Zimbazi 1
1
Zimbazi
1Azi zo zimbazi za Solomona u mwana wa Dawudi, u mutemi wa Isilayeli. 2Zo mbazi zono zosuma kukutaza wumanye mahala, no kutuga wulanjizwe wuswanu, no kumanya zinonga zono zina nhunizo muno muno. 3Nazo zokwijiza nha vyono kosuma kwikala kwa mahala, no kuwa mwihuwilwa, kanyhi wuli ling'ani, hamonga no wuswanu. 4Zokunoza wuwuce mu wulele, wuwe munhu mono kosuma kuwejiza wazelelo, ho wawe no wumanye. 5Ne zimbazi zizi, zosuma konjeleza wumanye kuli wanhu we mahala, no kuwapela wutonji wa mu wumanye wawo, 6ho wasume kuzimanya muno zinhunizo za mugati muno, ze zimbazi, hamonga ne vidalicizo vye wanhu wawo we mahala.
Mejizo kuli wazelelo
7I cogopo co Muwaha Mulungu, wo wusimyo wo wumanye. Ninga i walele wabedegalaga mahala ne mafundo.
8Mwanangu, wuhulice mafundo gono sogo
no nyina yako wakwijizaga wulece kugaleka.
9Hambi mafundo gawo nha gokupela nyikala swanu.
Gowa nha mukumbo we lihewa,
mu mutwe wako,
hamba nho mukufu wa mu singo yako.
10Mwanangu, wanyo wubi hono wakukwejeleze ko wusugu,
wulece kulumbila lukulu.
11Hono watye,
“Ale cibitane cikamulondole munhu cimuwulaje!
Cibitane cikawahome wanhu wono wasina masutya,
wuwe nha wo mwidawalo wetu!
12Nha vyono yinha, cowamela wakali womi nhe yisi ye wafu.
Kotya wakugwila mwi'kweme.
13Nase cozilondola sawo zose ze wagoli,
ciwe kuzimemya zikaya zetu na vyono cowa caviteka!
14Holeka wuze cilunze nase,
nase cogawana vinhu vyose vyono covihiza.”
15Ninga 'ne nghukutya nhavi agwe mwanangu,
vyono, wulecele lukulu kwilunza ne wanhu we liwala lilyo,
hamba wulece kuwatyatya.
16Hambi wene nha si walindilaga kuwituma zimbi,
nhondo zose wekalaga wewikanize so wuwulaji du.
17Kanyhi wumanye vyono,
si viswanu kuyitega ndeje no lwavu,
lono nayo yikunuguliye yikukuwona,
18hambi wanhu we liwala lilyo,
nha wategaga mutego,
kanyhi wawa kwigwiza weneco,
mu mutego wono wokwiwulaga wali wene.
19Kanyhi, wumanye vyono wuhizi,
wusakaga wumi wo muhizi.
Ne nghani yiyi, yikuwa kumwijelela munhu wo wose,
mono kekalilaga muli zo wuwulaji.
Mahala gakucema
20Alu wuhulicize!
Mahala gakucemeleza mu zinzila na mu zi sokoni,
21gakucemeleza gehindile,
sunga na mu malango ge likaya,
sunga ne hanhu ho hose,
hono wanhu wendile kwihanguliza hamonga.
22Gakucemeleza gakutya,
“Nye nyo wanhu walele!
Alu ho mojendelela kwikala muli walele sunga nili?
Alu si mosuma kwiyijiza hamba hadodo lo?
23Ale lu, muhulicize lono nghumutacilenyi.
Hambi 'ne nha nghumulanjizenyi viswanu,
no kumugubulilenyi ze mahala gangu.
24Nasola katali nghumucemelezenyi,
nghumusacenyi ho munyizize,
ninga nanye hamba kuhulika yaye.
25Mwakondya kuwubedegala wulanjize wangu wose,
hamba si mwendile ne mafundo gangu.
26Ninga nanye kolo mwenjila mu magazo,
nane nomusekanjenyi muno muno.
Kanyhi nomwizwajizenyi kolo zimbi zikumwaganenyi.
27Kolo magazo gago gakumuzizenyi nho mukukunzo,
gawe kumuletelenyi libeho lyo wugaye,
nanye lono mowa muli mu wusungu no wukalale.
28Ale baho nanye, ho mulagalondolela mahala,
ninga nane hamba si nolomutondowozenyi ng'o.
Nanye molonondola hanhu hose,
ninga hamba si molombona yaye.
29Hambi nha mwawusula wumanye,
hamba kusaka nhondo zose kumuhulika Muwaha Mulungu yaye.
30Kanyhi hamba si mwasacila lukulu kugabocela mafundo gangu,
hamba kugatununhicila bwete.
31Holeka luno, zomwaganenyi zono ziwanojeye,
ne metumo genyu gomupelenyi mhungo.
32Holeka i wanhu walele,
wofwila mu wulele wawo,
hambi nha si wakusaka mahala.
Vyono i wanhu wono wasina mahala,
nha wakuwa kongomezwa no wuwula mahala wawo.
33Ninga munhu wo wose mono kohuliciza'ne,
yuyo kokwikala yapolile,
kowa mutulano,
hamba kowa yasina soko yo kogopa cinji co cose yaye.”
Currently Selected:
Zimbazi 1: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.