuka. 18Abusalomu orwo yabaire akyarora akombeka enyomyo omu Ruhanga rw'Omukama, kuba akagamba ati, “Tinyina mwojo owo balinyijukiraho ibara lyange.” Enyomyo egyo akagyeta eibaralye, na kir'eki bagyeta Bwijukiro bwa Abusalomu.

Nibamanyisa Daudi okufa kwa Abusalomu

19Aho Ahimaazi mutabani wa Zadoki agamba ati, “Kanyiruke manyise Omukama amakuru okwo Ruhanga yamuchungura omu mikono y'ababishabe.” 20Yoabu amugambira ati, “Tiwakutwara makuru aga kir'eki. Wakugatwara kiro kindi aha rw'okuba ayafa ni mutabani w'Omukama.” 21Ahanyuma agambira omwiruwe Omukushi ati, “Ogende ogambire Omukama ebyo wabona.” Omukushi amwinamira mara airuka. 22Ahimaazi eya Zadoki agambira Yoabu ati, “Ekiraba nikiba kibe, nanye kanyiruke mpondere Omukushi.” Yoabu amugira ati, “Mwana wange, kubaki otware amakuru nk'aga? Iwe oti nibaija kukuha omutono?” 23Ahimaazi ati, “Ekiraba nikiba kibe, kanyiruke.” Yoabu amugambira ati, “Iruka.” Aho Ahimaasi airuka araba omuhanda gw'omuteleka, atanga Omukushi.

24Daudi hakaba ashuntamire omugati y'ebihigi bibili. Omulinzi akuuba aha rushwi rw'ekihigi eiguru y'oeboma. Kayanagire amaisho abona omushaija ali wenkai airukire. 25Omulinzi abilikira, amanyisa Omukama. Omukama agamba ati, “K'araba ali wenka aina amakuru g'okutugambira.” Orwo yaizire nailira haihi, 26omulinzi abona omushaija ondijo nairuka. Omulinzi ayeta omukumilizi agamba ati, “Leba omushaija ondijo ali wenka airukire!” Omukama agamba ati, “Ogu na wenene naleta amakuru.” 27Omulinzi agamba ati, “Nimbona emiirukire y'ayebembeire neshusha emiirukire ya Ahimaazi eya Zadoki.” Omukama agamba ati, “Ogu aba mushaija murungi, naija n'amakuru garungi.”

28Aho Ahimaazi aramya Omukama n'eiraka lihango ati, “Kamelere.” Abandamira Omukama obuso bukanga aha itaka, agamba ati, “Asingizibwe Omukama Ruhanga wawe. Abashaija ababaire bakushengire, Rugaba Mukama wange, yabaihyamu emikono.” 29Omukama abaza ati, “Omwana wange Abusalomu aliho buhore?” Ahimaazi amuhorora ati, “Orwo Yoabu omwiru wawe yantuma, nabona abantu oti aliho ekyabatabura muno, kyonkai tinakimanya ni kiki?” 30Omukama amugambira ati, “Hingura, gya aha rubaju oyemelere aha.” Aho agya aha rubaju ayemelera.

31Aho leba Omukushi agoba, agamba ati, “Nyina amakuru garungi, Rugaba Mukama wange, kuba kir'eki Omukama yakweholera, yakwihya omu mikono ya bona abakushengire.” 32Omukama Daudi abaza Omukushi ogwo ati, “Omwana wange Abusalomu aliho buhore?” Omukushi amuhorora ati, “Ababisha bawe, Rugaba Mukama wange, na bona abakushenga abenda kukukora kubi babe nk'omusigazi ogwo.” 33Aho Omukama agwa omu kamazi, atemba omu kiyumba eiguru y'ekihigi, alira. Kayabaire nagenda achura ati, “Yo, mwana wange Abusalomu, mwana wange, mwana wange Abusalomu! Nimbe n'inye naba nfire iwe okakira. Yoo, Abusalomu mwana wange, mwana wange.”

Currently Selected:

2 Samweli 18: RHAY01

Highlight

Copy

Compare