2 Samweli 1
1
Daudi namanyisibwa okufa kwa Shauli
1Shauli kayabaire yafire, Daudi atabaruka naruga kwita Abaamaleki, aikara Zikilagi ebiro bibili. 2Aha kiro kya kashatu aija omushaija naruga omu rusisira rwa Shauli, emyendoye etemwire, aina eitaka omu mutwe. Orwo yagobire ahali Daudi agwa ahansi amuramya. 3Daudi amubaza ati, “Noruga nkahai?” Ogu amugambira ati, “Nahunga omu rusisira rwa Isiraeli.” 4Aho Daudi amubaza ati, “Bibaire bitai? Ngambira.” Ahorora ati, “Abantu bairuka omu ndashana, kandi bangi bafa. Shauli na Yonatani omutabani nabo bafa.” 5Daudi abaza omusigazi ogwo ayamumanyisize ebyo ati, “Nomanya otai okwo Shauli na Yonatani omutabani bafire?” 6Ogu amuhorora ati, “Nshangirwe ndi aha Ibanga lya Giliboa mbona Shauli ayetungire aha ichumulye, mara amagali n'ab'efarasi babaire bamufundize. 7K'alebire enyuma ambona, anyeta. Mporora nti, ‘Kaboneke Rugaba!’ 8Ambaza ati, ‘Oli ohai?’ Muhorora nti, ‘Ndi Muamaleki.’ 9Aho angambira ati, ‘Ngoba haihi onyite, kuba obushasi bundi kubi n'orwo nkyarora.’ 10Aho mugoba haihi mwita; kuba okwo abaire agwire mbaire nimanyage okwo atakili wa kukira. Mwihyaho orukinga orubaire rumuli aha mutwe n'omulinga ogubaire gumuli aha mukono, niby'ebi nabiletera Mukama wange.”
11Aho Daudi akwata emyendoye agitemura; n'abashaija bona abo yabaire ainabo bagira batyo. 12Bachulira Shauli na Yonatani omutabani n'abantu b'Omukama, n'eihanga lya Isiraeli mara basiba kugoba bwaigoro, bachulira batyo abagwire aha mbanda. 13Daudi abaza omusigazi ayamumanyisize ebyo ati, “Iwe oli wa nkahai?” Ogu amuhorora ati, “Ndi mutabani w'Omuamaleki omoi omufuruki.” 14Daudi amubaza ati, “Wayemera otai kwimukya omukono kwita enkorwa majuta y'Omukama?” 15Ahanyuma ayeta omusigazi omoi amugambira ati, “Ija omwite.” Amutera afa. 16Daudi amugambira ati, “Obwamba bwawe bukururukire iwe wenene; kuba akanwa kawe niko kakuropa orwo wagamba oti, ‘Naita enkorwa majuta y'Omukama.’ ”
Daudi nachulira Shauli na Yonatani
17Daudi achulira Shauli na Yonatani omutabani, abatongya. 18Mara aragira ekitongyo eki kabyakyegesa ab'oruganda rwa Yuda; nikwo kihandikirwe omu kitabo kya Yashari. Akatongya ati,
19“Ekyebugo kyawe iwe Isiraeli,
bakitira aha nshozi zawe;
emanzi zaitwa zitai!
20Omuli Gati mutakukigambamu,
n'omu mihanda ya Ashikeloni mutakukirangamu;
abatatahiliirwe bataija bakashanduka.
21Inywe mabanga ga Giliboa,
mutakugira rume anga njura,
mutaligira na ndimiro za kurugwamu bihongo;
okuba okwo niyo engabo y'emanzi bagihagaliize,
engabo ya Shauli tekisiigwa majuta.
22Obuta bwa Yonatani bukaba butagaruka nyuma,
buchumita omubisha bumwita;
n'embanda ya Shauli ekaba etagaruka bushai.
23Shauli na Yonatani babaire bali barungi nibagonzibwa!
Omu burora n'omu kufa tibataishukaine;
babaire barahuka kushaga enkwaju,
amani nibakira entare.
24Baisiraeli inywe, chulira Shauli,
ayabajwekire emyendo kaliza elikutukura,
akagibateraho emilengyo y'ezahabu.
25Emanzi zaitwa zitai, kugwa omu ndashana!
Yonatani bamwitira aha nshozi zawe.
26Yonatani murumuna wange ninkushasibwa,
obaire oli mugonzibwa muno ahali inye,
engonzi zawe ahali inye zibaire zili katangaza
kushaga engonzi ez'abakazi.
27Emanzi zafa zitai,
n'ebikwato by'endashana kusilika!”
Currently Selected:
2 Samweli 1: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
