Zimbazi 2
2
Cambuzi ce Mahala
1Gwe mwanangu, wiyijizaje zono nghukulonjela,
kanyhi wulece kuzisemwa zono nghulonjela witume.
2Hulicize kuli ze mahala, wuzimanye.
3Heya, wulombe wutuje wumanye,
no kuwucemeleza wizuce.
4Wulondole wuhidimbaye,
nha vyono wali wuyilondole fweza,
hamba sawo yono hundikwe.
5Na hono wulondole wuhidimbaye,
kosuma kuyimanya nhunizo ye cogopo co Muwaha Mulungu,
nagwe baho, ho kosuma kuzimanya za kuli Mulungu.
6Hambi nha yo Muwaha Mulungu du,
mono kawapelaga wanhu mahala,
na muli mwene, mo vilawaga wumanye wose no wizuce.
7Kanyhi mwene, yo kalavyaga wutazi no wucitilwe,
kuli wose we ling'ani, ne wanhu wehuwilwa.
8Kanyhi, yo mweneco du mono kawacitilaga wose,
wono wawatendelaga wayawo ko wukali,
no kuwadima wose wono welavizye kuli mwene.
9Holeka, hono wuhulicize 'ne,
baho ho komanyila zono zili mugoloka,
na ze ling'ani, kanyhi swanu.
Kanyhi kosuma kuzimanya zono zikunojeye witume.
10Kowa wina mahala,
no wizuce wako wokupela wusangalale mu mutima wako.
11Wizuce wako no wumanye wako,
vyokukamisa
12no kukwimila, ho wulece kwituma zimbi yaye.
Navyo vyokutemanula ne wanhu wono wendile makani-kani,
kuli zono walongaga
13i wanhu wono wakondya kuyileka mikalile ye ling'ani,
no kwikala mu citi co wubi,
14wanhu wono wendezwaga mu wituma zimbi,
wono wasangalilaga mu zimbi,
15wanhu wono wayisina mbeka,
wono si wosuma hamba kwitumbilwa yaye.
16Kosuma kumwilega mucekulu musenyha,
mono yakujela kukupepeleza kwe zinghani zakwe ndece,
17mono si mwihuwilwa na kuli mulume wakwe mwenco,
mono kanyhi, yakusemwa no wilahize wakwe.
18Na hono wubite ku kaya yakwe,
ale, wumanye nha vyono,
wutyatizye nzila ye lifwa.
Na hono wubite, nha cinji,
wukuyisejelela yisi ye wafu.
19Hambi nha hasina munhu mono yabita kumulamusa,
mono kanyhi yawuya.
Hambi nha si kowuyajila kanyhi mu nzila yo wumi.
20Holeka agwe, yikunojeye wutyatye musambo we wanhu waswanu,
wono wekaye mu mikalile ye ling'ani.
21Hambi i wanhu we ling'ani,
kanyhi wono wakwilaniciye,
nha wokwikala mu yisi yetu yiyi.
22Langa i wabi, Mulungu kolowawusiza lukulu mu yisi,
yawakulanje i wanyo wubi,
nha vyono wavikulaga vilimwa mu muhangha.
Currently Selected:
Zimbazi 2: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.